Tusimbwa Twane Twatemilwe Sana Bisiketi

“Yataali sile ni cikuuku ku yantu lelo na kuli tusimbwa twane. Uwanda umwi ya Elaine, aali pali kasitandi yizile iyapeela tusimbwa twane amabisiketi. Pa cisila cakwe vii, lyonsi kwene nga twapitila apiipi na kasitandi, tusimbwa twayanga pali ya Nte kuti tukatoole ‘mabisiketi’ nupya.

“Lino papisile imyezi imwi, tusimbwa twatwalilile ukuipakizya mabisiketi, nani nuvwanga ningo ukulanzyanya na ya Nte pa nsita inono. Nomba ntalondanga ukulanzyanya nayo pa nsita itali. Naali ni myaka 70, nupya ntamanyile ningo vino ya Nte yazumilamo. Pa mulandu wakuti ntatemilwe imipepele iingi ya ina Klistu, nelenganyanga ukuti cingazipa sile ukulaisambilizya Baibo ne mwineco.

“Pa nsita kwene iya, nizile indola ya Nte na yauze ala yali pali tusitandi twa mpapulo umu tauni kwene. Nayo kwene yali ni cikuuku. Yasukanga mauzyo yonsi yano nakweti ukuomvya Baibo, nupya cii calenzile ukuti njataile sana.

“Uwanda umwi, ya Elaine yanguzizye iyati, ‘Uzye mwazumila ukuti inyama uupe uno Leza watupeela?’ Lyene naswike inti, ‘Ee, sana sile!’ Lyene yaneenyile ukuti tubelenge Ezaya 11:6-9. Ukufuma paapa kwene natandike ukulonda ukusambilila Baibo, nomba nalyo kwene ntalondanga ukupoka ulupapulo ululi lonsi ukufuma kuli ya Nte.

“Lino papisile insita naipakizyanga ukulanzyanya na ya Elaine na ya iya ya Brent pa nsita inono. Yanenyile ukuti nkabelenge Mateo kufika kuli Milimo pakuti imanye vino umwina Klistu wa cumi alinzile ukuya nupya vikwene avino nacisile. Patalengile nizile inzumila ukutandika ukusambilila Baibo na ya Brent na ya Elaine. Cali icisanya umu 2016.

“Nalondesyanga ukuti uwanda wa kusambilila Baibo ufike nu wa kuya umu kulongana pa Ng’anda ya Wene. Ala naali sana ni nsansa ukulasambilila Baibo. Ukucilako pa mwaka onga nizile imbatiziwa nu kuya Nte. Lyene paa indi ni myaka 79, nkataizya sana pali vino nazana ukupepa kwa cumi. Nupya nkataizya sana kuli Yeova pali vino wansoolola ukuya umu lupwa lwakwe ulwaya umu nsi yonsi.”