Yoani Walola Ivilolwa

Lino Yoani wali umu cifungo pa cilila ca Patimosi, Yesu wamulangizye ivilolwa 16 nanti vintu ivyali nu kucitika uku nkoleelo. Vilolwa vii vyalangilile vino izina lyakwe Yeova lyali nu kucindikwa, vyalangilile nu kuti Uwene wakwe uliza, nu kuti kulonda kwakwe kulacitika pano nsi nu mwi yulu.

Mu cilolwa conga, Yoani waweni Yeova atenzi pa cilimba cakwe ica wene ukwi yulu, ala aikolo 24 azwite ivyakuzwala ivitiswe ni visote vyakwe goldi iyamuzinguluka. Inkuwa yamyantwile pa cilimba ica wene nupya puvwisile ukupangalakansya. Aikolo 24 yafukamile Yeova nu kumupepa. Mu cilolwa cuze, Yoani waweni antu kufuma umu nko zyonsi, umu yantu, nu mu ndimi aakapepa Yeova. Mwana wa Mfwele kuli kuti Yesu, wayacemanga nu kuyatungulula uku manzi ya umi. Lyene pa cisila, mu cilolwa cuze, Yesu watandike ukuteeka umwi yulu pamwi na ikolo 24. Mu cilolwa icalondeliilepo, Yoani waweni Yesu akulwisya icizoka kuli kuti Satana ni viwa vyakwe nupya Yesu wavisumbiile pano nsi.

Lyene Yoani waweni Umwana wa Mfwele pamwi na ya 144,000 ala yaimi pa Mwamba wa Zioni. Nupya waweni malaika akupapuka pano nsi nu kuneena antu ukuti yatiina Leza nu kumupeela umucinzi.

Mu cilolwa icalondelilepo, Yoani waweni kuno yakulwa inkondo ya Amagedoni. Mu nkondo iyo, Yesu na asilika yakwe yacimvizye Satana na antu yakwe. Mu cilolwa ica kusyalikizya, Yoani waweni umwi yulu na pano nsi pali umutende. Satana na antu yakwe yonsi yononyilwe. Antu yonsi umwi yulu na pano nsi yalolanga izina lyakwe Yeova ukuti ilya muzilo nupya yapepanga sile Yeova.