Ezaya
19 Vii ivilacitikila antu ya mu Ijipti:
Yeova ali api kumbi ilikusimulisya akwiza uku Ijipti.
Ya leza ya sile sile amu Ijipti yalazakaza pa nkoleelo yakwe,
Nupya antu ya mu Ijipti yaluvwa sana intete.
2 “Ndalenga Aina Ijipti ukukatukila Aina Ijipti yauze,
Nupya yalalwisyanya,
Cila muntu alalwisya umwinakwe nu mwinamupalamano wakwe,
Musumba ulalwisya umusumba uze nu wene ulawisya uwene uze.
3 Aina Ijipti yalavulunganyiziwa,
Nupya ndavulunganya mapange yao.
Yalalenga uwazwilizyo kuli ya leza ya sile sile,
Kuli ya sing’anga, kuli yano yakauvwana ni mipasi na kuli ya kasoowela.
4 Ndapeela Aina Ijipti uku musambazi umutale,
Nu ku mwene umukalipe kuti awino ayateeka,” vikwene avino Umwene wa cumi Yeova wa maumba walanda.
5 Ndalenga manzi ya muli yemba ukukama,
Nu luzi lulakama nu kuuma.
6 Inguzi zilanunka;
Inguzi zya mu Ijipti izyafumilila umu luzi lwa Naelo zilakama nu kuuma.
Matete ni mpunga vilaola.
7 Vimelwa ivyaya umupiipi nu luzi lwa Naelo, apatandikila uluzi lwa Naelo,
Ni mpanga yonsi umwaya ivilimwa iyaya umu mbali ya luzi lulo viluuma.
Vilasendwa nu muza nupya vitalayako.
8 Ya kavuwa ya nswi yalaloosya,
Aakasumbila maswelo umu luzi lwa Naelo yalaya nu ulanda,
Na akasumbila masumbo umu manzi yalacepa.
9 Aakapanga ivyakuzwala ukuomvya fulakisi
Na aakapikula ivyakuzwala ivitiswe ukuomvya ica kupikwilako yaluvwa insonyi.
10 Antu yakwe aakapikula ivyakuzwala yalononwa;
Na aomvi yakwe yalaya nu ulanda.
11 Ya cilolo ya mu Zoani aawelewele.
Impandamano zyakwe Falao izyaya sana na mano zikapanda mano auwelewele.
Munganena uli Falao muti:
“Nafuma muli yano yaya na mano,
Kuli ya mwene ya mpiti”?
12 Yali kwi lyene antu yako aamano?
Leka yakunene ndi cakuti iyamanya vino Yeova wa maumba watapingula pali Ijipti.
13 Ya cilolo ya mu Zoani iyacita ivya uwelewele;
Ya cilolo ya mu Nofu iyaiponzya;
Intunguluzi zya mitundu ya mu Ijipti iziponzya yano zikatungulula.
14 Yeova wataleta icimvulunganya pali aliyo;
Nupya iyaponzya Aina Ijipti muli vyonsi vino yakacita,
Wa muntu uwatakoleka, aakupempezyoka nupya aakuluka.
15 Umwina Ijipti wensi atalakwata umulimo wa kuomba,
Aye umukalamba nanti umunono, mucindikwe nanti umusuulwe.
16 Mu wanda uuwa Aina Ijipti yalaya wa yanaci, yalazakaza nu kuvwa intete pa mulandu ni ikasa lyakwe Yeova wa maumba ilya kutiinya lino alakatusya pali aliyo. 17 Nupya impanga ya Yuda ilaalenga Aina Ijipti ukutiina. Yalaaya ni ntete nga yuvwa pa mpanga iiyo pa mulandu na vino Yeova wa maumba wapingula pali aliyo.
18 Mu wanda uuwa kulaya imisumba 5 umu mpanga ya Ijipti muno antu yalaalanda ululimi lwa Ina Kenani nu kulapa ukuti yamayanga acumi kuli Yeova wa maumba. Musumba onga ulaamwa ukuti Musumba wa Ononyi.
19 Mu wanda uuwa yalakuulila Yeova ulambo pakasi ka mpanga ya Ijipti nupya yalimikila Yeova icipilala pa mupaka wa mpanga. 20 Vintu vii vilaya ivimanyililo pakuti antu yaiusya Yeova wa maumba umu Ijipti; pano yalalilila kuli Yeova pa mulandu na antu aalayacuzya, nawe ayalatumila kapususya umukalamba aalayapususya. 21 Nupya Yeova alamanyikwa uku Ina Ijipti, Aina Ijipti nayo yalamanya Yeova umu wanda uuwa, yalapeela malambo ni vya upe nu kulapa kuli Yeova nu kufikilizya vino yalapa. 22 Yeova alafulula Aina Ijipti nu kuyapozya; nayo yalaswilila kuli Yeova, nupya aluvwa ukupaapata kwao nu kuyapozya.
23 Mu wanda uuwa kulaya umuseo uulafuma uku Ijipti ukuya uku Asilya. Lyene Aina Asilya yalaaya uku Ijipti, na Ina Ijipti yalaaya uku Asilya, nupya Aina Ijipti na Ina Asilya yalaaombela Leza. 24 Mu wanda uuwa Izlaeli alaya uwakwe citatu kuilunda uku Ina Ijipti na Ina Asilya, nupya alaya ipaalo umu nsi, 25 pano Yeova wa maumba wayapaazile ati: “Muye aapaalwe mwe yantu yane Aina Ijipti na mwemuno naumvile mwe Ina Asilya, alino na mwe Ina Izlaeli mwe upyanyi wane.”