Mwasambilizya Antu Icumi

Kutandika umu Sepetemba, mu kabuku kakuomvya pa kulongana ukwakuti Swe Ina Klistu nu Mulimo Witu mumayanga amazwi apya aakutulangilila ivya kusimikila umu cipande icakuti “Mwasambilizya Antu Icumi.” Cino tulalondesya ukucita, u kulanda icumi ca muli Baibo apa masambililo akutandikilako, ukuomvya iuzyo ni lembelo.

Ndi cakuti twazana umuntu akulondesya ukusambilia Baibo, tungalandako ivyeo ivyakuti aalondesya ukuti tukaswilileko, limwi tungamusiila kapepala kamwi, lupapulo nanti ukumutambisyako kavidyo kamwi akaya pa jw.org. Tulinzile ukuswililako zuwa pakuti tukatwalilile ukulanzyanya nawe. Ivyeo ivilaaya umu mazwi yaa alino na malyasi yano aasambi yalaalanda vilafuma umu vipande ivyaya umwi buku lyakuti Uzye Baibo Ikatusambilizya Vyani? Umwi buku kwene lii, tungazana mauzyo na yauze na malembelo yano tungaya tukaomvye ndi twaswililako kuli wino twasimikiile nanti uku kutungulula isambililo ukuomvya sile Baibo itupu.

Kwaya sile inzila yonga ikatungulula uku umi. (Mate. 7:13, 14) Pa mulandu wakuti tukasimikila antu aya umu mipepele ipusane-pusane nupya afuma umu mpanga izipusane-pusane, tulinzile ukuyanena icumi ca muli Baibo icingayafika pa mwenzo. (1 Tim. 2:4) Ndi cakuti twamanyikisya amalyasi apusane-pusane aya muli Baibo nu kumanya ivya kusimikila, ‘tulasambilizya ningo ilandwe lya cumi,’ tulaya nu luzango cuze, nupya tulauvwa ningo sana ukusambilizya yauze icumi.—2 Tim. 2:15.