ISAMBILILO 8

Ukuomvya Ivilangililo Ivingalenga Antu Yasambilile

Mateo 13:34, 35

IVILI UMWI SAMBILILO LII: Mwazifyako imisambilizizye lino mukuomvya ivilangililo ivyangupale vino ya kuuvwa yangatemwa nupya ivingamwazwa ukusambilizya ivisinka ivicindame.

IVYA KUCITA

Mwasoolola ivilangililo ivyangupale. Wakwe vino Yesu wacitanga, mwaomvya utuntu utunono pa kulondolola ivintu ivikulu, ni vintu ivyangupale ukulondolola ivintu ivitale. Mutaikamo ivyeo ivingi ivitacindime ivingalenga icilangililo citale ukuvwa. Mwasininkizya ukuti ivili umu cilangililo vikuuvwana na vino mukusambilizya pakuti ya kuuvwa yatapumvyanyiziwe ni vintu ivisikuvwana na vino mukulandapo.

Mwaika mano uku vintu ivikacitika. Mwaika mano uku vintu ivikacitika cila wanda, mwaisambilizya umu mpapulo zitu, nupya mwakutika kuli ya kasambilizya amanya ningo ukusambilizya. Lino mukucita vivyo, mwaika mano uku vilangililo vino mungaomvya pakuti muzifyeko imisambilizizye inu. Mwalemba ivilangililo vivyo nu kuvisunga muli faelo winu.
Mwaelenganya pali ya kakutika inu. Mwasoolola ivilangililo ivilimo imilimo ino ya kuvwa inu yakaomba ni vintu vino yatemwa. Mwacenjela pakuti ivilangililo vinu vitakuzewanya nanti ukusosya ya kakutika inu.
Mwasambilizya icisinka cikalamba. Ikini amano uku kulangilila icisinka cikalamba, asi uku vyeo ivitacindime. Mwasininkizya ukuti ya kakutika inu yamaiusyanga icisinka cikalamba cino yasambilila uku cilangililo ukuluta ukwiusya sile icilangililo.