Utumatulakiti Utupya Twapangwa Ningo Sana!
1. Uzye i mpapulo ci izyakuomvya umu mulimo wa kusimikila izya pangwa ningo sana?
1 Twapokelile utumatulakiti utupya apa kulongana kwa citungu ukwa mu 2013 ukwali nu mutwe wakuti ‘Izwi Lyakwe Leza Ali Cumi!’ Alino twapokelile na katulakiti na kauze akakaamwa ukuti Landwe lya Wene Na. 38, akaaya nu mutwe wa kuti “Uzye i cisinka afwe yangaya nu umi nupya?” Tonsi kwene utumatulakiti tuu 6 yatupanga umu mipangilwe iiyele isuma sana. Uzye i vyani ivyalenzile ukuti utumatulakiti kwene tuu tupangwe umu mipangilwe iiyele? Uzye tungaomvya uli pa kupeela antu utumatulakiti kwene tuu lino tuli umu mulimo wa kusimikila uwa ku ng’anda ni ng’anda?
2. U mulandu ci uno utumatulakiti twapangiilwe utuyiyele?
2 Umulandu uno utumatulakiti twapangilwe vii?: Pakuti umulimo wa ku ng’anda ni ng’anda uombwe ningo, ilingi tukacita ivintu vii 4: (1) U kuuzya iuzyo ukulingana ni myelenganyizizye ya muntu. (2) Ukuwelenga ilembelo. (3) Ukupeela umuntu ulupapulo lwa kuwelenga. (4) Ukusya iuzyo lya kwiza aasuka lyuze, nu kupanga mapekanyo ya kuswililako. Imipangilwe iiyele iya tumatulakiti kwene tuu, ikatwazwa ukulondela ivintu kwene vii 4 ukwaula intazi.
3. Uzye tungacita uli pa kusiila antu utumatulakiti utupya?
3 Ivya kucita pa kusiila antu: (1) Ndi mwalamukana nu muntu, mufwile ukumulanga amauzyo akusoololapo, nu kumuuzya vino akwelenganya pa mauzyo kwene yaa. (2) Piliuliini katulakiti, nu kulanzyanya amazwi yakuti “Vino Baibo Ikasambilizya Aevi.” Welengini ilembelo muli Baibo ndi cakuti pasi icingalesya ukucita vivyo. Ndi cakuti umuntu wino mukulanzyanya nawe ali ni nsita, lanzyanyini apa kamutwe akalondeliilepo apisika. (3) Peelini umuntu wiyo katulakiti, nu kumukomelezya ukuti akawelenge ivyeo ivyasyalako apa nsita yuze. (4) Lino mutatala mwasya umuntu wiyo, mulangini iuzyo lyakuti “Vwilini Mungati Uli?” nu kupanga mapekanyo yakuti mukalanzyanye vino Baibo ikaasuka iuzyo lilyo lino mulaswilila.
4. Uzye tungaomvya uli tumatulakiti utupya ndi twaswilila kuli wino twasimikiile?
4 Nanti lino mwaswilila kuli wino mwasiilile katulakiti kwene kaa, citaatala ukulanzyanya. Mungaomvya sile ilembelo ilili apiuzyo lino mwasondweliile nalyo ilyakuti “Uzye Vwilini Mungati Uli?”. Lino mutaatala mwafumapo, mulangini icikope cakwe bulosyuwa wakuti Ilyasi Lisuma, langini umuntu wiyo bulosyuwa ni lyasi lya muli bulosyuwa ilikaalanda sana pa vyeo vino katulakiti kano mwamusiilile kakaalandapo, nu kumupeela bulosyuwa wiyo. Ndi wazumila ukutola bulosyuwa, pangini amapekanyo yakuti lino mulaswililila mukalanzyanye muli bulosyuwa kwene wiyo. Ndi mwacita vivyo ala mwati-mutandika isambililo lya Baibo! Nanti ndi mutamusiilile bulosyuwa, mungamupeela katulakiti akapusiine na kano mwamusiilile nu kupekanya ukuti mukaswilile umu kulanzyanya nu muntu wiyo pali katulakiti kaako.
5. Uzye utumatulakiti tukatwazwa uli umu mulimo wa kusimikila?
5 Utumatulakiti twaomviwa umu mulimo witu uwa kusimikila ukuluta pa myaka 130. Nanti icakuti utumatulakiti kwene tuu tukapusana-pusana imilolekele alino ni mipangilwe, tukaazwa sana ukuomba ningo umu mulimo wa kusimikila. Lekini tutwalilile ukuomvya utumatulakiti kwene tuu utwapangwa ningo sana pakuti twalukusalanganya Izwi Lyakwe Leza umu nsi yonsi.—Mapi. 15:7a.