Visuma Vino Naipakizya Umu Mulimo Wakwe Yeova

YA LUPWA YANE YATALI AA NTE

Naviilwe umu 1934. Avyazi yane yafumile uku Switzerland nu kutandika ukwikala umu Ontario, itauni ilinono ilyaya umu Canada. Umu 1939, ya mayo yatandike ukubelenga Ulupungu Lwa Mulinzi nu kulazanwa umu kulongana kwakwe Ya Nte Yakwe Yeova. Nupya yatusendanga pamwi na aatowane 6 umu kulongana. Patalengile izile iyaya Ya Nte Yakwe Yeova.

Ya Tata yatatemilwe vino ya mayo yapingwilepo, lelo ya mayo yatemilwe sana icumi nupya yalondanga ukutwalilila ukuya acisinka kuli Yeova. Nupya yatwalilile ukuya acisinka na lino yainzile umulimo wakwe Ya Nte Yakwe Yeova umu Canada. Ya mayo yatwalilile ukuya ni cikuuku kuli ya tata nu kuyacindika nanti icakuti yalandanga amazwi aipe. Vino ya mayo yali ni miyele isuma vyalenzile nemo na aatowane tusoololepo ukutandika ukuombela Yeova. Twizile ituya sana ni nsansa lino ya tata yasenwike nu kutandika ukuya ni cikuuku kuli yonsi umu lupwa.

NATANDIKA UMULIMO WA NSITA YONSI

Lino cafisile icisanya umu 1950, nazanyilwe uku ukongano uwatangi Theocracy’s Increase uwayelile umu New York. Nakomeleziwe ukulondesya kuombako imilimo na yuze mu mulimo wakwe Yeova lino nuvwile vino aina na ya nkazi ukufuma umu mpanga zyuze aamazile isukulu lya Gilyadi yasukanga lino yayuzyanga pali vino vyacitiike. Natandike ukulondesya sana kuombako umulimo wa nsita yonsi. Lino naswilile sile uku ng’anda, nalenzile ukutandika upainiya. Akwi ofesi lya musambo ku Canada yandembiile kalata nu kunena ukuti cingazipa nga natala nabatiziwa. Nizile imbatiziwa pa 1 Okotoba, umu 1950. Lino papisile umwezi onga, natandike upainiya nupya yantumile mu kuombela uku Kapuskasing. Umusumba uu wayeliile ukutali sana na kuno ya lupwa yane ikalanga.

Umu 1951, iofesi lya musambo lyanenyile ya Nte aamanyile ululimi lwa Cifrench ukwelenganya pa kukukila ku citungu cino yalandanga Icifrench mu Quebec. Ku ncende iya kwalondekwanga sana ya kasimikila. Navwanganga Cifrench ni Cizungu, fwandi nazumile nupya yantumile uku Rouyn. Ntamanyile aliwensi kuuku. Cino nakweti sile a adelesi, wakwe vino indanda pa kutandika. Lelo ivintu vyazifile. Ya Marcel nani twizile ituya ya cuza asuma nupya naipakizye ukuombela umu Quebec pa myaka 4, nupya nizile inja painiya muiyele.

NAYA UKU GILYADI NUPYA NAPOKELELA IVINTU VINO NALONDESYANGA SANA

Lino nali umu Quebec, nuvwile ningo sana lino yangamile ukuya ukwi Sukulu lya Gilyadi ilyalenga 26 ilyali nu kuyela uku South Lansing, umu New York. Twamazile isukulu pa 12 Febuluwale umu 1956 nupya yantumile uku mpanga ino ndakai yakaama ukuti Ghana,b iyayela uku West Africa. Lino ntatala napita, nalondekwanga ukuswilila ku Canada kufikila mapepala yonsi akuyila ku Ghana yakumanile. Nenekelanga ukwikalako imilungu iili nanti itatu.

Nalolezile pa myezi 7 mu Toronto pakuti vipepa vifume. Pa myezi ii yonsi, nikalanga pali ya Cripps, nupya twizile itumanyana nu mwanao umukazyana, Sheila. Twatemwanine. Lino kwasiile sile panono ukuti ntaisye, icitupa ca kuyila ku Ghana cafumile. Sheila nani twapepiilepo nupya twapingwilepo ukuti impite kuno yantumile. Lelo twapingwilepo ukuti tumatwalilila ukulembelana makalata nu kulola ndi cakuti tungaca tutwalane uku nkoleelo. Citangwike ukupingulapo vivyo, lelo twilwike ukuti ali campomvu kucita.

Pa cisila ca kupita pa mwezi onga muli tileni, umu wato nu mu ndeke nasusile imfika mu musumba wa Accra, uku Ghana. Lyene yansonsile ukuya mwangalizi wa citungu. Fwandi nali nu kulapitana mu Ghana monsi nu mu mpanga iyayelile umupipi iya Ivory Coast (ino ndakai yakaama ukuti Côte d’Ivoire) nu mu Togoland (ino ndakai yakaama ukuti Togo). Insita izingi naomvyanga motoka wa pa musambo. Naipakizyanga sana ukutandalila aina.

Pa mpela ya mulungu nayanga ku maukongano ya viputulwa. Tutaakweti Vikuulwa Vya Ukongano. Fwandi aina yakuulanga sile cipaka ukuomvya ivimiti iyavimba misambo ya vimuti papela pakuti antu yacingililwe ku kasanya. Pa mulandu wakuti kutaali mafuliji, yasunganga inyama izipuma nu kuzikoma uwanda uno zikulondekwa pakuti yonsi atiyazanwako yangalya.

Kwayanga vimwi ivyakusekesya ivyacitikanga pa maukongano. Insita imwi lino umwina Herb Jenningsc misyonali munji walandanga ilyasi, ing’ombe izile ipuuka pano yaisungiile. Yatandike ukusimula umwi umba ukuya ku pulatifomu. Lino umwina Herb watiile ukulanda, ing’ombe yavulunganyiziwe. Lyene aina 4 akweti sana amaka yailemile nu kuiswilizya kuno yali, ala aali umwi umba yakuseka.

Mukasi ka mulungu, natambisyanga antu aikalanga mu mizi ya mupipi fyumu yakuti The New World Society in Action. Pa kucita vivyo, nanyepanga insalu itiswe ku vimuti viili pakuti apano antu yatambila. Antu aikalanga mu mizi yatemwanga sana. Aingi, wayanga ali muku wa kutandikilapo ukutamba fyumu. Yatoosile lino yatamvile kuno antu yakubatiziwa. Fyumu iya yavwile sana aingi ukumanya ukuti Swe Ya Nte Yakwe Yeova twalemana nu kuti twaya umu nsi yonsi

Pa cisila ca kuomba imyaka iili mu Africa, nuvwile ningo sana kuzanwa uku ukongano wa mpanga zingi umu musumba wa New York. Nali sana ni nsansa ukulolana na Sheila uwizile ukufuma uku Quebec kuno waombelanga upainiya uiyele. Twalembelananga makalata, lyene umuku uu wene twaloline nupya namuzizye ndi cakuti angatemwa tutwalane nupya wazumiile. Nalembiile Umwina Knorrd nu kumuzya ndi cakuti Sheila angazanwa ukwi Sukulu lya Gilyadi pakuti tukaombela pamwi ku Africa. Umwina Knorr wazumiile. Sheila wasusile afika ku Ghana. Twatwaline apa 3 Okotoba 1959 umu Accra. Twayuvwanga ukuti Yeova watupaalanga pa mulandu wa kukolezya Uwene wakwe umu umi witu.

TWAYA MU KUOMBELA KU CAMEROON

Umu 1961 yatutumile mu kuombela ku Cameroon. Aina yanenyile ukuti tupange iofesi lya musambo, fwandi nizile inja umupamviwe sana. Vino yampezile umulimo wa kwangalila imilimo umu mpanga ya cameroon, nalondekwanga ukusambilila ivingi. Lyene umu 1965, Sheila wizile akwata inda. Catutalile sana ukwelenganya ukuti twali nu kuya avyazi. Lelo lino twali nu luzango nupya ala tukupekanya ivya kuomba mulimo upya nu kuswilila ku Canada, kwizile ikucitika icintu cimwi iciipe.

Umwana wafwile ala atatala wavyalwa. Ya dokota yatunenyile ukuti umwana uwali nu kuvyalwa wali nu kuya umonsi. Pano vii vyacitiikile ipapita imyaka 50, lelo tutilila. Asi mulandu na vii ivyacitike ivyalenzile tuye sana nu ulanda, twatwalilile ukuombela uku mpanga yuze, umulimo uno twatemilwe sana.

Aina na ya nkazi umu Cameroon yayacuzyanga sana pa mulandu wakuti yataikanga umu vikanza vya miteekele. Ivintu vizile ivipisya sana lino kwali ukusala uwali nu kuya kateeka. Apa 13 Mei umu 1970, ivintu vino tutenekelanga vyacitike, Ya Nte Yakwe Yeova yayainzile. Uteeko waposile umusambo witu upya muno twikazile sile apa myezi 5. Umu mupipi nu mulungu onga, ya misyonali yonsi kumwi sile nani alino na ya Sheila yatuzinzile umu mpanga. Catutalile sana ukusya aina na ya nkazi, pano twayatemilwe sana nupya twasakamile pali vino vyali nu kuyacitikila.

Umu myezi 6 iyalondelilepo twikazile apa musambo wa mu France. Lino nali kuku natwalilile ukucita vyonsi vino ningakwanisya pakuti nasakamala aina aku Cameroon muli vino yalondekwa. Umu Dezemba umwaka kwene uwa, yatutumile ukuya umu kuombela uku musambo wa ku Nigeria, uwatandike nu kusakamala umulimo wa mu Cameroon. Aina na ya nkazi umu Nigeria yatupokelile ningo sana, nupya twaipakizye ukuombela kuku apa myaka iingi.

ICINTU ICATUTALILE UKUPINGULAPO

Umu 1973 twalondekwanga ukupingula pa cintu cimwi icatutalile sana. Ya Sheila yalwalanga sana. Lino twaile uku ukongano umu New York, ya Sheila yalwalisye nupya yanenyile ati: “Ntamakwanisya ukutwalilila ukuomba umulimo uno tukuomba. Intonta nupya indwala sana.” Twaombelanga pamwi na ya Sheila uku West Africa ukucila apa myaka 14. Nataizyanga sana pali vino yatwalilile ukuomba na ucisinka, nomba twalondekwanga ukusenuka muli vimwi. Pa cisila cakulanzyanya nu kupepelapo, twapingwilepo ukuswilila uku Canada kuno yali nu kusakamalwa ningo. Ukuta umulimo wa umisyonali nu mulimo wa nsita yonsi cali icintu cimwi icatutalile ukupingulapo.

Lino twaswilile uku Canada, ningile incito uku munji uwakazyanga imyotoka umu Toronto. Twasonkile ing’anda, twakazile imipando kuli yamwi nupya twakusile ukwaula ukukwata inkongole izili zyonsi. Twalondanga ukwangupaya uwikazi, nupya twataile ukuti wanda umwi tungaswilila umu umulimo wa nsita yonsi. Twazungwike lino twizile itumanya ukuti tungakwanisya ukuswilila umu mulimo wa nsita yonsi.

Natandike ukwazwilizyako ukukuula icikuulwa ca kulonganilamo maukongano cila cibelusi umu Norval mu Ontario. Lino papisile insita, natandike ukuomba ngu mwangalilzi wa cikuulwa ca ukongano. Ya Sheila yatandike ukuvwako ningo, nupya twelenginye ukuti yangakwanisya ukuomba umulimo uu upya. Fwandi umu Juni mu 1974 twatandike ukwikala apa cikuulwa ca ukongano. Twatemilwe sana ukutandika nupya umulimo wa nsita yonsi.

Icazifile icakuti ya Sheila yatandike ukuvwako ningo. Lino papisile imyaka iili, yatupeezile umulimo wa kutandalila ivilongano. Iciputulwa cino twaombelangamo cayelile umu Manitoba, icitungu icazuka sana. Lelo twaipakizyanga ukuya pamwi na ina na ya nkazi aali nu kutemwa. Twasambilile ukuti asi mulandu na kuno tukuombela, icacindama sana u kutwalilila ukuombela Yeova konsi kuno tuli.

NASAMBILILE ICINTU CIMWI CICINDAME SANA

Pa cisila ca kuomba umulimo wa kutandalila ivilongano pa myaka ingi, yatwamile ukuya mu kuombela pa Bethel ya ku Canada umu 1978. Patalengile, nasambilile icintu icicindame sana, lelo icalenzile nuvwe sana uyi. Napeezilwe ukulanda ilyasi ilyakweti iawala lyonga na hafu umu Cifrench apa kulongana ukuiyele umu Montreal. Ica ulanda icakuti catalile sana antu ukwika mano ukwi lyasi pano yatuvwikisyanga vino nalandanga, nupya umwina uwali muli Dipatimenti ya Mulimo wansunzile api lyasi lino nalanzile. Kulanda sile icisinka, nizile iniluka ukuti asi nene kalanda musuma sana. Lelo nafizilwe ukupokelela ukusunda. Tutalanzyanyizye ningo nu mwina nupya nasosile sana pano nelenganyanga ukuti watazile sile nupya atantaizye muli vino nacisile ningo. Naluvyanyizye ukukanapokelela ukusunda pa mulandu na vino umwina wansunzile alino na vino nelenganyanga pali aliwe.

Lino papisile amanda anono, umwi uwa muli Komiti ya musambo walanzile nani api lyasi lii. Nazumile ukuti naluvyanyizye ukukanauvwila ukusunda nupya nalenzile uwelelo. Lyene naile indanda nu mwina uwansunzile. Nupya wanjelezile. Ivyacitike vyansambilizye umulandu uno ukuicefya kwacindamila nupya ntalatala nilile. (Mapi. 16:18) Napepelapo pa miku iingi pa mulandu uu nupya nkalondesya ukulauvwila ukusunda.

Ndakai imbombela pa Bethel ya mu Canada ukucila pa myaka 40, nupya ukufuma umu 1985, nakwata isyuko ilya kuombela muli Komiti ya Musambo. Umu Febuluwale mu 2021 mamane Sheila wafwile. Nkayaluka sana, nupya nani nkalwalilila. Lelo umulimo wakwe Yeova walenga ukuti inje umupamviwe nupya nkaya ni nsansa icakuti ‘nsisakamala sana.’ (Kasa. 5:20) Nanti cakuti nakwatanga intazi zimwi, insansa zino nakwata zyavulizya ukucila intazi. Ukwika Yeova pa nkoleelo umu umi wane kwalenga ukuti injipakizye ukumuombela umu mulimo wa nsita yonsi pa myaka 70. Nkapepa ukuti aina na ya nkazi acance yatwalilila ukukolezya Yeova, pano nasininkizya ukuti nayo kwene yalaipakizya ivisuma ivikacitika ndi cakuti tukuombela sile Yeova.