Gabilieli Watandalila Maliya

Elizabeti wakweti lupwa wakwe uwacance uwi zina lyakuti Maliya, uwikalanga umu musumba uwa Nazaleti umu Galili. Maliya wakobekilwe kuli Jozefu, uwaombanga umulimo wa kuwaza. Lino Elizabeti wakweti inda iya myezi 6, Gabilieli waile kuli Maliya. Watiile: ‘Maliya, mutende uye nawe. Yeova watakupaala.’ Maliya atamanyile muno Gabilieli walozizye. Nupya wamuneenyile ati: ‘Ulakwata inda nupya ulakwata umwana umonsi, ukamutemele izina lyakuti Yesu. Alaya Umwene. Nupya Uwene wakwe ulikalilila manda pe.’

Maliya walanzile ati: ‘Ntatala nalalapo nu monsi. Uzye ningakwata uli umwana?’ Gabilieli nawe walanzile ati: ‘Kusi cino Yeova angafilwa ukucita. Ulapokelela umupasi wa muzilo nupya ulakwata umwana umonsi. Elizabeti lupwa wako nawe kwene wakwata inda.’ Lyene Maliya walanzile ati: ‘Neene umuzya mukazyana wakwe Yeova. Lekini vyonsi vino mwalanda vikacitike kuli nene.’

Maliya waile umu musumba uwaelile umu myamba mukutandalila Elizabeti. Lino Maliya wamulamwike, Elizabeti uvwile umwana uwali umunda watoloka. Nupya umupasi wa muzilo walenzile Elizabeti alande ati: ‘Maliya, Yeova watakupaala. Isyuko sana ukutandalilwa na nyina uwa Mwene pa ng’anda pane.’ Maliya nawe walanzile ati: ‘Nkulumbanya Yeova nu mwenzo wane onsi.’ Maliya wikazile na Elizabeti imyezi itatu, nupya pa cisila waswilile uku Nazaleti.

Lino Jozefu uvwile ukuti Maliya wino wakobekile watakwata inda, walondanga ukuti yate ukwizizyanya. Nomba malaika walolike kuli aliwe umu ciloto nu kumuneena ati: ‘Utatiina ukutwala Maliya. Pasi icipe icili consi cino acisile.’ Fwandi Jozefu wasenzile Maliya uku ng’anda ukwakwe aya umuci wakwe.