VINO TUNGACIMVYA ULUPATO

3 | Mutaya Nu Lupato

Vino Baibo Ikasambilizya

“Piliukini ukupitila umu kusenula imyelenganyizizye inu pakuti musininkizye vino Leza akalonda, ivisuma, ivimalilike nupya ivikamuzanzya.” —LOMA 12:2.

Vino Cikapiliula:

Leza akaika amano kuli vino tukaelenganyapo. (Yelemiya 17:10) Kwaya na vyuze vino tulinzile ukucita ukulunda pa kukanalanda nanti ukucita ivintu ivingalanga ukuti twaya nu lupato. Lupato lukatandikila umu melenganyo nu mu mwenzo wa muntu. Fwandi, tulinzile ukuleka ukwelenganya apa vintu ivingalenga tutandike ukuya nu lupato. Nga twacita vivyo ali lino ‘tungapiliuka’ nu kuta ukuya nu lupato.

Vino Mungacita:

Mwaelenganya sana pali vino mukaelenganya nu kuyuvwa pa yantu yauze, sana sana yano mwapusana umutundu nanti impanga. Mwayuzya ukuti: ‘Uzye nkayalola uli? Uzye nkayalola vivyo pa mulandu na vino naimanyila nemwineco kwene pali aliyo? Nanti limwi a pa mulandu na kapatulula? Mutabelenga nanti ukutamba ivintu pa intaneti, na mafyumu, nanti sile ivya kuizanzya umwaya ulupato nu unkalwe.

Izwi Lyakwe Leza lingatwazwa ukucimvya ulupato umu melenganyo nu mu mwenzo witu.

Kwene citangupala ukuceeceta ningo amelenganyo itu na vino tukayuvwa. Lelo Izwi Lyakwe Leza lingatwazwa “ukumanya amelenganyo na mapange ya mu mwenzo.” (Aebele 4:12) Fwandi twalililini ukuisambilizya Baibo. Mwalinganya vino ikalanda na vino mukaelenganyapo, lyene mwaezya ukuisambilizya ukulaelenganya umu nzila ikazanzya Leza. Izwi Lyakwe Leza lingatwazwa ukucimvya ulupato ‘ulwakoma wa malinga’ ulwaya umu melenganyo nu mu mwenzo witu.—2 Kolinto 10:4, 5.

Ivyacitikile Yamwi—YA STEPHEN

Yasenwike Muli Vino Yelenganyanga

Ya Stephen nu lupwa lwao yayapasile uku yantu yano yapusiine nayo inkanda, kuli kuti azungu. Na cii calenzile yatandike ukucita iviipe vino aa mu kaungwe kamwi akakalandilako antu pa nsambu zyao yacitanga. Lyene lino papisile insita izile iyatandika ukucita unkalwe. Ya Stephen yalanzile iyati: “Kwali insita imwi ino twaile umu kutamba filimu, lyene filimu ino twatamvile yalanganga vino azungu yacuzyanga sana aina Africa. Lino twaweni vivyo, twasosile sana, icakuti itutandika nu kuuma azungu ance yano twazanyile umu cikuulwa kwene ciico. Lyene lino twafumile mu cikuulwa ciico, twaile umu mang’anda pakuti tuume azungu na yauze kwene.”

Ya Stephen yasenwike sana lino yatandike ukusambilila Baibo na ya Nte Yakwe Yeova. Yalondolwile iyati: “Icumi kwene vino naweni muli ya Nte Yakwe Yeova, vyampezizye amano sana pano nemo napasile antu aankanda yuze. Nazungwike sana ukulola Nte umuzungu wasiila umwina Africa kuti aamusungila ana yakwe apa nsita ino wafumilepo. Nupya ulupwa lumwi ulwa yazungu lwatozile umulumendo umwina Africa nu kutandika ukumusunga.” Ya Stephen izile iyasininkizya ukuti ya Nte Yakwe Yeova yatemwana wakwe viivi kwene vino Yesu wasoowile ukuti aina Klistu yalaya.—Yoani 13:35.

I cani cazwilizye ya Stephen ukuta ukuya nu lupato? Ilembo lyakwe Loma 12:2 lyayazwilizye. Yatiile: “Lino natandike ukusambilila Baibo, nizile niluka ukuti ndinzile ukusenuka muli vino nelenganyanga. Pano nazanyile ukuti ukuya ni miyeele isuma kwali nu kulenga umi wane ukuya usuma.” Ipapita imyaka 40 ukufuma pano ya Stephen yalekiile ukuya nu lupato, nupya yakaipakizya sana uumi.