Tungataila Vino Baibo Ikalanda pa Cisuma ni Ciipe:

Tutanga tusininkizye ukuti ivilafuma muli vino twapingulapo vilaziipa ndi cakuti twasintilila sile pa mano ya antu. Baibo ikalanda umulandu uno cayela vivyo. Ikatwazwa ukumanya icisuma ni ciipe nupya nga twalondela vino ikalanda tukaya ni nsansa.

TUKALONDEKWA UTUNGULUZI UKUFUMA KULI YEOVA

Baibo ikalondondolola ukuti, Yeovaa Leza watuumvile ukuti atutungulula asi ukulaitungulula sweineco. (Yelemiya 10:23) Ali mulandu uno watupeela masunde aya muli Baibo. Watemwa antu nupya akalonda twapingula ningo pa vintu pakuti twaya acingililwe. (Malango 5:29; 1 Yoani 4:8) Nupya pa mulandu wakuti uwatuumvile wamanya vino tulinzile ukucita pakuti ivintu vyatuzipila. (Masamu 100:3; 104:24) Nomba, Leza asitupatikizya ukulondela amasunde yakwe.

Yeova wapeezile Adamu na Eva vyonsi vino yalondekwanga pakuti yaye ni nsansa zya cumi. (Utandiko 1:28, 29; 2:8, 15) Nupya wayapezile na masunde yano wenekelanga ukuti yali nu kulalondela. Nanti ciye vivyo, wayapeezile untungwa wakuisolwela ndi cakuti yali nu ukulondela nanti foo. (Utandiko 2:9, 16, 17) Caulanda icakuti, yasoolwilepo ukukana ukuvwila Leza. (Utandiko 3:6) Ivyani vyafumilemo? Uzye antu yangaya ni nsansa ndi cakuti yakucita vino aeneco yakulola ukuti ali visuma? Awe. Ivyacitike mpiti vikalangilila ukuti ukusuula masunde yakwe Yeova kukalenga umuntu ukukanaya ni nsansa .—Kasambilizya 8:9.

Muli Baibo mwaya ukupanda mano ukungatwazwa ukupingula ningo pa vintu asi mulandu na kuno tukaikala nanti ivikatucitikkila umu lupwa. (2 Timoti 3:16, 17; Lolini ka mbokosi kakuti “Ibuku Lya Antu Yonsi .”) Lolini vino Baibo ikatwazwa.

Sambililini ivingi pa mulandu uno Baibo ikaamilwa ukuti “izwi lyakwe Leza.”—1 Tesalonika 2:13. Tambini yakuti Uzye Amazwi Aaya Muli Baibo Akwe Weni? pa jw.org.

MULANDU UNO YAMWI YAKAELENGANYA UKUTI BAIBO ITANGA IYAZWE

Yamwi yakalanda ukuti ukusunda ukwa muli Baibo kusiomba. Ivili apisika ali vimwi vino antu yakalanda.

Vino antu yakalanda: “Vino Baibo ikalanda visiuvwana.”

Cisinka: Amalyasi yamwi akaloleka kwati yasiuvwana, tungayuvwikisya ndi cakuti twika amano uku cikulandwapo, ivyacitikanga pa nsita iyo na vino ivintu vyali, vino kalemba welenganyanga, na pali vyuze.

Pakuti mulole vino vii vingamwazwa, Belengini cipande cikati “Uzye muli Baibo mwaya vimwi ivisiuvwana?” (mu ciyemba ni ciswahili) pa jw.org.

Vino antu yakalanda: “Antu akalanda ukuti yakalondela vino Baibo ikalanda yakacita iviipe, fwandi Baibo isiazwa ukupingulapo ningo.”

Cisinka: Tutalinzile ukulanda iviipe pali Baibo pa mulandu na vino antu akalanda ukuti yakalondela Baibo yakacita. Casowilwe ukuti antu aingi kumwi ni ntunguluzi zya mapepo izikalanda ukuti zikalondela vino Baibo ikalanda zilacita ivipusane na vino ikalanda. Nu kuti pa mulandu vii “icumi cilaapontelwa.”— 2 Petulo 2:1, 2.

Pakuti mulole vino intunguluzi zya mapepo zisilondela vino Baibo ikalanda, belengini cipande icikweti umutwe wakuti, “Is Religion Just Another Big Business?” Pa jw.org.

Vino antu yakalanda: “Antu akalondela vino Baibo ikalanda yatacindika antu asilondela vino ikalanda.”

Cisinka: Baibo ikatukomelezya ukuya nu mucinzi uku antu. Isizumilizya. . .

ukuilola ukuti wacila yauze.— Filipi 2:3.
Kukanacindika antu akwata intambi nanti ivizumilo vyuze.— 2 Petulo 2:1, 2.
Ukupatikizya antu ukuzumila muli vino twazumilamo.— Mateo 10:14.

Baibo ikalangilila ukuti Yeova waya ni cikuuku nu mulinganya uku antu yonsi nu kuti akalonda naswe kwene twacita vivyo kwene.— Loma 9:14.

Pakuti mumanyilepo na vyuze pi lyasi lii, belengini icipande icikweti umutwe wakuti “Tolerance—How the Bible Can Help” pa jw.org.

BAIBO IKATUNENA VINO YEOVA AKALONDA TWACITA

Baibo ikatulondolwela vino Yeova akaomba na antu ukufuma sile na pa kutandika. Ivyayamo vikatwazwa ukumanya vino Yeova akalola icisuma ni ciipe. (Masamu 19:7, 11) Tukasambilila pa visinte ivikatwazwa ukupingula ningo pa vintu cila wanda.

Wakwe, elenganyini pa kupanda mano uku kazanwa pa Mapinda 13:20 apakati: “Wino akapita nu wa mano nawe kwene alaya uwa mano, lelo wino akacina na awelewele, alacula wakwe cimwi.” Na ndakai kwene icisinte cii cikaomba. Muli Baibo mwaya ivisinte ivingi ivicindame ivingatwazwa.—Lolini kambokosi kakuti “Ukupanda Mano Ukwaya Muli Baibo Kungatwazwa na Ndakai Kwene.”

Limwi mungayuzya ukuti, ‘Uzye ningasininkizya uli ukuti ivisinte vya muli Baibo vikaomba na ndakai kwene?’ Icipande icalondelelapo cikulanda pa vintu vimwi muno Baibo ikatwazwa ndakai.

a Yeova ali zina lyakwe Leza.—Masamu 83:18.

UKUPANDA MANO UKWAYA MULI BAIBO KUNGATWAZWA NA NDAKAI KWENE

Nanti cakuti Baibo yalemvilwe imyaka 2,000 uku cisila, na ndakai kwene icili ikaomba. Na ndakai kwene antu yakalonda ukuya ni nsansa nu umi usuma. (Kasambilizya 1:9) Ukusunda ukwaya muli Baibo kungazwa antu ukuya ni nsansa nu umi usuma.

Ucisinka

“Tukalonda ukuya aacisinka umu vintu vyonsi.”—Aebele 13:18.
“Lekini aakaiya ate ukwiya; lelo aombesya.”—Efeso 4:28.

Vino Mungacita Pakuti Mwauvwana na Antu

“Lekini cila muntu ataalonda ivingamuzipila, lelo aalonda ivingazipila umuntu muze.” —1 Kolinto 10:24.
“Twalililini kuteekelelana nu kuitemelwa ukwelelana.”—Kolose 3:13.

Vino Mungacita Lino Mukupingula pa Vintu

“Umuntu iciwelewele wene akataila muli vyonsi kwene.”—Mapinda 14:15.
“Umuntu wamano akacevya uzanzo ungamuzana nu kuutuka autuka, lelo iciwelewele cene cikaitwala sile umu mazanzo.”—Mapinda 22:3.