Tumasitandi Twa Mpapulo Tukwazwa Antu mu Nsi Yonsi Kusambilila Icumi

Kucila pa myaka 10 iyatipita twaomvyapo utumasitandi twa mpapulo mu mulimo wakusimkila. Antu aingi mu nsi yonsi yakalola tumasitandi tuu nupya yakamanya na kuno yalinzile ukuya. Utumasitandi tuu tusiloleka sile ningo lelo twangupala nu kuomvya. Namwe mungazumila vino nkazi Asenata uwa ku Poland walanzile ati: ‘Utumasitandi tuu twapangwa ningo,utwa usaka, nupya twangupala nu kuomvya. Twangupala ukutwika alino nu kutufumya.’

Uzye mukatala mwelenganya pali vino tumasitandi tuu twapangwa na vino tukaloleka?

Vino Twapangwa Ningo

Umu 2001, Iumba Ilikatungulula lyazumilizye aina na ya nkazi aku France ukutandika ukwezya inzila izipusanepusane izya kusimikila ukukazanwa antu aingi ukuomvya tumasitandi twa mpapulo. Yezizye inzila zipusanepusane zya masitandi. Wakwe, yaomvizye utwakuti tukulanga impapulo alino nu twakusungilamo impapulo. Pa cisila iofesi lya musambo wa ku France lyasoolwile tumasitandi utusuma tuno ya kasimikila yaomvizye pa myaka iingi.

Aina aku France yaali ni nsansa pali vino umulimo wa kusimikila waomvile ningo uwa kuomvya tumasitandi. Fwandi mu 2011, Iumba Ilikatungulula lyanenyile aina amu New York City, ku U.S.A ukwezya ukuomvya tebo nanti tusitandi lino yakusimikila ukukazanwa antu aingi. Ya painiya aaomvileko mulimo uu yazanyile ukuti tumasitandi twali utusuma pano twali utwangupale ukusezya. Nupya ya painiya yalanzileko vimwi vino yali nu kucita ivyali nu kulenga ukuti tumasitandi tuzipileko. Tumasitandi twakutandikilapo tuno yapanzile twali utufine sana fwandi catalanga ukutwimika nanti sile kutufumya. Fwandi yatupangulwile nu kupangamo utwanguke, nomba tutaali utwanguke sana icakuti tungapona nu muza. Nupya tumasitandi tuu tuno yapanzile twali utukulu nupya twakweti mateelo akulu icakuti tutangatupone foo. Umu tumasitandi tuu mwali na muno yasungilanga impapulo.

Fwandi utumusandi tuu twaomvile ningo sana kusimikila ukukazanwa antu aingi! Lyene umu 2012 Iumba Ilikatungulula lyazumilizye ukuti umu nsi yonsi aina na ya nkazi yaomvya utumasitandi twa mpapulo lino yakusimikila ukukazanwa antu aingi. Aina yazanyile ali nu kupanga masitandi aingi aakwikapo impapulo .

Lino papisile imyaka yatandike ukuzifyako vino yapanganga utumasitandi. Wakwe mu 2015 isileko cipepala ca kucinga imvula pa nkoleelo yakwe tusitandi. Ya Dina aakaikala mu Georgia, yataizye pali vino yatandike ukutupanga. Yalanzile ukuti, ‘Tusitandi tukuikwatila ivipepala vya kucinga impapulo pa kuti zitaanyeka.’ Lyene umu 2017 yatandike ukupanga ivikope ivyakwata magineta umu ndimi zimwi. Umwina Tomasz wa ku Poland watiile: ‘Catalanga ukucinja icikope icakwatilanga limwi gulu icayanga pali ka standi. Fwandi caya ningo sana ukupanga ivikope ivyakwata magineta.’ Mu 2019 kwali ukusenuka muli vino yaomvyanga pa kupanga nu mu mipangilile ya tumasitandi pakuti twaya utukome.

Vino Yakapanga Tumasitandi Twa Mpapulo

Tumasitandi tuu tukapangwa sile na kampani yonga nu kutumwa umu vilongano vyonsi umu nsi yonsi. Ndakai kasitandi konga kakalwa pa madola 43. Kufika ndakai twaomvya impiya ukucila pa madola 16 milyoni uku tumasitandi nupya twatuma tumasitandi tuu mu vilongano kucila pali 420,000 umu nsi yonsi.

Pakuti twaomvya ningo imisangulo, tukakala utumasitandi utwingi pa muku onga. Nupya amu vilongano yagaoda ivya kuomvya pa kuzifya utumasitandi utononeka ukucila ukuoda utumasitandi tuze.

Kuomvya Utumasitandi pa Kusimikila

Ya kasimikila umu nsi yonsi yakuipakizya ukusimikila ukuomvya utumasitandi twa mpapulo. Ya Martina aku Ghana yatiile: ‘Umu nzila izingi izya kusimikililamo sweswe tukaya umu kulonda antu. Cino natemelwa ukusimikila ukuomvya utumasitandi i cakuti antu aakaiza kuli sweswe. Na akupita sile yangasimikilwa.’

Umu mpanga na yuze umu Africa, umonsi umwi waile pali ka sitandi ka mpapulo nu kusenda impapulo zya mu lulimi lwakwe. Lino papisile umulungu onga wawezile nu kulanda ati: ‘Nabelenzile impapulo zyonsi. Ivyeo ivilimo ivicindama sana. Nkulonda ukuyasimikilako ya lupwa yane uku muzi,’ apaali makilomita 500 (311 mi). Nupya lino papisile imyezi iili wawezile nu kulanda ati: ‘Aikala muzi yabelenzile impapulo zyonsi nupya yatemilwe sana ivyeo ivilimo. Yakulonda ukuya ya Nte Yakwe Yeova. Lelo iyakwata mauzyo. Wakwe, yamanya ukuti pakuti umwi abatiziwe yalinzile ukumutuwizya umu manzi. Nomba tutaakwata uluzi umupiipi. Uzye tulinzile ukwiza kuno akuno tubatiziwilwe?’ Ya kasamikila yapekinye ukuti umonsi wii yalanzyanye na painiya uwamanyile ululimi lwakwe. Kufuma liili kwene antu yaa yaili yakaipakizya ukulanzyanya lyonsi.

Tukaya ni nsansa nga twalola vino utumasitandi twa mpapulo tukuomviwa pa kusimikila “umu nsi yonsi ukuya unte ku yantu amu nko zyonsi.” (Mateo 24:14) Uzye aekwi ukukafuma impiya zino tukaomvya pa kukala utumasitandi? Zikafuma ku misangulo ya mulimo wa mu nsi yonsi, muno aingi yakasangwilako ukuomvya inzila izikazanwa pa donate.jw.org pa intaneti. Tukataizya pali ukapekape winu.