Viumba Ivya Musumba Uwa Yelusalemu

Katulandeko panono pali vino vyacitike imyaka iya ku cisila. Neemiya umuomvi uwa Mwene Alitakisesi, wali Umwina Izlaeli uwikalanga umu musumba uwa Susa umu Pesya. Umwina wakwe Neemiya wafumile uku Yuda nu kuyamuneena ilyasi ilipe ilyakuti: ‘Antu aswilila uku Yelusalemu asi acingililwe. Viumba ni mpongolo vino Aina Babiloni yonona vitakuulwa cipya cipya.’ Neemiya wasosile sana. Walondesyanga ukuswilila uku Yelusalemu nu kuyayazwa, fwandi wapefile ukuti umwene amuzumilizye ukupita.

Lino papisile insita, umwene waweni ukuti Neemiya ali nu ulanda. Wamuneenyile ati: ‘Vii asi vino waya. Uzye vyonsi vili ningo?’ Neemiya watiile: ‘Ningakana uli ukuya nu ulanda, lino umusumba wane, uwa Yelusalemu wononeka?’ Umwene uzizye ati: ‘I cani cino ukulonda nkucitile?’ Papo kwene sile, Neemiya wapefile umu mwenzo. Lyene watiile: ‘Napaapata, leka inje uku Yelusalemu pakuti nkakuule iviumba cipya cipya.’ Umwene Alitakisesi wazumilizye Neemiya ukupita, nupya wamupeezile ni vya kumucingilila pa ulendo wakwe utali. Nupya wisile Neemiya ukuya umulasi uwa mu Yuda nu kumupeela imiti iya kuyaomvya pa kupanga impongolo izya musumba.

Lino Neemiya wafisile umu Yelusalemu, waceceesile iviumba. Wakolonganike ya simapepo ni ntunguluzi nu kuyaneena ati: ‘Vintu visi ningo. Tulinzile ukutandika ukuomba.’ Antu yazumile, nupya yatandike ukukuula iviumba.

Alwani ya Ina Izlaeli yamwi yayasekanga, nu kuyaneena iyati: ‘Nkusa angonona iviumba vino mukukuula.’ Aomvi yatisile amano kuli vino yayatumfyanga lelo yatwalilile sile ukukuula. Yakuuzile iciumba icitali nupya icikome.

Alwani yapangine kuti yakafumilile umu ntunga izipusanepusane nu kuzanza Yelusalemu ukwaula ukuti antu ya mu musumba yamanye. Lino Ayuda yuvwile ukuti yakulonda ukuyazanza yuvwile intete. Lelo Neemiya watiile: ‘Mutuvwa intete. Yeova ali naswe.’ Wasonsile alinzi akucingilila aomvi, fwandi alwani yafizilwe ukuyazanza.

Yamazile ukukuula iviumba ni mpongolo umu manda sile 52. Neemiya wakolonganike Aina Levi umu Yelusalemu pakuti yapeele umusumba kuli Yeova. Wayakolonganike umu maumba yaili yakwe ya kiimba. Maumba yaa yaili yakwezile api linga ukuomvya Impongolo ya Kafukoka alino iyaya umu ntunga ziili izipusane ala yakuzinguluka umusumba. Yalizyanga mapenga, viwaya na mazeze alino nu kwimbila Yeova. Ezila watungulwile iumba lyonga, na Neemiya nawe watungulwile iumba lyuze mpaka iyaya iyakomenkana api tempele. Antu yonsi sile, kuli kuti aonsi, anaci, na ana yapeezile amalambo kuli Yeova nu kuzevya. Amazwi yao yuvwisile ukutali sana.