Ivyakuomvya Ivyeo Vya Kutulangilila Vino Tungasimikila

Ukufuma umu Januwale 2018, apa nkupo ya Kabuku Kakuomvya pa Kulongana kwakuti Swe Ina Klistu nu Mulimo Witu pakaya ivyeo vya kutulangilila vino tungasimikila. Mungaomvya uli ivyeo vii?

Lino Mukulanda Malyasi Akulangilila Ivya Kusimikila: Mulinzile ukuomvya iuzyo, ilembelo, ni iuzyo lya kulanzanyapo umuku ulalondelelapo ivikaya umu ivyeo vya kutulangilila vino tungasimikila. Nomba, cisikupiliula ukuti mulinzile ukuomvya amazwi yonsi vivi kwene vino yali muli vidyo. Mungaomvya misimikilile yuze, amazwi ya kutandikilapo yauze, milanzyanyizizye yuze, nanti vyuze sile. Mungapeela na wino mukusimililako ulupapulo lumwi ulwaya pa Viombelo Vino Tukaomvya pa Kusambilizya, nanti yatamuneenyile ukucita vivyo.

Lino Muli Umu Mulimo wa Kusimikila: Ivyeo vyakuomvya pa kusimikila vyaelako sile uku kutwavwa vino tungasimikila. Ndi cakuti wino mukusimikilako akulondesya ukuvwa, mungatwalilila ukulanzyanya nawe, limwi mungaomvya ni vyeo vyakutwavwa ukuswilila ivyaya mu kabuku. Mungasenulako ivyeo vyakuomvya pa kusimikila ivyaya pa kabuku nanti kuomvya sile vyuze. Uzye ivyeo vya mu mwezi wafumako nanti ilembelo lyuze sile, vingaomba ningo umu cifulo cinu? Uzye antu aku ncende ino mukaikalako yatemwa sana ukulanda pa malyasi akucitika uku ncende kwene iyo? Usi mulandu ni nzila ino mungaomvyezyamo ivyeo vyakutwavwa ukusimikila, uyo winu ulinzile ukuya u kucita ‘vyonsi pa mulandu wi landwe, pakuti mungakumako ku kupolelelwa ukwaya umwi landwe.’—1 Kol. 9:22, 23.