Vintu Vino Mutalinzile Ukucita Lino Mukutungulula Isambililo

Kulandapo Sana: Mutaalola ukuti mufwile ukulondolola vyonsi. Yesu waomvyanga amauzyo pakuti avwe antu ukwelenganyapo alino nu kuvwikisya icisinka icikulandwapo. (Mate. 17:24-27) Mauzyo yakalenga umusambi ukulunduluka muli vino akusambilila nupya yakalenga mumanye vino wamanya alino na vino wazumila. (be-CW 253 mapa. 3-4) Ndi muzya iuzyo mulinzile ukuteekela nupya mufwile ukulolela pakuti umusambi aasuke. Ndi cakuti umusambi ataswike icasuko ca mpomvu, mutalinzile ukumunena casuko, mufwile ukumuzya iuzyo na lyuze ilingalenga ukuti aasuke casuko cilungame. (be-CW 238 mapa. 1-2) Mwatekela pa kulanda pakuti umusambi auvwikisya vino akusambilila—be-CW 230 pala. 4.

Kuvuzya Ivyeo: Mutaalanda ivyeo vyonsi kwene vino mwamanya api lyasi lino mukusambililapo. (Yoa. 16:12) Mwaika sile amano uku cisinka cikalamba icili muli palagalafu. (be-CW 226 pala. 4-5) Ukulanda sana ivyeo ivingi nanti cakuti i visuma, kungalenga ukuti ivisinka vikalamba vituuvwika. (be-CW 235 pala. 3) Ndi cakuti umusambi uuvwikisya icisinka cikalamba, mufwile ukuya muli palagalafu yuze.

Kumala Sile Ivyeo: Cino tukalondesya u kufika umusambi pa mwenzo, asi ukumala sile vyeo ivya kusambilila. (Luka 24:32) Mwaomvya amaka aaya umwi Zwi Lyakwe Leza, mungacita vivyo ndi cakuti mukwikako sana amano ku malembelo akutungilila isambililo. (2 Kol. 10:4; Ayeb. 4:12; be-CW 144 mapa. 1-3) Mwaomvya ivilangililo ivyangupale. (be-CW 245 mapa. 2-4) Mwaelenganya pa wavya uno umusambi wakwata na vino wazumilamo pakuti mumwazwe ningo lino mukumusambilizya. Mwamuzya mauzyo wakwe yaa: “Uzye ukwelenganyapo uli pali vino ukusambilila?” “Uzye ivyeo vii vikutusambilizya vyani pali Yeova?” “Uzye ukulola ukuti ivyeo vino tukusambilila vingakwazwa uli nga wavilondela?”—be-CW 238 mapa. 3-5; 259 pala. 1