Kwazwa Aatiyaponelwa na Mazanzo mu 2022—Kulanga Ukuti Twatemwa Aina Muli Vino Tukacita

Baibo yasowile ukuti mu manda itu mulaya inkondo, vilundumusi, vipowe, alino ni vintu vyuze “vya kutiinya.” (Luka 21:10, 11) Usowelo uu watwalilile ukufikiliziwa nu mu mwaka wa mulimo uwa mu 2022.a Wakwe, inkondo ya ku Ukraine yatwalilile, nupya cii calenzile ivintu ukutalila antu aingi. Lino umwaka uu wafikanga ala antu aingi umu nsi yacili yakucula uku ulwale wakwe COVID-19. Ukulunda pali vii, antu aingi yaponilwe na mazanzo akuiponela, wakwe uku Haiti kwacitike ivilundumusi, nupya uku Central America, ku Philippines, nu ku southeastern Africa nako kwacitike imvula iya cimuza iciipishe. Uzye ya Nte yakwe Yeova yazwile uli yayo aaponilwe na mazanzo?

Mu mwaka wa mulimo uwa mu 2022, lino kwacitike mazanzo umupiipi na 200, iuvi litu lyazwilizye aaponilwe na mazanzo! Impiya izyaomvile zyafisile umupiipi na madola 12 milyoni.b Lolini vino imisangulo yaomviwe lino kwacitike mazanzo yaili.

Vilundumusi Ivyacitike Umu Haiti

Pa 14 Ogasiti, 2021, cilundumisi icikalamba icakweti amaka ukufika kuli 7.2 cacitike uku kaeya ka Haiti. Icifileko i cakuti ya Nte yatatu yafwile, kuli kuti ya nkazi yaili nu mwina wenga. Yano yapuswike yacisike nupya yaculanga na melenganyo pa mulandu ni cilundumusi. Umwina Stephane walanzile ati: “Mu musumba onsi antu aingi yaafwile icakuti kwayanga ivililo ivingi cila mulungu pa myezi ukucila pali iili.” Umwina na muze uwi zina lyakuti Éliézer, watile: “Ya Nte aingi yataakweti umwa kwikala, ivyakuzwala, insapato ni vintu vyuze ivikalondekwa. Pa myezi iyakonsilepo, antu aingi yaali sana ni ntete pa mulandu ni vilundumusi vinono ivyacitikanga pa cisila ca cilundumusi cikalamba.”

Iuvi litu lyazwilizyanga aina na ya nkazi zuwa zuwa. Umusambo wa ku Haiti wapeezile aina na ya nkazi ivyakulya, matenti, mamatilesi, na macaja ya mafoni aa masola, ivyafinyile makiloglamu 53,000. Nupya umu mwaka wa mulimo uwa mu 2022, mang’anda ukucila pali 100 yakuuzilwe cipya cipya nanti ukuzifiwa. Impiya ukucila pa madola 1 milyoni i zyaomviwe uku kwazwilizya aaponilwe na mazanzo.

Aina itu na ya nkazi yakutaizya sana. Ya Lorette yalanzile iyati: “Cilundumusi cononyile ing’anda itu nu uculuzi. Tutaakweti ivyakulya. Lelo iuvi lyakwe Yeova lyatwalilile ukututungilila nu kutupeela vyonsi vino twalondekwanga.” Ya Micheline yatile: “Cilundumusi cononyile muno twikalanga na ana yane yaili aonsi. Ntaamanyile ni vya kucita, nalenganga sile uwazwilizyo kuli Yeova nawe waswike ukuomvya iuvi lyakwe. Lyene twakwata ing’anda isuma umwa kwikala. Ndatwalilila ukucita vyonsi vino ningakwanisha pakuti nalanga ukutaizya kuli Yeova.”

Amu uteeko yaweni vino twavwilizyanga aaponilwe na mazanzo. Mukalamba wa cikuulwa umwaya maofesi ya uteeko umu L’Asile walanzile ati: “Nkumutaizya pali vino mwavwilizye zuwa aalondekwanga uwazwilizyo. Nupya nkumutaizya pali vino mwacindika utunguluzi. Indi ni nsansa ukumanya ukuti mutiika mano uku mpiya. Lelo mukalonda ukwazwa antu. Mukacita vivyo pa mulandu nu kutemwa.”

Icimuza Iciipishe Ici Zina Lyakuti Ana Capita Umu Malawi nu mu Mozambique

Pa 24 Januwale, 2022, Icimuza Iciipishe icamwangwa ukuti Ana capisile umu Mozambique lyene calungime uku uwondaka mpaka icifika umu Malawi. Cimuza cii calenzile kuye imvula iingi sana nupya kwali sana umuza uwasimulanga makilomita 100 api awala lyonga. Caponyizye intambo zya malaiti, konona maulalo nu kuleta mulamba umukalamba.

Uzanzo wa cimuza cii wacitikile na ina na ya nkazi ukucila pali 30,000 mu Malawi nu mu Mozambique. Charles umwina uwaomvileko umulimo wa kusakamala aaponilwe nu uzanzo walanzile ati: “Lino naweni vino aina yaculanga na vino yaponzizye vino yakweti, nuvwile sana uyi nupya ntaamanyile ni vya kucita.” Ca ulanda i cakuti ni vyakulya ivinono vino yakweti ni vilimwa vyononike. Mang’anda aingi yononike. Iciipishe i cakuti, umwina wenga wafwililwe umuci na ana yakwe yaili akazyana lino uwato uno yalimo wapiliwike.

Cimuza cii cali i ca kutiinya. Pa nsita yakwe 01 mu Nchalo ku Malawi, ulupwa lwakwe ya Sengeredo luvwile iciunda ca manzi icikalamba nupya ica kutiinya. Walanga inguzi ziili izizuula sana! Umwina Sengeredo wapingwile ukuti yafume umu ng’anda. Vino yapingwile vyali ningo pano mulamba wawisizye ing’anda. Ivintu vyao vyononike nanti ukusendwa na manzi. Ulupwa lwapingwilepo ukuya uku Ng’anda ya Wene pano yapitanga mamineti 30. Nomba pa nsita yii yene yapisilepo maawazi yaili. Yafisile ale iyaomba nupya iyatonta, lelo yafisile umu mutende.

Lilyo kwene sile aku musambo wa ku Malawi nu wa ku Mozambique yatandike ukwavwilizya aaponilwe nu uzanzo. Yanenyile angalizi ya viputulwa na ya eluda ukulola uwazwilizyo uno aina aaponilwe nu uzanzo yalondekwanga nu kuyakomelezya muli ukapepa alino nu kuyateekezya. Makomiti aa Kwazwa Aatiyaponelwa na Mazanzo (DRC) aingi yayanenyile ukwangalila umulimo wa kwazwilizya aatiyaponelwa nu uzanzo nupya lilyo kwene yatandike ukupeela aina ivyakulya ni vintu vyuze vino yalondekwanga. Impiya ukucila pa madola 33,000 i zyaomviwe uku kukala ivyakulya ni vintu vyuze ivyalondekwanga nupya madola ukucila 300,000 aaomviwe uku kuzifya nu ku kuula cipya cipya mang’anda aononike.

Makomiti yayo yaomvizye ningo impiya nupya cacindime ukucita vivyo pano ivintu vyakwezile sana umutengo. Wakwe, umu myezi sile 7 ukufuma pano yatandikile ukwazwilizya ina, mutengo wa usu wakwe cisaka uno yakaomvya sana uku Malawi wakwezile sana. Mutengo wa mafuta nao wakwezile. Pakuti aina yatasumba impiya izingi yakalanga ivyakulya ni vya kuomvya pa kukuula umu mpanga kwene iiya nupya yakalanga ivingi pa muku onga. Fwandi yayawezezyangako imitengo nupya yataaomvizye impiya izingi pa kuvisenda.

Umulimo wa kwazwa aatiyaponelwa nu uzanzo wakomeliizye sana antu yakwe Yeova. Umwina Felisberto uwa ku Mozambique, walanzile ati: “Ntatala nalolapo kaungwe akacitilapo antu ivintu wakwe vii: kuli kuti kuyapekanyizizya ivya kukuulila, mipitile, aomvi ya kukuula, ivyakulya alino nu utunguluzi usuma. Mulimo uu wa kwazwa aina walangilile apaswe ukutemwa kwa wina kuno Yesu walondolwile pali Yoani 13:34, 35.” Nkazi Ester mukamfwilwa wa ku Malawi wino ing’anda yakwe yononike walanzile ati: “Navulunganyiziwe pano ntaakweti impiya zya kukuulila ing’anda yuze. Fwandi lino aina izile iyankuulila ing’anda, nuvwile kwati indi umu paladaise.”

Lino tukupalamila uku nsi ipya, tukwenekela ukuti twakulakwata mazanzo aingi. (Mateo 24:7, 8) Lelo pa mulandu ni misangulo inu iya kuitemelwa, itutaila ukuti antu yakwe Yeova yalapokelela uwazwilizyo uno yakulondekwa. Inzila zimwi zino mungaomvya pa kusangwilako zyalondololwa pa donate.jw.org. Tukataizya sana pali ukapekape winu.