I Cani Cingatwazwa Pakuti Tukakwate Umi Usuma Uku Nkoleelo?

Wakwe vino twasambilila umu vipande ivyafumako, antu yakaezya inzila zipusanepusane pakuti yakaye nu umi usuma uku nkoleelo, wakwe, kuomvya ivya mipasi, masambililo, ivyuma alino nu kuya antu asuma. Lelo ukucita vivyo kwaya kwati umuntu aataponga kuno akuya alino waya uzya umuze ukuti amulange ukwa kuya lino nawe kwene ataponga. Uzye cii cikusenula ukuti kutaya ivyeo ivitailwe ivingatwavwa pakuti tukaye nu umi usuma ku nkoleelo? Akuno vyaya.

IVYEO VINO TUNGATAILA SANA

Ilingi nga tukulonda ukupingula pali vimwi tukauzyako umuntu uwikolo pali sweswe nupya uwamanya ivintu ukutucila. Umu nzila ili imwi kwene nga tukulonda utunguluzi utailwe pakuti tukaye nu umi usuma uku nkoleelo, tulinzile ukuzya kuli wino watuluta sana nupya uwakwatisya amano ukutucila. Utunguluzi wa muntu wiyo tukauzana umu malembo ya muzilo aalemvilwe umupiipi ni myaka 3,500 iyatipita. Ibuku muno malembo ya muzilo yalembwa likaamwa ukuti Baibo.

U mulandu ci uno tungatailila vino Baibo ikalanda? Pano umwineco wakwe Baibo u wikolo sana ukutucila nupya wakwatisya amano pa uumbo onsi, walondololwa ukuti “uwaliko ku katalili” nu kuti u waliko manda pe. (Danieli 7:9; Masamu 90:2) Nupya “uwaumvile amayulu, wene aali Leza uwetetwile nu kupanga insi.” (Ezaya 45:18) Watuneena ukuti izina lyakwe a Yeova.—Masamu 83:18.

Pa mulandu wakuti Baibo yafuma kuli Kaumba wa yantu yonsi, isilanda ukuti antu yamwi yacindama ukucila antu yauze. Ukupanda mano ukwayamo kukaomba lyonsi nupya kukaazwa antu amu nsi yonsi sile. Yaya umu ndimi izingi nupya aali ibuku ilyasalanganiziwa umu nsi yonsi ukucila mabuku yauze.a Fwandi antu umu nsi yonsi yangabelenga nu kutungululwa na Baibo nupya vikwene aali vino Baibo iineco kwene ikalanda:

“Leza atakwata kapatulula lelo umu nko zyonsi umuntu aakamutiina nu kucita ivisuma akapokelelwa kuli aliwe.”—MILIMO 10:34, 35.

Wakwe vino umuvyazi uwika amano uku yana yakwe akayatungulula, avino na Yeova Leza Tata witu uwaya nu kutemwa akatwavwa ukupitila umwi Izwi lyakwe Baibo. (2 Timoti 3:16) Pa mulandu wakuti u watuumvile nupya wamanya ivingatuzipila umu umi, tungataila ivyaya umwi Izwi lyakwe.

UTUNGULUZI UNO TUNGATAILA

Tungataila vino Baibo ikalanda pali vino vilacitika uku nkoleelo, pano imyaka 2,000 iyatipitapo, yasowile ivyali nu kulacitika mu manda yakusyalikizya vino tukuilolela ndakai.

VINO BAIBO YASOWILE UKUTI VILACITIKA

“Uluko lulakatukila uluko luze nu wene ulakatukila uwene uze. Kulaya vilundumusi ivikalamba, nupya umu ncende zimwi zimwi mulaya ivipowe ni vikuko.”—LUKA 21:10, 11.

VINO BAIBO YASOWILE UKUTI AVINO ANTU YALAYA

“Umu manda akusyalikizya mulaya insita izitale sana. Pano antu yalaitemwa, yalatemwa impiya, yalaya na mataki, yalaitutumula, amiponto, aasiuvwila avyazi yao, aasitaizya, aataya ni cisinka, aataya nu kutemwa, aasizumilizyanya na auze, aalwambo, aasiyikaanya, aankalwe, aatatemwa usuma, aakafutuka auze, aasilonda ukuuvwa uku yauze, aacilumba, aatemwa ivya kuizanzya ukucila ukutemwa Leza.”—2 TIMOTI 3:1-4.

U mulandu ci uno Baibo yasoweliile ivya cumi pali vino vikucitika ndakai? Ukwaula nu kutwisika namwe kwene mungazumila vino Leung uwa ku Hong Kong walanzile, watiile: “Masesemo yaa amuli Baibo yalemvilwe mpiti sana, citanga cicitike ukuti umuntunze aliwe asowele ivintu vii. Baibo ifwile yafuma kuli umwi uwakwata sana mano ukutucila.”

Muli Baibo mwaya masesemo aingi sana afikiliziwa.b Vii vikalenga tusininkizye ukuti umu cumi Baibo Izwi Lyakwe Leza. Yeova walanda wati: “Nene indi Leza, nene nenga mpo nupya kutaya na muze uwalingana nani ukutandika sile na pa mpiti nemo nkavwanga calimwi ivili nu kucitika.” (Ezaya 46:9, 10) Fwandi vikwene ivingalenga mutaile sana vino Baibo ikalanda pali vino vilacitika uku nkoleelo.

UTUNGULUZI UULATWALILILA UKUMWAZWA AMANDA PE

Ukulondela utunguluzi uwaya mu Malembo ya muzilo kungamwazwa. Elenganyini pali vii ivyalondelelapo:

VINO BAIBO IKALANDA PA MPIYA NU KUOMBA

“Cingaziipa kukwata tunono ukwaula masakamika, kuluta kuivunoola kwaula muzano umukwezya kuzinganya umuza.”—KASAMBILIZYA 4:6.

VINO MUNGAYA NI NSANSA MU LUPWA

“Lelo cila muntu alinzile ukutemwa umuci wakwe wakwe vino waitemwa; umuci nawe alinzile ukucindika sana iya.” —EFESO 5:33.

VYAKUVWANA NA ANTU YAUZE

“Mutasoka sana, icakuti ukusoka ikulenga imucita ni viipe.”—MASAMU 37:8, NWT.

Kulondela vino Baibo ikalanda kungamwavwa ndakai nupya kungalenga umi winu ukaziipe uku nkoleelo. Muli Baibo mwaya ivintu visuma vino Leza watulaya ukuti vilacitika uku nkoleelo, wakwe:

MUTENDE NU KUCINGILILWA

‘Lelo yaayo aicefya yalapyana impanga nu kuya nu mutende umalilike.’—MASAMU 37:11.

YONSI YALAKWATA UMWA KWIKALA NI VYAKULYA IVINGI

“Yalaakuula amang’anda ya kwikala mwenemo, yalaalima ni vyalo vya matingi nu kulya iviseekwa vya mwenemo.”—EZAYA 65:21.

KUTALAYA UKULWALA NI IMFWA

“Kutalaya imfwa, kutalaya ukuloosya nanti ukulila nanti ukuvwa ukuwaika.”—KUSOKOLOLA 21:4.

I vyani vino mulinzile ukucita pakuti mukaipakizye ivintu vii? Lolini cipande icilondeliilepo.

a Pakuti mumanye vino Baibo ikasenulwa nu kusalanganiziwa, yangini pa www.jw.org alino mulole apakuti IVISAMBILIZYO VYA MULI BAIBO> IVYACITIIKE MPITI NA BAIBO.

b Nga mukulonda ukumanyilapo na vyuze, mubelenge icipande 9 icaya umwi buku lyakuti The Bible—God’s Word or Man’s? Ilyapangwa na ya Nte Yakwe Yeova. Nupya lyaya na pa www.jw.org. Mulole pakuti LAIBULALE > MABUKU NU TUMABUKU UTUNONO.