Makuule Aomvilwe Lino Kutatala Kwaya Ulwale Wakwe COVID-19

Pa mulandu wakuti cila mwaka antu aingi yakubatiziwa, tukulondekwa ivikuulwa ivingi vya kuomvya pa kupepa Yeova. Aa muli Dipatimenti ya Makuule yapekinye ukuti kuye ukukuula nu kuzifya ivikuulwa vya kupepelamo ukucila pali 2,700 umu nsi yonsi, umu mwaka wa mulimo wa mu 2020.a

Lelo umukupumikizya, mapekanyo yaa yapuvyanyiziwe nu ulwale wakwe COVID-19. Pakuti yacingilile aina na ya nkazi alino nu kulondela masunde ya uteeko, aa muli Komiti Iikaangalila ku Mpapulo na Makuule Iiumba Ilikatungulula iimike amakuule aingi umu nsi yonsi. Nanti ciye vivyo, mu mwaka uwa mulimo wa mu 2020, ivikuulwa vya kupepelamo ukucila pali 1,700 vyakuuzilwe nu kuzifiwa lino ulwale utali utandike. Kulunda pali vii, vikuulwa vya pa misambo ukucila pali 100 vyakuuzilwe nu kuzifiwa. Lolini vino imilimo iili iyaomvilwe yazwilizye aina.

Musambo wa ku Cameroon. Ivikuulwa ivya pa musambo uwayelile ku Douala vyali ivinono, fwandi yalondekwanga ukuvikuzya. Komiti Ikaangalila ku Mpapulo na Makuule yaweni ukuti cikulondekwa ukuzifya ivikuulwa, nomba ukucita vivyo kwali nu kusenda impiya izingi ukucila pali zino ivikuulwa vivyo vingakaziwilwapo. Nupya yalondelizye nu kuzana ukuti cingazipa ukukuula ivikuulwa pa ncende yuze, kukala nanti ukuzifya ivya mpiti, nomba ukulingana na vino ivintu vyali, pasi ivyaomvile.

Lelo aina izile iyamanya ukuti aa mu uteeko yakupekanya ukuti yapange umuseo umupiipi ni Cikuulwa ca Ukongano icayela ku katutu ka musumba wa Douala. Museo uu wali nu kulenga ciyangukile ukuomba nu kutwala ivikulondekwa kuno yakukuulila. Vii vyalinganyile sana ni vyalondekwanga pakuti umusambo ukuulwe. Fwandi Iumba Ilikatungulula lyazumilizye ukuti yakuule ivikuulwa vya misambo pa cende ili imwi na payelile Icikuulwa ca Ukongano.

Ya Nte yaombiile pamwi na yano yalemvile incito pa kuomba umulimo uu wa ukuule, na cii calenzile ukuti yatasumbapo insita ikulu nu kuomvya sile impiya izilinge. Alino impiya zino yaomvizye uku mulimo uu zyacefile sana ukucila zino yenekelanga icakuti kwasile impiya ukufika ku madola 2 milyoni. Cii calenzile ukuti aa mu lupwa lwa pa Betele yakuukile uku vikuulwa vii lino ulwale wakwe COVID-19 utatala watandika.

Aomvi ya pa Betele aa ku Cameroon yakaipakizya ukwikala nu kuombela pa ncende ii isuma nupya yakalola ukuti vikuulwa vii vya pa musambo ivipya u wila ukufuma kuli Yeova. Atwalane yamwi yalanzile ukuti: “Tukulonda ukulaombesya nu kulanga ukuti tukataizya sana pa wila uu.”

Iofesi Lyakwe ya Kasenula ya Citojolabal ku Mexico. Pa myaka ingi, aakasenula ululimi lwa Citojolabal yaombelanga uku musambo wa ku Central America uwayela umupiipi nu musumba wa Mexico City. Lelo, ululimi lwa Citojolabal lukalandwa sana uku ncende ya Altamirano na Las Margaritas izyayela ukwatalimpa umupiipi na makilomita 1,000 ukufuma ukwayela umusambo. Na cii calenganga ukuti catalila ya kasenula ukumanya amazwi yamwi aata ukuomviwa umu lulimi lwa Citojolabal. Nupya catalilanga aa ku musambo ukuzana aina na ya nkazi umupiipi angasenula nu kukopa amazwi umu lulimi kwene luu.

Pa mulandu na vii, aa muli Komiti Iikalemba Iya Mwi Umba Ilikatungulula yalondanga ukuti aakasenula ululimi lwa Citojolabal yakuukile uku ncende kuno ululimi kwene luu lukavwangwa. Pakuti yakwanisye ukucita vii, aa ku musambo yapingwilepo ukukala icikuulwa nu kucizifya. Ukucita vii, kwali nu kulenga yataomvya impiya izingi wakwe vino cingaya nga yakuula maofesi nanti ukusonkela.

Kasenula umwi walanzile ivisuma ivyacitika pa mulandu nu kukuuka kuu lino watiile: “Pa myaka 10 ino naomvile umulimo wa kusenula pa musambo, ntatazile nzane ulupwa umupiipi ulukalanda ululimi lwane. Ndakai iofesi lyayela kuuku kwene ukwaya antu aakalanda ululimi lwa Citojolabal. Cila wanda nkazanwa na antu akalanda ululimi luu. Na cii, calenga imanye amazwi aingi aakaomviwa umu lulimi luu nupya calenga nu kuti naomba ningo.”

Milimo ilaombwa umu Mwaka wa Mulimo wa mu 2021

Ndi cakuti ivintu vili ningo, umu mwaka wa mulimo uwa mu 2021 itupekanya ukuti kuye ukukuula maofesi yakwe ya kasenula 75 ni vikuulwa vya kuomvya ku masukulu ya mwi uvi. Milimo ikalamba 8 iya pa misambo imatwalilila, ukwikako sile nu mulimo upya wa pa maofesi yakalamba mu nsi yonsi ku Ramapo mu New York alino nu kukuusya umusambo wa ku Argentina nu wa ku Italy. Nupya ukulunda pali vii kukulondekwa Mang’anda ya Wene ukucila pali 1,000, nupya ivikuulwa vya kupepelamo ukucila pali 6,000 vitaaya ningo cikulondekwa ukukuulilapo vyuze, alino Mang’anda ya Wene 4,000 nayo yakulondekwa ukuzifiwa.

Uzye impiya izya kuomvya uku milimo ii ya kukuula nu kuzifya zikafuma kwi? Umwina Lázaro González uwaya muli Komiti ya Musambo wa ku Central America waswike iuzyo lii lino yalazyanyanga pa mulimo wa kukuula Iofesi Lyakwe ya Kasenula ya lulimi lwa Citojolabal. Watiile: “Mu cifulo cino umusambo witu ukaangalila tutakwata impiya izingi. Fwandi nga tutaakwanisye ukukuula iofesi lyakwe ya kasenula ukwaula ukutungililwa na ina umu nsi yonsi. Impiya zino aina na ya nkazi umu nsi yonsi yakasangula zyalenga ukuti ya kasenula yaombela kuuku kwene kuno lulimi lwao lukavwangwa. Tukataizya sana aina na ya nkazi umu nsi yonsi pali ukapekape wao. Icumi kwene, imilimo ii ikaombwa pa mulandu ni misangulo ya mu nsi yonsi, ino mweingi mukasangwilako ukuomvya donate.jw.org.