LYASI LYAKUTANDIKILAKO | UZYE SATANA AKUNO WAYA?

Uzye Satana Uyi Sile Uwayako?

Cangupala sana ukulanda ukuti Satana wino tukawelengapo muli Baibo akaimililako sile iviipe ivikacitika. Nomba uzye vii ali vino Baibo ikasambilizya? Ndi cakuti icacumi, u mulandu ci uno Baibo ikalondolwela Satana ukuti akuvwanga na Yesu Klistu alino na Leza Wamaka Yonsi? Lekini tulande pa kulanzyanya kuu ukwacitiike.

LINO SATANA WAVWANZILE NA YESU

Lino Yesu watandike umulimo wa kusimikila, Ciwa wamwezizye ukuomvya ivintu vitatu. Cakutandikilako, Satana wezizye na maka ukutunka Yesu ukuti aomvye amaka yano Leza wamupeezile muli ukaitemwe pakuti sile aikute. Lyene Ciwa watunsile Yesu ukwika umi wakwe umu uzanzo nu kulanga ukuti wacenjela sana. Ni cakusyalikizya icakuti, Satana wanenyile Yesu ukuti wali nu kumupeela ukateeka pa mawene yonsi amu nsi ndi wa mupepa sile panono. Yesu wakanyile ivyakwezya vyonsi vii vitatu, waomvyanga Malembelo cila-nsita.—Mateo 4:1-11; Luka 4:1-13.

Uzye Yesu walandanga na weni? Uzye walandanga kuli cimwi icali muli aliwe? Ukulingana na vino Malembelo yakaalanda, Yesu “weziwe mu misango yonsi ndi vino naswe tukaeziwa, lelo wene atifizye.” (Ayebulai 4:15) Nupya Baibo ikati: “Atatazile aifye, nupya kusi umwi uwatazile auvwa akutumpoka.” (1 Petulo 2:22) Yesu watwaliliile ukuya umumaliilike, wali sana na ucisinka. Ataalesile ukuti imiyele imwi iipe iye muli aliwe. I cumicumi, Yesu atavwanganga uku vintu vimwi iviipe ivyali muli aliwe; walandanga uku muntu uwaliko.

Ukulanzyanya kwene kuu nako kwasiniile ukuti Satana u muntu wa cumi-cumi.

• Iusyini ukuti Ciwa wanenyile Yesu ati wali nu ku mupeela ama wene yonsi apano nsi ndi wa mupepa. (Mateo 4:8, 9) Satana akana ukuya umuntu wa cumi-cumi, vino wanenyile Yesu ukuti wali nu kumupeela nga vitaakweti upiliulo. Nupya, Yesu ataakaanyile ukuti Satana wakweti amaka yakucita vino walanzile.

• Lino Yesu wacimvizye amezyo, Ciwa lyene “watazile amusya.” (Luka 4:13) Uzye paa tungati Satana wali imiyele sile iipe, nanti, uzye u mulwani aakalondesya ukutunka antunze?

• Baibo ikatuneena ukuti lino Yesu wacimvya amezyo ‘angeli iizile yamutumikila.’ (Mateo 4:11) Uzye angeli yali aantu aali ni mili ya mupasi, aakomelizye Yesu nu kumwazwa? Ee. Nga lyene, u mulandu ci uno tungaelenganyizizya ukuti Satana wali icintu cimwi sile icitaali nu mwili wa mupasi?

LINO SATANA WAVWANZILE NA LEZA

Ukulanzyanya kwakwe ciili kwaya umwilyasi lya monsi uwizina lyakuti Yobo uwatiinanga sana Leza. Ilyasi lii likalanga ukuti Ciwa walanzyanyizye na Leza maila yaili. Pa maila yonsi yoili, Leza walumbilizye Yobo pali ucisinka uno wali nao. Satana walanzile ukuti Yobo waombelanga Leza pa mulandu na ukaitemwe, ukulozya umu kuti kwali vimwi vino Leza wapeelanga Yobo pali ucisinka uno wali nao. Umu mazwi yauze tungati Ciwa walandanga ukuti wamanyile Yobo ningo sana ukucila vino Leza wa mumanyile. Yeova walesile ukuti Satana alovye vyonsi vino Yobo wakweti kumwi na ana yakwe, alino nu kumulwalika icipisye.a Umukuya kwa nsita, cizile icimanyikwa ukuti Yeova walandanga ivya cumi pali Yobo, nupya Satana wasiniilwe ukuti u waufi. Leza wapoleliile Yobo pali ucisinka wakwe.—Yobo 1:6-12; 2:1-7.

Uzye vwilini vino Leza walanzyanyanga na Satana, tungati Yeova walandanga uku miyele iipe iyaali muli aliwe? Baibo ikati: “Ivicitwa vyakwe Leza vyafumaluka.” (2 Samueli 22:31) Izwi lyakwe Leza nupya likaati: “Wamuzilo, wamuzilo, wamuzilo mwene Leza wa maka yonsi.” (Umbwilo 4:8) Ukuya uwamuzilo kukapiliula ukuya umuswepe, umusanguluke, ukukanaya nu luyembu. Yeova wamalilika nupya asiluvyanya. Atanga akwate imiyele iipe.

Nomba yamwi yangati na Yobo kwene ataali umuntu uwa cumi-cumi, fwandi ukulanzyanya ukwacitike i lyasi lya kwelenganya sile. Nomba uzye ukulanda kwa musango uwo kwaya sile ningo? Amalembelo yauze yakalanga ukuti Yobo akuno wali. Pali Yakobo 5:7-11, Yobo walondololwa ukuya umuntu wino Aina Klistu yangakolanya lino yali ni ntazi iziipisye pakuti yaazizimizya nu kwiusya ukuti Yeova akaalambula yaayo aakazizimizya. Uzye ndi cakuti Yobo ataali umuntu wa cumi-cumi na mezyo yakwe Satana yaali amalyasi yakwelenganya sile, uusuma ci uungaya umwilyasi kwene lii? Cuze naco icakuti, pali Ezekelo 14:14, 20, Yobo walumbulwa pamwi na Nowa alino na Danieli, pa mutande wa yonsi yatatu aali aololoke. Wakwe vino Nowa na Danieli yaali, Yobo nawe wali u muntu uwa cumi-cumi, umonsi uwali nu utailo sana. Uzye ndi cakuti Yobo wali u muntu wa cumi-cumi, tungati umulwani wakwe wene uwalenzile ukuti acule sana ataali umuntu wa cumi-cumi?

Baibo ikaalanga ukuti Satana u muntu wa cumi-cumi uwaya nu mwili wa mupasi. Limwi mungayuzya mweineco muti, ‘Uzye Satana angaleta intazi pali nene nu lupwa lwane umu nsi ii muno antu yaalunduluka sana umu miombele ya vintu?’

NGA NDAKAI CAYA ULI?

Elenganyini ukuti ivipondo vyati-viza umu musumba uno mukaikalamo. Ukwaula nu kutwisika, cingaatala sana ukuicingilila nupya ivicitwa vingipa sana umu cifulo cico. Lyene elenganyini pa cintu icakolana na cii: Mwelenganye ukuti Satana ni viwa vyakwe ivya pondokile Leza, yasumbilwa pano nsi. I vyani ivingacitika? Tala elenganyini pali vino mukalola pa malyasi yakumanyisya pa vintu ivikacitika kuno mwikala nu mu mpanga zyuze.

• Uzye mukalola ukuvulilako kwa viipe, unkalwe, nanti icakuti antu umu nsi yonsi yakaezya sana na maka ukuti yasisyepo ivintu vivyo?

• Uzye mukalola ukuvulilako kwa vintu vino yakalangizya ivyakuizanzya muno mwaya ivya mipasi, nanti angala avyazi aingi yakaezya ukucingilila ana yao ku vintu vivyo?

• Uzye mukalola vino ivintu umu nsi vikalukononeka, nanti icakuti antu yakaezya na maka uku cingilila insi?

• Uzye kwaya cimwi icalenga ukuti ivintu viipe sana umu wikazi wa yantu icikalenga ukuti antunze yaatunkwa ukucita ivintu iviipisye?

Mukwai ilolelini wino Baibo ikati aakalenga ukuti iviipe vyacitika; tukawelenga ukuti: ‘Cizoka cikulu cisumbwa pa nsi. Cene cili cizoka ca mpiti cino yakati Ciwa, nanti Satana, wino akasomba antu amu nsi. Wene pamwi na angeli yakwe yonsi yasumbwa pano nsi. . . . Kalanda ku amu nsi na yemba! Pano Ciwa watasumbwa pa nsi kunomuli, nupya ali nu ukali cuze pano amanyile ukuti watasyala sile ni nsita inono.’ (Umbwilo 12:9, 12) Antu aingi ndi yamanya usininkizyo uu, yakati Satana u muntu mwipisye aasiloleka, wino akalenga ukuti ivintu iviipe vyacitika umu nsi.

Limwi mungaasakamala sana pali vino mungacita pakuti mwaicingilila kuli Satana. Ukusakamala kwa musango uu kwaya sile ningo. Ilyasi lilondeliilepo lilalanda pali vino tungazana uwazwilizyo.

[Futunoti]