Insi Ikononeka—Uzye Baibo Yalandapo Uli?

“Antu yakucita ivintu ivilalenga imiceele ipe sana. Mu misumba ikalamba mulaya manzi aingi. Ukukaya sana. Imvula iya cimuza iipisye. Ukukanakwata manzi umu ncende zipusanepusane. Kulowa kwa miti alino ni nyama izingi. Vii asi ivya ufi nanti ivya kulumbilizya sile. Vikwene avino ya sayansi yatunena ukuti ivilacitika ndi cakuti mauteeko yatasenwile masunde pa miomvyezye iya manzi, umuza, imiti ni vintu vyuze.”—Vii avino Mukalamba wa Kaungwe ka United Nations, António Guterres walanzile, lino mauteeko apusanepusane yakomenkine nu kulanzyanya pa kusenuka kwa miceele nupya vyali muli lipoti iyafumile pa Epuleo 4, 2022.

“Ya sayansi yakucelula antu ukuti likwene sile incende izisuma sana umupiipi na 423 uku United States zino antu yakaya umu kwizizyako zili nu kononeka pa mulandu nu kusenuka kwa miceele, pano incende zii zingononeka pa mulandu nu kukaya sana. Ivintu viipe vino yaalanda ukuti vingacitika vyakolanako na mazanzo yano limwi twabelengapo muli Baibo, wakwe: umoto na mulamba, kusunguluka kwa manzi yakwe aisi, manzi ukuzula muli ya yemba nu kukaya sana.”—Vii vyali mu cipande cakuti “Flooding Chaos in Yellowstone, a Sign of Crises to Come,” icali muli nyunzipepa ino yakaama ukuti The New York Times, iyafumile pa 15, Juni 2022.

Uzye antu yalata ukonona insi? Nga yalata, ale a weni alayalesya? Lekini tulole vino Baibo ikalanda.

Baibo yasoowile ukuti antu yalaonona insi

Baibo ikalanda ukuti Leza ‘alonona aakaonona insi.’ (Kusokolola 11:18) Cikomo cii cikatusambilizya ivintu vitatu:

1. 1. Vino antu yakacita vilalenga insi ukononeka sana.

2. 2. Antu yatalatwalilila ukonona insi.

3. 3. Leza sile aalazifya insi ino antu yonona.

Insi ilazipa uku nkoleelo

Baibo ikalanda ukuti “insi ilatwalilila ukuyako amanda pe.” (Kasambilizya 1:4, NWT.) Antu yalatwalilila ukwikalamo.

• “Antu aololoke yalikala umutende umu mpanga, nu kuipyana umuyayaya.”—Masamu 37:29.

Insi ilaya wakwe vivi kwene vino yali pa kutandika.

• “Ulwanga lulazanga, na maluwa yalawalula umu mpanga ilangoke.”—Ezaya 35:1.