Mulinzile Ukusoololapo Cisuma ni Ciipe
Vino tukasoololapo ukucita ndakai vingalenga tuce tuye ni nsansa nanti foo. Nupya Yeova wamanya vivyo. Ali mulandu uno akalonda twacita ivintu ukulingana na vino akalonda.
Yeova akalonda twaipakizya umutende alino ni nsansa.
“Nene indi Yawe, Leza winu, wiyo akamusambilizya vyakuti vyamuzipila, kuti ivintu vimuzipile. Nkamutungulula umu nzila ino mulinzile kupita mwenemo. Mwemo ndi cali cakuti mwasumbisya amano ku masunde yane, ulongo lwinu lungaya wa luzi ulukapita lyonsi sile. Nu kucimvya kwinu kungaya wa mayimbi akaipumola ku cituntu cakwe yemba.”—Ezaya 48:17, 18.
Pa mulandu wakuti u watuumvile wamanya vino tulinzile ukucita pakuti ivintu vituzipile. Akalonda twacita vino akatunena pano alino ivintu vingatuzipila. Ndi cakuti tukulondela masunde yano watupeela tutalatwisika ndi cakuti vino itupingulapo ukucita vili ningo nanti foo. Lyonsi tulapingulapo ukucita ivisuma ivingalenga tuye nu mutende alino ni nsansa.
Yeova asilonda twacita vino tutanga tukwanisye.
“Masunde yano nkumupeela ilelo yasi yatale nupya yasi ukutali namwe.”—Malango 30:11.
Pakuti twacita ivintu ukulinga na vino Yeova akalonda limwi tungalondekwa ukusenuka muli vino tukaelenganya na vino tukacita. Nomba Yeova asilonda twacita ivintu vino tutangatukwanisye. Pa mulandu wakuti uwatuumba wamanya vino tungakwanisya ukucita. Nupya lino tukuya tukumumanya tulalola ukuti “masunde yakwe yatatala.”—1 Yoani 5:3.
Yeova walaya ukwazwa yayo akalonda ukulacita ivintu ukulingana na vino akalonda.
“Pano nene, ne Yeova Leza winu, namamulemanga ukwi kasa ili lunji, ali cino fwandi nkumunena ukuti, ‘Mutatiina. Ndamwazwa.’”—Ezaya 41:13.
Tungakwanisya ukulacita ivintu ukulingana na vino Yeova akalonda pano angatwazwa. Angatwazwa ukuomvya izwi lyakwe Baibo ilikatukomelezya nu kutupeela upaalilo.
Antu aingi umu nsi yonsi yazana ukuti ukucita vino Baibo ikalanda kwalenga ivintu ukuyazipila. Cingazipa sana ndi cakuti mwasambilila ukupanda mano ukusuma ukwaya muli Baibo. Mungatandikilapo nu kusambilila masambililo aya umu kabuku kakuti mungaya ni nsansa manda pe! Uwila sile, akaya pa jw.org. Mwaya masambililo yaa:
Uzye Baibo Ingamwazwa Uli?
Baibo Yalaya Ukuti Ivintu Vilazipa Uku Nkoleelo
Uzye Mungataila Ivyaya Muli Baibo?
Lino mukusambilila Baibo mulalola ukuti ivyeo ivyayamo vicili vikaomba na ndakai kwene, pano amazwi ayamo “yaya amuyayaya, yapilwe umu ulungami nupya acumi.” (Masamu 111:8) Ukulondela ukusunda ukwaya muli Baibo ali cintu icisuma cino tungacita. Nomba Yeova atalatupatikizya ukucita vivyo. (Malango 30:19, 20; Yoswa 24:15) Swensi kwene tulinzile ukuisolwela.