Mose Wasoolwilepo Ukulapepa Yeova

Lino ulupwa lwakwe Yakobo lwali umu Ijipti yatandike ukulwama ukuti Aina Izlaeli. Lino Yakobo na Jozefu yaafwile, Falao muze watandike ukuteeka. Watiinyile ukuti Aina Izlaeli yamakwata sana amaka ukucila Aina Ijipti. Fwandi Falao wii wacisile Aina Izlaeli ukuya azya. Wayapatikizyanga ukutama injelwa nu kuomba imilimo ikome umu vyalo. Lelo lino Aina Ijipti yapatikizyanga Aina Izlaeli ukuomba imilimo ikome sana ali lino Aina Izlaeli yavulilangako sile. Pa mulandu wakuti Falao ataatemilwe, walanzile ukuti ndi cakuti Umwina Izlaeli wakwata umwana umonsi, umwana wiyo alinzile ukukomwa. Uzye ukwelenganya ukuti Aina Izlaeli yuvwile uli?

Umwanaci umwi Umwina Izlaeli, uwi zina lyakuti Yokebedi, wakweti umwana umonsi umusuma sana. Pakuti acingilile umwana wiyo, wamwisile muli basketi aya amufisa umu matete mu mbali ya Luzi Lwa Naelo. Milyamu nyinalenzi wa mwana wiyo wimilile katalamukila pakuti alole ivimacitikila umwana.

Lino umwana umukazyana wakwe Falao waile umu kufulala uku luzi, waweni basketi. Muli basketi wiyo mwali umwana uwalilanga, nupya wamuvwilile uluse. Milyamu wamuzizye ati: ‘Uzye ningaya nkamilondele umwanaci uwakuti amisakamalila umwana wii?’ Lino mwana Falao wazumile, Milyamu waile aama Yokebedi, nyina wa mwana kwene wiyo. Mwana wakwe Falao wanenyile Yokebedi ati: ‘Senda umwana wii, wamundelelako, nupya ndakulipila.’

Lino umwana wiyo wakuzile, Yokebedi wamutwazile uku mwana umwanaci wakwe Falao, uwamwinike izina lyakuti Mose nupya wamusunganga kwati umwanakwe. Mose wakuliile ukwi sano nupya wakwatanga vyonsi vino akulonda. Lelo Mose atiliile Yeova. Wamanyile ukuti wali u Mwina Izlaeli, ataali u Mwina Ijipti foo. Nupya wasoolwilepo ukulaombela Yeova.

Lino Mose wali ni myaka 40 wasoolwilepo ukwazwilizya antu yakwe. Lino waweni Umwina Ijipti akuma Umwina Izlaeli umuzya, Mose umile Umwina Ijipti icakuti wafwile. Nupya Mose wazisile umuntu wiyo mu micanga. Lino Falao wamanyile vivyo, walondanga ukukoma Mose. Lelo Mose utukiile uku mpanga iya Midyani. Nupya lino wali kuuku Yeova wamusakamalanga.