“I Cani Cino Leza Ataali Wacitilapo Cimwi?”

NDI KWACITIKA UZANZO, UZYE MUKATALA MUYUZYA UKUTI, ‘I CANI CINO LEZA ATAALI WACITILAPO CIMWI?’ NANTI UZYE ALE KWALI CIMWI ICAMUCITIKIILE MU UMI ICALENZILE MUYUZYE NAMPO NGA YEOVA AKAMUSAKAMALA?

Limwi mukayuvwa wakwe ya Sheila, aakaikala ku United States. Yakuliile mu lupwa luno yacindike sana mapepo, nupya yalanzile iyati: “Kufuma uwance wane natemilwe sana Leza pano aliwe watuumba swensi. Lelo, nayuvwanga ukuti ntaapalime sana kuli aliwe. Nelenganyanga ukuti wanjisileko mano, lelo asi sana, nalolanga kwati wali katalamukila. Ntayuvwanga ukuti Leza wampasile, lelo ntasininkizye sana ukuti wansakamalanga.” Nomba i cani cino ya Sheila yatwisikilanga ndi cakuti Leza wayatemilwe? Yalondolwile ukuti: “Vintu ivipisye vyacitikilanga sana ulupwa lwane, nupya calolekanga kwati Leza atatwavwanga nanti apanono.”

Wakwe ya Sheila, namwe kwene limwi mungatandika kutwisika ndi cakuti Leza wa Maka yonsi akuno waya. Mungatandika nu kwelenganya nga akamusakamala nanti foo. Monsi wa cumi Yobo, uwali nu utailo mu maka na mano yakwe Kaumba, nawe kwene watazile atwisika. (Yobo 2:3; 9:4) Lino ivintu iviipisye vyamucitikile mu kukonkana—waweni kwati kusi uwa kumwazwa—uzizye Leza ati: “Uzye icani cino wafisama kunondi nu kundola wa mwanisi wako?”—Yobo 13:24.

Uzye Baibo ikalandapo uli? Uzye Leza aakalenga ivipe kulacitika? Uzye kwaya usininkizyo ukalanga ukuti Yeova akasakamala antu yonsi nu muntu wenga wenga? Uzye pa lwitu tungamanya ndi cakuti Leza akalola, kumanya vino tukupitamo, kuvwa uluse alino nu kutwazwa?

Mu vipande vilondeliilepo, tumalanda sana pali vino iviumbwa vikatusambilizya ukuti Leza akatusakamala. (Loma 1:20) Lyene, tumalola vino Baibo yalanda ukuti Yeova akatusakamala. Nga “mwamumanya” kupitila muli vino waumba na muli Baibo alino mulasininkizya ukuti “akamusakamala.”—1 Yoane 2:3; 1 Petulo 5:7.