Yesu Watuuzile Antu—Wayatuuzile Uli?
Vino Baibo yalandapo
Yesu wapuswisye antu acuvwila lino wapeezile umi wakwe ukuya impolelwa. (Mateo 20:28) Fwandi, acino Baibo ikaamila Yesu ukuti “Katuula wa antu amu nsi.” (1 Yoane 4:14) Ikalanda nu kuti: “Kusi umuntu nanti wenga muno antu yangazana ufyusi, pano muno nsi yonsi kusi zina na lyuze lino Leza wapeela kunotuli lyakuti tutuulilwemo.”—Milimo 4:12.
Yesu ‘wacuzile kufika lino wafwilile antu yonsi’ aamutaila. (Ayebulai 2:9; Yoane 3:16) Pa cisila, “Leza wamuzyukwile kufuma ku afwe,” nupya Yesu waswilile ukwi yulu mu mwili wa mupasi. (Milimo 3:15) Kuku, Yesu lyene “akweti maka akutuula yao akaiza kuli Leza kupitila munoli, pano wene uwa umi manda pe pa kuyapapatilako kuli Leza.”—Ayebulai 7:25.
U mulandu ci uno tukalondela Yesu ukutupapatilako?
Swensi sweswe ya kaifya. (Loma 3:23) Iifyo lyatutalwisye kuli Leza, nu kututungulula ku mfwa. (Loma 6:23) Nomba Yesu waya wakwe ‘kavwangila’ wa antu yonsi aaya nu utailo mu mpolelwa ino wapiile. (1 Yoane 2:1) Akayapapatilako, kulenga Yeova kuti auvwa mapepo yao nu kuyeleela maifyo yao kupitila mu mpolelwa ino wapeezile lino wafwile. (Mateo 1:21; Loma 8:34) Yeova akauvwa kulenga kuno Yesu akatulengelako pano vino akaleenga vikalingana nu kulonda kwakwe. Leza watumile Yesu ukwiza pano nsi “kuti atuule umi wao.”—Yoane 3:17.
Uzye ukuzumila sile muli Yesu i cingalenga sile umuntu ukupusuka?
Awe. Nanti icakuti tulinzile kuzumila muli Yesu pakuti tukapusuke, kwaya na vyuze vino tulinzile ukucita. (Milimo 16:30, 31) Baibo ikati: “Caleka, vino mwili uwaula mupasi ala ufwe, vivyo kwene nu utailo uwaula milimo isuma nao ufwe.” (Yakobo 2:26) Pakuti tukapusuke, tulinzile:
Kusambilila pali Yesu na Isi, Yeova.—Yoane 17:3.
Kuya nu utailo muli aliyo.—Yoane 12:44; 14:1.
Kulangizya utailo witu lino tukuvwila masunde yao. (Luka 6:46; 1 Yoane 2:17) Yesu wasambilizye ukuti asi muntu wensi akangama ati, “Mwene”, alatuulwa suka sile yao “aakacita kulonda kwakwe Isi uwa mwi yulu.”—Mateo 7:21.
Kutwalilila ukukomya utailo asi mulandu nu kucuziwa. Yesu walanzile pa cisinka cii lino watiile: “Lelo wino wensi alaposya kufika nu ku mpelelekezyo wene alatuulwa.”—Mateo 24:13.