Uzye Baibo Ikasambilizya Ukuti ‘Ndi Wapusuka Lyonga Ala Casila Wapusikilila’?
Vino Baibo yalandapo
Awe, isisambilizya icisambilizyo cakuti ‘ndi cakuti umuntu wapusuka lyonga ala casila wapusikilila.’ Umuntu wino wapusuka pa mulandu wa kutaila muli Yesu Klistu angata ukuya nu utailo uwo nu kupanya ipusukilo ilikaiza pa mulandu wakukwata utailo. Baibo ikati ukutwalilila ukuya nu utailo kukalondekwa ukuombesya sana “umu ulwi.” (Yuda 3, 5) Aina Klistu akutandikilako apokeliile Klistu yayanenyile ukuti: “Twalililini kuomba mu coopo nu kuzakaza kuti mufikilizye ufyusi winu.”—Filipi 2:12.
Malembelo aakakanya icisambilizyo ca ‘kupusuka lyonga ala casila wapusukilila’
Baibo ikatucelula pa maifyo aipisye angalenga umuntu ukukanaiza ingila umu Wene Wakwe Leza. (1 Kolinto 6:9-11; Galatiya 5:19-21) Ndi cakuti isyuko lya kupusuka litange liponge, ala ukucelula kuko u kwa sile sile. Nomba, Baibo ikalangilila ukuti umuntu uwatapusuka angapona nupya ndi cakuti waswilila uku kucita maifyo aipisye. Pa Ayebulai 10:26 pakati: “Pano ndi tukwifya ku mufulo nalino cumi cati cimanyikwa kunotuli lyene kutangaya impolelwa yakufumya maifyo itu.”—Ayebulai 10:26; 6:4-6; 2 Petulo 2:20-22.
Yesu wakomaile pa ucindami wa kutwalilila ukuya nu utailo lino wapeezile icilangililo muno waikolinye umwineco uku mutingi na alondezi yakwe uku misambo iyali uku mutingi uwa. Yamwi pa nsita imwi yangalanga ukuti yamutaila ndi mwalola ivizao vyao, nanti vino yakacita, nomba lino papita insita iyata ukucita vivyo “yasumbwa wa musambo usiseeka,’ nu kupanya isyuko lya kupusuka. (Yoane 15:1-6) Umutumwa Paulo waomvizye icilangililo icilicimwi lino walanzile ukuti Aina Klistu asitwalilila ukuya nu utailo ‘yalaputulwa.’—Loma 11:17-22.
Aina Klistu yakakomeleziwa kutwalilila ukuya ‘apempule.’ (Mateo 24:42; 25:13) Yayo aakafwa muli vyakwe Leza nampo ngu mu “kucita milimo ya mu mfinzi” nanti kukanaomba ningo imilimo ino Yesu watunenyile ukuti twaomba, yalapanya isyuko lyakupusuka.—Loma 13:11-13; Umbwilo 3:1-3.
Amalembelo aingi yakalanga ukuti yonsi yano yatuulwa yalinzile ukutwalilila ukuzizimizya umu utailo ukufika nu ku mpela. (Mateo 24:13; Ayebulai 10:36; 12:2, 3; Umbwilo 2:10) Aina Klistu ya kutandikilako yazanzile sana lino yuvwile ukuti Aina Klistu yauze yazizimizyanga umu utailo. (1 Tesalonika 1:2, 3; 3 Yoane 3, 4) Uzye cingaya sile ningo Baibo ukukomaila pa kuzizimizya umu utailo ndi cakuti yayo atazizimizye yalapusuka nayo kwene?
Lino umutumwa Paulo wali mupipi nu kufwa, alino uvwile ukuti mu cumi cumi wali nu kupusuka. (2 Timoti 4:6-8) Pa kutandika kwa mulimo wakwe, wilwike ukuti angavilwa ukwizapusuka ndi cakuti walondelela ivilondwa vya mwili. Walemvile ukuti: “Nemo nkaomvya mwili wane uluku uluku kuti uye wa muzya wantontela, nkacita vii pakuti ntakasumbwe kunzi pacisila ca kukosola Ilandwe Lisuma kuli yauze, nkaye kwati awiyo watapotwa.”—1 Kolinto 9:27; Filipi 3:12-14.