Vinkunka Vitatu Ivya Kutandikilako

Lino Aina Izlaeli yaali azya, yayapatikizyanga ukuomba imilimo ikome. Yeova watumile Mose na Aloni kuli Falao kuti yakamuneene ukuti: ‘Leka antu yane yaapita, yakampepe umu lwanga.’ Falao waswike cilumba cilumba ati: ‘Ntasakamiile vino Yeova aatalanda, nupya ntalaleka Aina Izlaeli yaapita.’ Lyene Falao wacizilemo ukuyapatikizya ukuomba. Uzye utuumanya vino Yeova wacisile pa kusambilizya Falao? Waleesile ivinkunka 10 mu Ijipti. Yeova wanenyile Mose ukuti: ‘Falao asikulonda ukuvwa kuli neene. Mutondo katondo, alaya uku Luzi Lwa Naelo. Ukaye kuli aliwe nupya ukamuneene ati: Pa mulandu wa kuti usikulonda ukuleka antu yane yapita, manzi yonsi aa mu Luzi Lwa Naelo yamasanguka uwazi.’ Mose uvwiliile, nupya waile kuli Falao. Falao waweni lino Aloni umile intuwa yakwe pa Luzi Lwa Naelo, na manzi yonsi iyasanguka uwazi. Manzi yatandike ukununka, inswi zyafwile, nupya antu yatiile ukumwa manzi aa mu Luzi lwa Naelo. Nanti ciye vivyo, Falao wakaanyile ukuzumilizya ukuti Aina Izlaeli yaapita.

Pa cisila ca manda 7, Yeova watumile Mose kuli Falao na mazwi aakuti: ‘Ndi cakuti wakana ukuleka antu yane yaapita, mu mpanga yonsi ya Ijipti mulaya ya cula.’ Lino Aloni wakatwisye intuwa, ya cula yazuuzile umu mpanga yonsi. Lyene antu yazanyile ya cula mu mang’anda yao, pano yalaalanga, nu mu viya monsi. Ya cula yaali ponsi sile. Falao wanenyile Mose ukuti amupapatileko kuli Yeova pakuti afumyepo icinkunka cico. Falao walavile ukuti wali nu kuleka Aina Izlaeli yaapita. Fwandi Yeova wafumizyepo icinkunka cico, nupya Aina Ijipti yakolonganike ya cula afwe mu mitumba. Impanga yonsi yatandike ukununka. Lelo, nupya kwene, Falao ataazumilizye ukuti Aina Izlaeli yaapita.

Lyene Yeova wanenyile Mose ati: ‘Aloni akume intuwa yakwe pa musili, nupya ulukungu lonsi lulasanguka tu undu, nanti utuzizi utunono utukaluma.’ Lino Aloni umile intuwa yakwe pa musili lilyo kwene sile ulukungu lwasangwike tu undu. Yamwi pa yantu yakwe Falao yamunenyile iyati: ‘Cinkunka cii cifumile kuli Leza.’ Nalyo kwene Falao ataazumilizye ukuti Aina Izlaeli yaapita.