Mwapituluka Umu Visinka Vikalamba

Uzye catala camutalilapo ukwiusya vino imukusambililapo? Swensi kwene ivya musango uu vikatucitikila insita zimwi. I cani cingamwazwa? Mwapituluka umu visinka vikalamba.

Lino mukuisambilizya, mwaimililako nu kwelenganya pali vino mwasambilila. Lolini vino umutumwa Paulo wavwile yayo abelenganga kalata ukuvwikisya amazwi yano walemvile. Walemvile ati: “Icisinka cikalamba cino tukulandapo i cakuti.” (Aeb. 8:1) Amazwi yaa yalenzile antu yuvwikisye vino walandangapo na vino ivisinka vino walandangapo vyalemenkine.

Mwapatulako insita ya kupituluka muli vino imukuisambilizya, limwi mungasyako nanti a mamineti 10. Ndi cakuti mwafilwa ukwiusya ivisinka vikalamba, mwapituluka mu tumitwe utunono nanti ukubelenga sentensi wa kutandikilako muli cila palaglafu pakuti cimwazwe ukwiusya. Ndi cakuti mwaisambilizya vimwi ivipya, mwaezya ukuvilondolola umu mazwi inu. Ukupituluka umu visinka vikalamba kulamwazwa ukwiusya vino mukuisambilizya nupya kulamwazwa ukulola vino ivyeo vivyo vingamwazwa mu umi winu.