Vino Mungaomvya Amazwi Aakopelwa Limwi
1. Ukulunda pa mpapulo izikapulintwa, i ciombelo ci na cuze cino twakwata icikatwavwa sana?
1 Antu aingi yakauvwa ningo sana ukuomvya jw.org ku kuwelengelako amazwi asuma nupya aacumi. (Kasa. 12:10) Nomba, uzye mwatala mwaomvyapo amazwi aakopelwa limwi? Amazwi yayo yalenga ukuti cangupale sana ukukutikako uku vyeo ivyaya pa webusaiti itu. Uzye amazwi aakopelwa limwi yangatwavwa uli?
2. Uzye tungaomvya uli amazwi aakopelwa limwi lino tuli swenga nanti lino tuli pa kupepa kwa lupwa?
2 Tungakutikako Swenga Nanti Lino Tuli pa Kupepa Kwa Lupwa: Tungaomvya ningo insita ndi cakuti tukukutikako ku mazwi aakopelwa limwi amuli Baibo, muli yamagazini nanti amu lupapulo luze lino tuli pa lwendo nanti lino tukuomba imilimo iya pa ng’anda. (Efes. 5:15, 16) Tungakutikako amazwi aakopelwa limwi apusane-pusane lino tuli pa kupepa kwa lupwa, nupya tulinzile ukutoola ulupapulo lwitu ale tukulondelamo lino amazwi yayo yakuwelengwa. Ukukutikako uku mazwi akopelwa limwi lino tukuisambilizya swenga, kungatwavwa sana maka-maka ndi cakuti tukulonda ukuti twawelenga ningo nanti ndi cakuti tukusambilila ululimi luze.
3. Uzye umu cifulo cino tukaombelamo, aaweni akauvwa ningo sana ukukutika uku mazwi aakopelwa limwi?
3 Tungayaomvya Lino Tukusimikila: Antu aya umu cifulo cino tukaombelamo aakuti yatakwata insita iya kuwelenga, limwi yangatemwa sana ukukutika uku mazwi aakopelwa limwi. Nanti limwi cingazipa sana ukuvwisyako antu aakalanda ululimi luze nupya aakatemwa sana ndi cakuti yuvwa ilandwe lya Wene ‘mu lulimi lwao.’ (Mili. 2:6-8) Umu ncende zimwi, antu yatemwa sana ukukutika uku malyasi. Vikwene ali vino caya nu ku mpanga ya Hmong, antu yatemwa sana ukusimikila ana pali vino umi wa vikolwe vyao wali, nupya ana yakakutikisya sana lino yakuvwa vino yakuyasimikila. Umu Africa namo kwene antu aingi sana yakauvwa ningo ndi cakuti yakuyasimikilako malyasi lino yakuyasambilizya.
4. A mauzyo ci yano tungelenganyapo pakuti twaavwe antu aaya umu cifulo cino tukasimikilamo?
4 Uzye umu cifulo cino mukaombelamo, cingaya sile ningo ukuvwisyako umuntu amazwi aakopelwa limwi umu lulimi lwakwe? Uzye kungaya umwi angatemwa ukukutika uku mazwi aakopelwa limwi ndi cakuti twamutumila pa Intaneti ukuomvya adelesi yakwe? Uzye tungakopolwela amazwi aamu lupapulo pa CD nu kupeela umuntu akulondesya ukukutikako, alino limwi nu kumupeelako ulupapulo umufumile amazwi kwene yayo? Ndi cakuti lino tukusimikila twatumila umuntu ibuku, kabuku, magazini nanti kapepala kilandwe ukuomvya intaneti nanti kaombelo kali konsi, tulinzile ukulemba pali lipoti ukuti itupeela umuntu ulupapulo. Cino amazwi aakopelwa limwi yapangilwa a pakuti twayaomvya lino tukuisambilizya swenga alino na pakuti twakomela imbezu zya Wene.—1 Kol. 3:6.