Uzye Maliya A Nyina Wakwe Leza?

Icasuko ica muli Baibo

Awe, Baibo isisambilizyapo ukuti Maliya a nyina wakwe Leza nanti ukuti Aina Klistu tulinzile ukupepa nanti ukucindikisya Maliya.a Tale elenganyini pali vii:

Maliya atatazile alandepo ukuti wali a nyina wakwe Leza. Baibo ikalondolola ukuti waviile “Umwana Wakwe Leza,” ataviile Leza foo.—Mako 1:1; Luka 1:32.
Yesu Klistu nawe kwene atalanzilepo ukuti Maliya wali a nyina wakwe Leza nanti ukuti walinzile ukucindikwa sana. Nupya walungike nu mwanaci uwalumbanyizye sana Maliya pa kuya nyina wakwe Yesu, wamunenyile ati: ‘Ansansa ayao akauvwa mazwi yakwe Leza nu kuyayela.’—Luka 11:27, 28.
Mazwi ya kuti “Nyina Wakwe Leza” na “Theotokos” (uwaviile Leza) yasizanwa muli Baibo.
Amazwi yakuti “Namwene wa Mwiyulu” aya muli Baibo yasilozya kuli Maliya, lelo yalozya kuli kaleza kanaci kano aina Izlaeli asangu yapepanga. (Yelemiya 44:15-19) “Namwene wa Mwiyulu” limwi wali a Asyitaloti kaleza kanaci aka ina Babiloni.
Aina Klistu yatapepanga Maliya, nupya yatamupelanga mucinzi ucizilemo. Umuntu umwi akalondelezya ivya mpiti walanzile ati Aina Klistu “yakaananga ukuya mu tumaumba tunono utwamapepo nupya yatiinanga ukuti ndi cakuti yatandika ukupeela sana Maliya mucinzi cali nu kuya kwati yakupepa kaleza kanaci.”—In Quest of the Jewish Mary.
Baibo ikalanda ukuti Leza wene wayako lyonsi. (Masamu 90:1, 2; Ezaya 40:28) Fwandi vino atakwata intandikilo, atanga akwate nyina. Cuze icakuti, Maliya atanga asende Leza mu ndilwa yakwe; Baibo ikalanda ukwaula nu kupita mu mbali ukuti nanti sile amayulu kwene yatanga yamukumane.—1 Yamwene 8:27.

Maliya a Nyina Wakwe Yesu asi “Nyina Wakwe Leza” foo

Maliya wali u Muyuda, nupya wafumile mu mupanda wa Mwene Davidi. (Luka 3:23-31) Leza wamutaizye sana pa utailo uno wakweti alino ni cuvwila. (Luka 1:28) Leza wasoolwile Maliya ukuya nyina wakwe Yesu. (Luka 1:31, 35) Nupya Maliya pamwi na iya Yosefu yaakweti ana na yauze.—Mako 6:3.

Nanti icakuti Baibo ikalanga ukuti Maliya wizile aya umusambi wakwe Yesu, Kutaya ulondolozi nauze uwalanda pali aliwe.—Milimo 1:14.

U mulandu ci uno yamwi yakalandila ukuti Maliya a nyina wakwe Leza?

U kupeela sana Maliya umucinzi ukwa kutandikilapo kwatandike ku kusila kwakwe ya 300 C.E. Pa nsita iiya, Icalici Lya Katolika ali lino lyali Likalamba sana mu uteeko wa Ciloma. Ni cacitike i cakuti aingi aatamanyile Leza izile iyaya Aina Klistu ya ufi. Nupya icalici lii lyasambilizyanga ni cisambilizyo icisi ca mu malembelo icakuti Aeneco Yatatu Muli Leza Wenga.

Icisambilizyo cii icakuti Aeneco Yatatu Muli Leza Wenga calenzile antu aingi amu calici ukusondwelela ukuti ndi cakuti Yesu a Leza, ale Maliya afwile ukuya nyina wakwe Leza. Umu 431 C.E., simapepo wa mwi calici lya mu Efeso, wamanyisizye amu calici ukuti Maliya wali a “Nyina Wakwe Leza.” Ukupepa Maliya kwasalangine sana pasicila cakwe Simapepo wii uwa ku Efeso. Nupya lino antu aatamanyile Leza yatandike ukupepa mwi calici lya katolika, iviluwi ni vinkolanya vyakwe Nacisungu Maliya avino yatandike ukupepa sana ukuluta pali tuleza twanaci tuno yapepanga mpiti alikuti ka Alitemi (kano aina Loma yamanga ukuti Diana) na ka Isis.

Umu 432 C.E., Pope Sixtus III Mukalamba wi calici wapekinye ukuti yakuule icalici ilya kucindikilamo “Nyina Wakwe Leza.” Icalici lii lyakuulilwe umupipi ni ng’anda ya kupepelamo ino yacindikilangamo Lucina leza mwanaci uwa uvyazi uwa ina Loma. Kalemba umwi umwanaci walondolwile icalici lii ukuti lyali icilangililo cakwe Nyina Mukalamba uwa tumaumba twa yantu aatamanya Leza uku kaliumba kakwe Maliya pa cisila ca ina Klistu ali mu Loma.—Mary—The Complete Resource.

a Amu mipepele iingi yakasambilizya ukuti Maliya a nyina wakwe Leza. Yakamwama ukuti a Namwene wa Mwiyulu” nanti ukuti Theotokos izwi lya Cigliki ilikapiliula ukuti uwaviile Leza.”