Vino Tulinzile Ukucita Lino Tukupandako Yauze Amano

1. Aaweni alinzile ukupandako yauze mano? Londololini.

UZYE mukaitemelwa ukupandako yauze amano? Yamwi yakauvwa ningo ukucita vivyo. Lelo yamwi yene yakasitooka ukupandako yauze amano. Lelo swensi kwene twakwata umulimo wa kupandako yauze amano. U mulandu ci? Yesu walanzile ukuti ukutemwana u kwali nu kulenga asambi yakwe acumi ukumanyikwa. (Yoa. 13:35) Nupya inzila yonga ino tungalangilamo ukuti twatemwa aina itu na ya nkazi, u kuyapandako amano. Izwi lyakwe Leza likalanda ukuti “Kusunda kwa cumi ukukafuma kuli cuza musuma” kukalenga ucuza ukukomelako.—Mapi. 27:9.

2. I vyani vino ya eluda yalinzile ukucita, nupya u mulandu ci? (Loliniko na kambokosi kakuti “Ukusunda Ukwa pa Kulongana Kwa Mukasi ka Mulungu.”)

² Ya eluda yalinzile ukumanya ivya kusunda ningo yauze. Yeova na Yesu yapeela aonsi yaa umulimo wa kusakamala amu cilongano. (1 Pet. 5:​2, 3) Inzila yonga ino yakatusakamalilamo u kulanda malyasi umukaya ukusunda ukukafuma umwi Izwi lyakwe Leza. Nupya yalinzile ukulasunda imfwele yonga na yonga ukwikako sile na yayo aata ukuombela Yeova. Uzye ya eluda alino na swensi kwene tungacita uli pakuti twapandako ningo yauze amano?

3. (a) Tungacita uli pakuti tuye ya kasunda yasuma? (Ezaya 9:6; loliniko na kambokosi kakuti “Mwakolanya Yesu Lino Mukusunda Umwi.”) (b) I vyani vino tumasambilila umu cipande cii?

³ Tungasambilila ivingi uku yantu alembwa muli Baibo pali vino tungaya kasunda musuma, sana sana kuli Yesu. Izina limwi lino Yesu wapeelwa i lyakuti “Impandamano Isuma.” (Belengini Ezaya 9:6.) Umu cipande cii tumasambilila pali vino tulinzile ukucita lino umwi watunena ukuti tumupandeko amano alino na vino tulinzile ukucita lino umwi akulondekwa ukupandwa mano nanti cakuti atatunenyile. Nupya tumasambilila na pa mulandu uno cacindamila ukupanda mano pa nsita ilinge nupya umu nzila isuma.

LINO UMWI WATUNENA UKUTI TUMUPANDEKO AMANO

4-5. Ndi cakuti umwi watunena ukuti tumupandeko amano, iuzyo ci lino tulinzile ukuyuzya? Langililini.

⁴ Ndi cakuti umwi watunena ukuti akulonda tumupandeko amano, i vyani vino tulinzile ukutandikilapo ukucita? Limwi tunguvwa ningo ukuti cuza witu watutaila nupya tungalonda ukumwazwa papo kwene sile. Lelo ica nkoleelo cino tulinzile ukucita u kuyuzya ukuti, ‘Uzye indinga ukumupandako mano ukulingana ni ntazi ino akweti?’ Insita zimwi, inzila isuma ino tungazwilamo cuza witu u kumunena ukuti aye kuli umwi angamwazwa ningo ukulingana ni ntazi ino akweti.

⁵ Wakwe, tuti cuza winu umupalamishe walwala sana. Wamunena ukuti watalondelezya pa milwazizye ipusanepusane, lyene wamuzya ukuti mumunene imilwazizye ino mukwelenganya ukuti ili ningo. Nanti cakuti mungatemwapo imilwazizye imwi, asi mwemwe dokota nupya mutasambililapo pa milwazizye iya ulwale uwo. Ndi cakuti caya vivyo, ale inzila isuma ino mungazwilamo cuza winu u kumunena ukuti aye kuli umwi uwamanya ningo imilwazizye iya ulwale uno akweti.

6. U mulandu ci uno tulinzile ukuteekela lino tutatala twapandako umwi mano?

⁶ Nanti cakuti tukulola ukuti itulinga ukupanda umuntu wiyo amano, limwi tulinzile ukuteekelako panono lino tutatala twamwazwa. U mulandu ci? Mapinda 15:28 ikalanda ukuti “umuntu umulungame akaelenganyapo sana lino atatala wasuka.” Nga ndi cakuti tukwelenganya ukuti itumanya icasuko? Limwi tungalondelezyako ivyeo, kupepelapo, alino nu kwelenganyapo. Ukucita vii kungalenga tupande umuntu amano ukulingana na vino Yeova akulonda ukuti tumwazwe. Elenganyini pali vino kasesema Natani wacisile.

7. I vyani vino tukusambililako kuli vino Natani wacisile?

⁷ Umwene Devedi wanenyile kasesema Natani ukuti walondanga ukukuulila Yeova itempele. Lilyo kwene Natani wamunenyile ukuti angakuula. Lelo Natani walinzile ukutandikilapo ukuzya kuli Yeova. U mulandu ci? Pano Yeova atalondanga ukuti Devedi aliwe amukuulile itempele. (1 Mila. 17:​1-4) Naswe tukusambililako ukuti lino tutatala twapandako umwi amano, tulinzile ukuya ‘ateekele pa kulanda.’—Yako. 1:19.

8. U mulandu ci na uze uno tulinzile ukwelenganyapo sana lino tutatala twapandako umwi mano?

⁸ Elenganyini pa mulandu na uze uno tulinzile ukwelenganyapo sana lino tutatala twapandako umwi mano: Ndi cakuti tutapanzile ningo umuntu amano, naswe kwene tungaya nu mulandu ndi cakuti iviipe vyamucitikila. Fwandi cacindama sana ukwelenganyapo lino tutatala twapanda umuntu mano.

LINO UMWI ATATUNENYILEKO UKUTI TUMUPANDEKO AMANO

9. Lino ya eluda yatatala yazwa umuntu, i vyani vino yalinzile ukusininkizya? (Galatiya 6:1)

⁹ Insita zimwi ya eluda yangatandikilapo ukwazwa umwina nanti nkazi ‘uwatatandika ukucita iviipe.’ (Belengini Galatiya 6:1.) Limwi umuntu angatandika ukusoolola ukucita ivintu ivingalenga acite uluyembu ulwipishe. Cino ya eluda yakalonda u kwazwa umuntu wiyo ukutwalilila ukulaombela Yeova pakuti akaye nu umi wa manda pe. (Yako. 5:​19, 20) Nomba pakuti yazwe ningo umuntu wiyo, inkoleelo yalinzile ukusininkizya ukuti umuntu wiyo watandika ukucita iviipe. Yeova akalonda ukuti swensi kwene twapingula pa vintu ukuomvya kampingu itu. (Loma 14:​1-4) Nomba uzye ya eluda yangacita uli ndi cakuti umwina watatandika ukucita iviipe nupya yasoololapo ukuti yamwazwe?

10-12. Uzye ya eluda yangasunda uli umuntu aatayanenyile ukuti yamusunde? Langililini. (Loliniko ni cikope.)

¹⁰ Cikatalila ya eluda ukusunda umuntu aatayanenyile ukuti yamwazwe. U mulandu ci? Umutumwa Paulo walanzile ukuti umuntu angatandika ukucita iviipe ukwaula ukumanya. Fwandi lino ya eluda yatatala yasunda umwi, kuli vino yalinzile ukucita pakuti cangukile umuntu wiyo.

¹¹ Elenganyini pali siulimi aakulonda ukukomela imbezu apa musili ukome. Lino atatala watandika ukukomela imbezu, akalima umusili pakuti utonte. Lyene akakomela imbezu. Nupya akakontelela pakuti imbezu zikule. Vikwene ali vino caya na kuli ya eluda, kuli vino yalinzile ukucita pakuti cangukile umuntu ukuvwa ukusunda. Eluda akalola insita isuma iyakulanda nu mwina nupya akamunena ukuti wamwikako mano. Ndi cakuti eluda waya nu kutemwa alino ni cikuuku, cilalenga ukuti yauze yazumila ukusunda kwakwe.

¹² Lino yakulanzyanya, eluda akalenga cangukile umuntu wino akusunda ukuzumila ukusunda lino akumwiushako ukuti swensi kwene tukaluvyanya nupya insita zimwi tukalondekwa ukwazwiwa. (Loma 3:23) Ya eluda yakaya ateekele nupya umu mucinzi yakaomvya Malembo pakuti yazwe umuntu ukwiluka ukuti wacisile iviipe. Ndi cakuti umuntu wiluka ukuti waluvyanyizye, ya eluda yakalondolwela umuntu umu mazwi angupale vino alinzile ukucita pakuti asenuke. Nu mu kushalikizya, ya eluda yakalenga cangukile umuntu wiyo lino yakumunena pa visuma vino akucita alino nu kupepela pamwi nawe.—Yako. 5:15.

13. Uzye ya eluda yangasininkizya uli ukuti umuntu atauvwikisha ukusunda?

¹³ Insita zimwi vino kasunda walanda asi lyonsi lino umuntu wino akusunda anguvwikisha. I vyani vino ya eluda yalinzile ukucita pakuti vii vitacitika? Yangazwa umuntu ukuvwikisha lino yakumuzya mauzyo umu mucenjelo. (Kasa. 12:11) Masuko yano umuntu wiyo amaasuka aliyo yamalangilila ndi cakuti watauvwikisha ukusunda.

MWAPANDAKO YAUZE MANO PA NSITA ILINGE NUPYA MU NZILA ISUMA

14. U mulandu ci uno tutalinzile ukupandilako yauze mano ala itusoka? Londololini.

¹⁴ Swensi kwene tutamalilika, fwandi insita zimwi tungalanda nanti kucita ivintu ivingasosha yauze. (Kolo. 3:13) Izwi lyakwe Leza lyalanda ukuti insita zimwi tukalanda nanti ukucita ivintu ivingalenga yauze yasoke sana. (Efes. 4:26) Lelo tutalinzile ukupanda umuntu mano lino itusoka. U mulandu ci? Pano “ukali usilenga umuntu ukucita ivintu ukulingana nu ulungami wakwe Leza.” (Yako. 1:20) Ndi cakuti tukupandako yauze amano lino itusoka, tungalenga intazi ukukulilako. Cii cisikupiliula ukuti tutalinzile ukunena umuntu vino tukuyuvwa nanti vino tukwelenganya. Nomba tungalanzyanya ningo nu muntu ndi cakuti twateeka umwenzo. Lolini vino tungasambililako kuli vino Eliu wasunzile ningo Yobo.

15. I vyani vino tukusambilila kuli vino Eliu wacisile? (Loliniko ni cikope.)

¹⁵ Apa manda aingi Eliu wakutikanga kuli vino Yobo waipokololanga kuli ya kateekezya ya ufi. Eliu uvwilile Yobo uluse. Lelo Eliu wasosile lino Yobo walanzile ivya ufi pali Yeova lino waipokololanga. Nanti ciye vivyo, Eliu wateekiile nu kulolela insita yakwe iya kulanda, nupya wali nu mucinzi lino wasundanga Yobo. (Yobo 32:2; 33:​1-7) Vino Eliu wacisile vikatusambilizya isambililo ilicindame sana ilyakuti, tungasunda ningo umuntu ndi cakuti twamusunda pa nsita ilinge nupya umu nzila isuma.—Kasa. 3:​1, 7.

TWALILILINI UKUPANDAKO YAUZE AMANO NU KUPOKELELA UKUSUNDA

16. I vyani vino tukusambilila uku mazwi aaya pa Masamu 32:8?

¹⁶ Yeova walanda ukuti: “Ndakupanda mano ale na manso yane yali pali wewe.” (Belengini Masamu 32:8.) Cii cikapiliula ukuti alatwalilila ukutwazwa. Watulaya ukuti alatupanda mano alino nu kulatwazwa. Naswe kwene tungakolanya vino Yeova akacita. Ndi cakuti twasunda umwi tulinzile ukutwalilila ukulamukomelezya alino nu kulamwazwa ukupingula ningo pa vintu.

17. Ndi cakuti ya eluda yapeela ukusunda ukwa mukulungatika ukufuma muli Baibo, yakaya wakwe vyani? Londololini. (Ezaya 32:​1, 2)

¹⁷ Ndakai tukalondekwa sana ukupandwa mano alino nu kupandako yauze amano asuma. (2 Tim. 3:1) Ndi cakuti ya eluda yapeela ukusunda ukwa mukulungatika ukufuma muli Baibo, ukusunda kuko kukaya “wa nguzi umu mpanga umutaaya manzi.” (Belengini Ezaya 32:​1, 2.) Tukataizya pali ya cuza itu aasizumilizya sile vino tukulonda lelo aakatunena vino tukulondekwa. Amazwi yao yaya wa “maapo yakwe goldi aali mu mbale yakwe siuva.” (Mapi. 25:11) Fwandi lekini swensi tutwalilile ukupandako yauze mano asuma alino nu kupokelela ukusunda ndi cakuti umwi watusunda.