U Mulandu ci Uno Mulinzile Ukusambilila Baibo?

Uzye mwatala muzyapo amauzyo wakwe yaa? Nga muzyapo, mutaaya mwenga. Antu umu nsi yonsi yakauzya amauzyo acindame sana. Uzye mungazana amasuko?

Antu aingi wakwe cimwi yangasuka yati, “Ee!” U mulandu ci? Pano yaazana amasuko muli Baibo uku mauzyo yano yakauzya. Uzye mungatemwa ukumanya vino Baibo ikalanda? Fwandi limwi mungatemwa pologalamu ino ya Nte Yakwe Yeova iikako iya kusambilila Baibo ukwaula ukulipila.a

I cisinka ukuti, yamwi cikayatalila sana ukuwelenga Baibo, yakati: “Ntakwata insita.” “Baibo yatala ukuvwikisya.” “Nakwata ivyakucita ivingi.” Nomba yauze yene asi aali vino yakaelenganya. Yene yakalondesya ukumanya ivyaya muli Baibo. Lekini tulande pali yamwi:

• “Napepapo ku katolika nu mu calici ca antu apaatwike kuli ya katolika, nazanwanga nu mu ng’anda imwi iya mipepele (Sikh), nupya nalipo nu mucikulwa ca yaBuda aasitwala, napya nasambilile sana ni vya mipepele uku yunivesiti. Lelo nanti caali vii amauzyo aingi yano nakweti yataaswikwe. Lyene kwaliko Nte Wakwe Yeova uwizile pang’anda. Nuvwile ningo sana pali vino wasukanga mauzyo ukuomvya Baibo, nazumile ukuti nasambilila Baibo.”—Gill, ku England.

• “Nakweti amauzyo aingi sana pa umi, lelo vino ya simapepo aaku calici cino napepangako yaasukanga, vitamfikanga pa mwenzo. Nomba, Nte Wakwe Yeova umwi waswike amauzyo yano nakweti ukuomvya Baibo. Lino wanguzizye ndi ningatemwa ukumanyilapo na vyuze, nazumile.”—Koffi, ku Benin.

• “Nalondesyanga ukumanya sana vino afwe yaaya. Nemo namanyile ukuti afwe yakacuzya antu aapuma, nomba nalondanga ukumanya vino Baibo yalaandapo apa yafwe. Fwandi aali vino natandike ukusambilila Baibo na cuza wane wino wali Nte.”—José, ku Brazil.

• “Nezyanga ukuwelenga Baibo, nomba ntamanyanga upiliulo wakwe vino nawelenganga. Avino ya Nte Yakwe Yeova iizile nu kundondolwela ningo sana amausesemo yamwi-yamwi amuli Baibo. Nalondanga ukusambilila na vyuze.”—Dennize, ku Mexico.

• “Nelenganyanga ukuti limwi Leza ataansumbako mano. Napefile kuli Leza. Uwanda uwa londeliilepo ya Nte iizile apa ng’anda, nupya nazumile ukuti ningatandika ukusambilila Baibo.”—Anju, ku Nepal.

Vyonsi vino twalandapo, vikatwiusya amazwi yano Yesu walanzile aakuti: “Alongo antu yano mu myenzo yao yakailola vino yene apina.” (Mateo 5:3) I cacumi ukuti antunze, yakalondesya ukumanya Leza. Fwandi a Leza kwene aangayazwa ukuti yamumanye, nupya wacita vivyo ukupitila muli Baibo.

Uzye, i vyani ivikalondekwa pa kusambilila Baibo? Uzye ukusambilila Baibo ku ngamwazwa uli? Amauzyo yaa iyasukwa umwilyasi ililondeliilepo.