Vino Kaumba Akatusokolwela Malayo Yakwe

Lino Kaumba waumvile antu, walandanga nayo ukuomvya angeli na ya kasesema. Nupya wapingwilepo ukulemba mazwi na malayo yakwe. Leza walaya ukuti tulaya ni nsansa uku nkoleelo. Uzye lyene, aekwi kuno tungazana vino Leza watulaya ndakai?

Amazwi yano Leza akatunena yalembwa umu Malembelo ya Muzilo. (2 Timoti 3:16) Uzye Leza waomvizye uli ya kasesema ukulemba amazwi yakwe? (2 Petulo 1:21) Leza wisile amelenganyo yakwe muli ya kalemba, lyene nayo yalemvile amelenganyo yayo. Vikwene avino caya na ndakai. Lino aakacita uculuzi wanena muomvi wakwe ukumulembela amazwi yamwi, lino swemo twawelenga amazwi yayo, tulati aliwe atalemba. Vivyo kwene avino caya na kuli Leza, nanti cakuti wanenyile antu ukulemba amazwi yakwe, ali Kalemba wa Mazwi ya Muzilo.

IZWI LYAKWE LEZA LYASALANGANA UMU NSI YONSI

Izwi lyakwe Leza lyacindama sana nupya akalonda antu yaliwelenga nu kulyuvwikisya. Ndakai “landwe lisuma lya manda pe” likasimikilwa ku antu “amisango yonsi, mitundu, ni ndimi ni nko zyonsi.” (Umbwilo 14:6) Ibuku lya Malembelo ya Muzilo akuno lyaya lyonsi nanti mu ciputulwa umu ndimi kucila pali 3,000 ukuluta ibuku lili lyonsi pano nsi.