Uzye Sayansi Ikamwavwa Uli?

Ibuku limwi, lyalondolola sayansi ukuti, “u kusambilila pali vino ivintu vyaya na vino vikaomba ukupitila mukulola sile nanti ukupima.” Ukucita vii citangupala, u mulimo ukome. Ya sayansi cikayatalila pakuti yapime nanti ukulola vino ivintu vyaya, limwi pakapita ni milungu, imyezi nanti sile imyaka pakuti yamanye ningo ivintu vivyo. Insita zimwi yasizana masuko pali vino yakulondelezya, lelo ilingi vino yakazana vika-azwa sana antu. Lolini vimwi pali vino yaacita.

Kampani imwi iya ku Ulaya, yapanga masyini ino ikazifya manzi yandooti pakuti umuntu atanga alwale nanti wamwa amanzi yaayo. Ilingi masyini wi yakamuomvya sana nga kwapona uzanzo, wakwe vino cali lino kwacitike icilundumusi uku Haiti umu 2010.

Ya sayansi yaapanga iciomblelo cimwi (Global Positioning System) icikalangilila kuno umuntu akuya. Nanti icakuti iciombelo kwene cii yacipanzile ukuti ca-azwa asilika, cikaomviwa na yakapisya yakwe ya motoka, indeke, amato alino na ya kalunga ya nyama na atandazi. Tukataizya ya sayansi aapanzile iciombelo cii, pano lyene cikaangukila antu aakuciomvya ukumanya kuno yakuya.

Uzye mwakwata foni, kompyuta nanti uzye mukaomvya Intaneti? Uzye mwalola ukuti umi winu wayako ningo pa mulandu wa milembo ino ya sayansi yakapanga? Uzye mwakwelapo indeke? Ndi cakuti mwaomvyapo vii, ale mwazanamo usuma muli vino ya sayansi yapanga ivika-azwa antu. Fwandi sayansi yamwazwa umu umi winu umu nzila isuma.

VINO YA SAYANSI YATANGA YAKWANISYE UKUCITA

Ya sayansi yakaombesya sana pakuti yamanyilepo na vyuze ivingi. Ya sayansi yamwi yakalondelezya pa tuntu utunono sana, yauze nayo yakalondelezya sana kuti yamanye vino uumbo watandike pa myaka iingi iyapitapo. Lino yakulondelezya sana, nu mu vintu ivisiloleka na vino yatanga yaleme, ya sayansi yakaelenganya ukuti nga Leza akuno waya yalinzile ukumuzana.

Ya sayansi yamwi alumbuka sana na antu aakati aamano umu nsi ii, yakalondelezya ukufika patali. Yakalondela vino kalemba umwi (Amir D. Aczel) wasambilizyanga pa “masambililo yakwe sayansi aakuti kutaya Leza.” Umwi uwasambilila vyakwe sayansi uwamanyikwa umu nsi yonsi, walanzile ati, “icikasininkizya ukuti kutaaya Leza aakatungulula ivintu, a pa mulandu wakuti tutazana usininkizyo.” Yamwi nayo yakalozya uku vizungusyo ivyacitiike mpiti ivvyalembwa muli Baibo ukuti “a malele” sile nupya “vitanga vilondololwe.”a

Fwandi tunguzya tuti: Uzye ya sayansi yamanya ivingi icakuti yangalanda na vino ivintu vyapangwa ningo-ningo? Awe. Ya sayansi yamanya ivintu ivingi, lelo, aineco kwene yakaati kucili ivintu ivingi vino yatamanya nupya vimwi yatalatala yavimanye. Umuntu umwi (Steven Weinberg) uwasambilila sayansi nawe watiile: “Tutalatala tumanye ivintu vyonsi pano vyapela.” Muze nawe (Martin Rees) uwasambilila sana walanzile ati: “Kwaya ivintu vimwi vino antu yatalatala yamanye.” Icumi i cakuti, uumbo onsi kufuma pa tuntu utunono ukufika uku vintu ivikalamba ivyaya umu uumbo, vitalatala vimanyikwe ningo-ningo kuli ya sayansi. Lekini tulandeko pali vimwi:

• 

  Aasambilila pa vintu ivya umi, yataamanya ivikacitika umu nsande-nsande izyaya umu vintu ivya umi. Yataakwata ivisinka pali vino utuntu tuuto tukaomvya amaka, vino tukapanga ivyakulya pakuti ica umi citwalilile ukuya na maka, na vino tukasandana.

• 

  Amaka aakatinta yakatwavwa cila nsita amanda yonsi. Lelo, cii caya i cizungusyo kuli ya sayansi. Yatamanya ningo vino amaka yaayo yakaomba ukuwezya umuntu pansi ndi watoloka nanti vino amaka yaayo yakasungilila umwezi ukutwalilila ukuzinguluka insi.

• 

  Aasambilila pali vino vintu vyatandike, yakati kwaya ivintu ivya umwiyulu ivisiloleka nupya vitanga vipimwe na vimasyini. Yaapaatula ivintu vii umu viputulwa viili pakuti yavimanye ningo vino yakaati: Ivintu ivisiloleka (dark matter), na maka aasiloleka (dark energy). Imiombele ya vintu vii itaamanyika.

Kwaya na vyuze vino ya sayansi yatamanya ivikayazungusya. U mulandu ci? Umwi aakalemba vyakwe sayansi walanzile ukuti: “Ivintu vino tutamanya vyavulisya ukuluta vino twamanya. Nemo nkaelenganya ukuti, ukusambilila sana pali sayansi kulinzile ukulenga umuntu ukutandika ukulondesya ukumanyilapo na vyuze.”

Nga mukaelenganya ukuti sayansi yacindama ukuluta Baibo nupya ikaalenga antu ukuzumila ukuti Leza kutaaya, elenganyini pali cii: Ndi cakuti antu asambilila sana pali sayansi yafilwa ukumanya ivintu vyonsi ivyayako nanti icakuti yaakwata vimasyini vya maka, uzye mukwelenganya ukuti cingaya sile ningo ukukaana ukusambilila pa vintu vino ya sayansi yatanga yalondolole? Ibuku limwi (Encyclopedia Britannica) lyasondwelile ukuti: “Apiipi ni myaka 4,000 iyapitapo ukufuma pano ya sayansi yaatandikile ukusambilila pa vintu ivyaya umwiyulu, ivintu vyatwalilila ukuya wakwe viivikwene vino aina Babiloni aaliko mpiti yavimanyile.”

Inte Zyakwe Yeova zyacindika sana vino umuntu wenga na wenga angapingulapo api lyasi lii. Tukaezya sana na maka ukulondela vino Baibo ikatuneena ukuti: “Mwalanga kuteka mwenzo ku antu onsi.” (Filipi 4:5) Ukulingana na mazwi kwene yaa, tukumulaalika ukuti mutandike ukuceceta, pakuti mumanye vino Baibo na sayansi vikauvwana.