Vino Tukucita Pakuti pa Mang’anda ya Wene Paaya Apacingililwe Ukundwala, Umu Nsita Yakwe COVID-19

‘Aa mwi Umba Ilikatungula iyapingulapo ukuti ndi cakuti aamuuteko yatiisileko viindo vyuze, twakomelezya vilongano vyonsi ukuti yangatandika ukulonganila pamwi ala yali pa cifulo conga kutandika mu mulungu wakwe 1 Epuleo.’ Cimanyisyo cii ciisilwe pa jw.org ku kutandika kwakwe Maaci 2022, Nupya calenzile ya Nte Yakwe Yeova ukuya sana ni nsansa. Lelo pa nsita iyo ala icikuko cakwe COVID-19 citatala casila.a I vyani vino twali nu kuta ukucita, na vino twalondekwanga, pa kucingilila yano yakwiza mukulongana ukuti yatambula ulwale? Vino papisile imyaka iili ukwaula ukulonganila pamwi ala tuli pa cifulo conga, uzye Mang’anda ya Wene yali nu kupekanyiziwa uli pakuti tutandike ukulonganilamo nupya?

Ukuya aina na ya nkazi, yapekanyanga pa myezi iingi pakuti yakatandike ukulonganila pamwi nupya pa Mang’anda ya Wene.

Vino tukulondekwa na vino tulinzile ukucita vyayanga ivipusane

Lino papisile sile umwezi onga kufuma pano twatelile ukulonganila pamwi mu Mang’anda ya Wene mu 2020, Aa muli Dipatimenti Iikaangalila Umulimo wa Makuule Umu Nsi Yonsi (WDC), mu Warwick ku New York, yatandike ukwelenganya pali vino ulwale wakwe COVID-19 wali nu kulenga kuye intazi lino tukulonganila pa Mang’anda ya Wene, lyene na vino yali nu kucita pakuti pano tu kulonganila paye apacingililwe.

Vino vyalondekwanga umu ncende zimwi umu nsi vyapusananga na vino aa ku ncende yuze yalondekwanga. Ya Matthew De Sanctis, aakaomba mu WDC, yalondolwile ukuti: ‘Mu mpanga zimwi, intazi yonga iikuyamo ukukana kwata pa kufulalila iminwe. Ndi cakuti pa Ng’anda ya Wene pataya manzi, pakulalondekwa ukwikapo manzi nanti ukudonsa manzi ukufuma mu luzi nanti mu cisima. Mu mpanga zimwi a mu uteeko yamwi yasenwileko pali vino muno mukuzanwa antu mulinzile mwapita umuza, alino nu kukambatika tupampa mu ncende muno mukuzanwa vya kuicingilila.’

Uzye aina na ya nkazi yacisile uli pakuti yakwanisye ukucita vyonsi vii? Yazanyile ukuti vii vingaomba mu Mang’anda ya Wene aingi. Ya Matthew yalanzile iyati: ‘Inzila iyangupale ino twaomvizye izile iloleka ukuti yali ningo sana,’ wakwe mu Papua New Guinea, mu ncende zya pa Ng’anda ya Wene twisilemo mabaketi aakweti matapu. Mabaketi yayo yingizyanga manzi malita 20. Aina na ya nkazi yakwanisyanga ukukala ivikulondekwa pa kuomvya pa kufulala ku minwe pa mpiya madola 40. Twanenyileko umwi uwa mu Asia ukutupangila twakuomvya pa kufula ku minwe ukucila pali 6,000 utwakutwala ku Mang’anda ya Wene aa mu Africa.

Alino ukusenuka kuze kwalimo nu kwika mafani mu Mang’anda ya Wene pakuti mu Mang’anda ya Wene mwapita umuza usuma. Mu Mang’anda ya Wene aingi yakalilemo ivyakulemelako maikolofoni vitali ivya kuomvya pa kupisya umwi umba lino yamwi yakwasukapo pakuti aali umwi umba yataalemako kuli maikolofoni. yaombesyanga pakuti yataalema lili lili vintu wakwe, vya kuyulilako ivisaasa, ma windo alino na vyuze; nupya ikangako mulembo wakukoma utuzizi. Mu vimbusu ivyayanga mu Mang’anda ya Wene yamwi, ikangamo matapu akuti yakuiyulikila aineco. Pakuti yasenuleko vimwi ivyalondekwanga mu Mang’anda ya Wene aali mu mpanga ya Chile, yaomvizye impiya madola ukufika kuli 1,400 pali cila Ng’anda ya Wene.

Aina itu ikanga sana mano kukuleka Mang’anda ya Wene yaye aacingiliwe, nupya lino yakucita vii yezyanga na maka kuomvya ningo impiya izikasangulwa. Wakwe mu mpanga zimwi, yaomvyanga vino uteeko wapeelanga pa kwazwa antu ukukwata ivya kwika mu ncende umwa kufulala iminwe alino ni vyakulemelako maikolofoni. Amu maofesi amisambo ipusane pusane yaombile pamwi pakuti misangulo iomviwe ningo lino yakukala ivintu ivingi ivyalondekwanga kucila vino cayanga mpiti. Aa mu misambo na aa muli dipatimenti ikalolekesya pa vyakukala mu nsi yonsi yapekanyizye ukuti yaakala ivikulondekwa ku makampani akapanga ivintu, nupya cii cikalenga kukana omvya impiya izingi alino nu kupokelela zuwa ivintu kwene vivyo.

‘Nayuvwile Ukuti Incingililwa’

Mapekanyo akuti Mang’anda ya Wene yaye aacingililwe, yalenzile ukuti aina na ya nkazi yasinikizye ukuti yamaya aacingililwe lino yakulonganila pamwi ala yali pa ncende yonga. Lino Nkazi Dulcine, waku Peru, uvwile ukuti tumatandika ukulonganila pamwi pa Ng’anda ya Wene walanzile ukuti uvwangako ‘intete panono.’ ‘Nambwile ulwale wakwe COVID-19 lino sile cikuko catandike,’ walanzile ati. ‘Fwandi nelenganyanga ukuti citali icanguke ukuya ku Ng’anda ya Wene, pano nalolanga ukuti nupya kwene ningambula ulwale. Nomba lino nafisile sile pa Ng’anda ya Wene naweni vino ya Eluda isileko ivya kuicingilila wakwe ukupakala umulembo uwakukoma utuzizi, alino ni vyakulemelako maikolofoni ivitali ivyakupisyamo lino yakwasuka, alino nu kusansa umulembo uwakukoma utuzizi Mung’anda ya Wene lino tutatala twatandika na pa cisila sile cakuti twamala ukulongana. Vyonsi vii vyalenzile nayuvwa ukuti incingililwa.’b

Ya nkazi Sara, aa mu Zambia, yakweti intazi zingi. Yalondolwile ukuti: ‘Yawane yafwile ku ulwale wakwe COVID-19 Myezi inono yatipitapo. Fwandi nasakamile sana vino nali nu kuvwa umuku wakutandikilapo ukulonganila pamwi Mung’anda ya Wene ukwaula ya wane.’ Uzye lyene yakauvwa uli ukuya ku Ng’anda ya Wene? Yalanzile iyati: ‘Kulonganila pamwi Mung’anda ya Wene kukalenga nsininkizye ukuti Yeova waya naswe mu manda yaa aakusyalikizya. Kucila vino cali mpiti ndakai, nkauvwa ukuti nkakomeleziwa, kutemwikwa, nupya nkauvwa ukuti ya eluda alino na ina na ya nkazi yakangazwa muli vino nkalondekwa.’

Ya kapepa yanji umu nsi yonsi yakataizya pali vino yakwata isyuko lya kutandika nupya ukulonganila pamwi mu Mang’anda yao a Wene. Tukutaizya sana pa misangulo ino mukasangwilako, nupya imisangulo iingi ikasangulwa ukuomvya donate.jw.org Misangulo yii ikatwazwa ukusininkizya ukuti pa vifulo pano paya ukupepa kwa cumi a pacingililwe nupya a pa usaka.