ISAMBILILO 14

Ukulanda Ivisinka Vikalamba Umu Nzila Iyuvwike

Ayebulai 8:1

IVILI UMWI SAMBILILO LII: Azwini ali umwi umba ukulondela ningo ilyasi linu, nupya londololini ningo vino icisinka cikalamba conga na conga cikuuvwana nu uyo wi lyasi lino mukulanda alino ni cikulandwapo.

IVYA KUCITA:

Kwatini uyo. Manyini ndi cakuti ilyasi linu liyelileko ukumanyisya, ukusinila, nanti ukucincizya ali umwi umba nupya lilandini vivyo kwene. Sininkizyini ukuti ivisinka vikalamba vyonsi vikumwazwa ukufikilizya uyo winu.

Yuzyini mweineco muti: ‘A mauzyo ci yano ali umwi umba yangakwata nupya i vyeo ci vino yangakana ukuzumila api lyasi lii? Uzye u munzila ci muno yanguzizya amauzyo yayo nupya yangalanga uli ukuti yatazumile ivyeo vimwi?’ Lyene tantikini ivisinka umu nzila kwene iiyo pakuti ali umwi umba yangalondela ningo, ukuvwikisya, nu kuzumila ivyeo vivyo.
Landini sana pali cino cikulandwapo umwi lyasi linu. Mwalanda sana pali cino cikulandwapo umwi lyasi linu lino mukuswilizyapo amazwi acindame sana aakulanda pali cino mukulandapo nanti mungaomvya amazwi akolineko.
Londololini ningo ivisinka vikalamba nupya umu nzila iyangupale. Soololini ivisinka vikalamba ivikuuvwana ni cikulandwapo nupya vino mungasambilizya ningo umu nsita iyatilangililwa. Mutalinzile ukuvuzya ivisinka vikalamba, londololini ningo icisinka cikalamba conga na conga, mwatala imwimilila pa kuya uku cisinka cuze, nupya mwavilemenkanya ningo.

Mungalanda ivisinka vikalamba lono mukutandika ilyasi linu pakuti mwazwe iumba ukulondela nanti mungavilandapo nupya umu mazwi ya kusyalikizya pakuti mwazwe iumba ukutwalilila ukwisya ivisinka vivyo.