Vino Tungatandika Ukulanzyanya na Antu Ukuomvya Utupepala Twilandwe

Kufuma umu Januwale 2018, pa nkupo ya Kabuku Aka Kuomvya mu Kulongana pakaya mazwi aakutwazwa ukusimikila. Tukakomeleziwa ukwika mano uku kulanzyanya na antu kucila ukuyapeela sile ulupapulo. Pa kwazwa yakasimikila ivya kusenula imilanzyanyizizye, kwaya mavidyo aakalangilila ivya kutandika ukulanzyanya ukuomvya sile Baibo. Uzye cii, cikupiliula ukuti tutalinzile ukupeela antu impapulo lino tukusimikila ku ng’anda ni ng’anda? Awe foo! Ukuomvya utupepala twilandwe, ingaya inzila isuma iya kutandika ukulanzyanya na antu. Tungaomvya inzila zino iyatwikila apisika lino tukulanzyanya na antu ukuomvya akapepala ki landwe akali konsi:

1. Mwauzya iuzyo ilikweti amasuko akuisoolwela api ifwa ilyakutandikilapo.

2. Mwaomvya ilembelo ilyaya api ifwa lyakwe ciili papela. Ndi cakuti kucili insita, welengini nu kulanzyanya ivyeo vimwi mu kapepala ki landwe.

3. Peelini wino mu kusimikilako akapepala nu kumukomelezya uku kawelenga konsi ndi cakuti angakwanisya.

4. Lino mutatala mwafumapo, langini wino mu kusimikilako iuzyo lyakuti: “Vwilini Mungati Uli”? Lyene mupekanye ukuti mukalanzyanye vino Baibo ikaasuka umuku ulalondelelapo.

Lino mwaswililako, lanzyanyini iuzyo lino mwamusiilile alino mu musiile iuzyo lino mulalanzyanya insita yuze. Mungasoolola iuzyo pa webusaiti itu nanti ukumulanga ulupapulo luno iyalangilila uku mpela ya kapepala. Pa nsita ilinge, mungamupeela kabuku kakuti: Ilyasi Lisuma Lino Leza Akutuneena! nanti kumupeela ibuku lyuze ilyaya pa Viombelo Vino Tukaomvya pa Kusambilizya.