Ezekeli

30 Nupya kwene Yeova wanenyile ati: 2 “We mwana wa muntu sesema nu kulanda uti, ‘Yeova Umwene wa Papelapela walanda wati:

“Punda uti, ‘Iyee uwanda ukwiza!’

 3 Pano uwanda iupalama, ee, uwanda wakwe Yeova iupalama.

Ulaya uwanda wa makumbi, kuli kuti insita isoololwe iya nko.

 4 Ulupanga luliza pali Ijipti, nupya Aina Etiopia yaluvwa sana intete lino Aina Ijipti yalakomwa;

Lino ivyuma ivya mu mpanga vilasendwa, nupya lino umufula ulononwa.

 5 Aina Etiopia, Aina Puti, Aina Ludi, na antu aafuma umu nko zyuze,

Aina Kubu pamwi na ana amu mpanga yakwe Izlaeli aaya umu upangano,*

Yonsi kwene yalakomwa uku lupanga.”’

 6 Yeova walanda wati:

‘Aakatungilila Ijipti nayo kwene yalafwa,

Na maka yakwe yano akauvwilamo cilumba yalasila.

“‘Antu kufuma uku Migidoli kufika ku Siyene yalakomwa uku lupanga,’ avino Yeova Umwene wa Papelapela walanda. 7 ‘Impanga ya Ijipti ilasyala umwaula icili consi, ni misumba iyayamo ilononeka ukucila imisumba iyasyala. 8 Nupya yalamanya ukuti nene Yeova lino ndakozya umoto umu Ijipti nu konona yonsi yano yakauvwana nayo. 9 Pa wanda uuwa ndatuma antu umu mawato pakuti yakalenge Aina Etiopia aaitaila ukuzakaza; yaluvwa sana intete pa wanda uuliza pali Ijipti, pano umu cumi kwene uliza.’

10 “Yeova Umwene wa Papelapela walanda wati: ‘Ndaleta impela apa maumba ya yantu amu Ijipti ukuomvya Nebukadineza umwene wa ku Babiloni. 11 Wene kumwi na asilika yakwe, kuli kuti uluko ulwaya sana nu unkalwe yaliza nu konona impanga. Yalatoola ya panga yao nu kulwisya Ijipti nupya umu mpanga iiya yalazuuzyamo ivitumbi ivya yantu alakomwa. 12 Ndakamya imifolo iyafuma umu Luzi Lwa Naelo nu kukazya impanga uku yantu aipe. Ndonona impanga kumwi na vyonsi ivyayamo ukuomvya antu aku mpanga zyuze. Avino ne Yeova indanda.’

13 “Yeova Umwene wa Papelapela walanda wati: ‘Ndonona ni vilubi vya winyi* na ya leza aasile sile aku Nofu.* Umu mpanga ya Ijipti mutalatala muyepo nupya cilolo,* nupya ndaleka antu amu Ijipti yaye ni ntete. 14 Ndalenga Patulosi asyale umwaula icili consi nupya ndoca Zoani nu kupingula No.* 15 Ndaleta ukali wane pali Sini, kuli kuti umusumba wa maka ukacingilila Ijipti, nupya ndonona antu ya mu No. 16 Ndoca Ijipti; nupya Sini alaya sana ni ntete na asilika yalingila umu No, nupya Nofu* alazanzwa umusanya! 17 Alumendo ya mu Oni* na Pibeseti yalakomwa uku lupanga, na antu ya mu misumba iiyo yalasendwa umu uzya. 18 Umu Tehafunehesi mulaya imfinzi uwanda uno ndakontola iyoko lyakwe Ijipti. Amaka yano akauvwilapo icilumba yalasila ni kumbi lilamuvimba, na antu ya mu mizi yakwe yalasendwa umu uzya. 19 Ndapingula Ijipti, nupya yalamanya ukuti nene Yeova.’”

20 Nupya umu mwaka walenga 11, mu mwezi wa kutandikilako pa wanda uwalenga 7, Yeova wanenyile ati: 21 “We mwana wa muntu imvuna ikasa lyakwe Falao umwene wa ku Ijipti; kusi aalalinyepelela pakuti lipole nanti pakuti likwate maka ya kukatusya ulupanga.”

22 “Fwandi Yeova Umwene wa Papelapela walanda wati: ‘Inja umulwani wakwe Falao umwene uwa ku Ijipti, ndavuna makasa yakwe, kuli kuti ikasa lya maka ni livunike nupya ndalenga ulupanga lupone umu minwe yakwe. 23 Lyene ndasalanganyizizya Aina Ijipti umu nko nu mu mpanga zyuze. 24 Ndakomya makasa ya mwene wa ku Babiloni nu kumulemeka ulupanga nupya ndavuna makasa yakwe Falao, nawe alalila umwi zwi lyuvwike wa muntu aakufwila pa nkoleelo yakwe.* 25 Ndakomya makasa ya mwene wa ku Babiloni, lelo makasa yakwe Falao yalasila amaka; nupya yalamanya ukuti nene Yeova lino ndalemeka umwene wa ku Babiloni ulupanga nupya lino alaluomvya uku kulwisizya impanga ya Ijipti. 26 Ndasalanganyizizya Aina Ijipti umu nko nu mu mpanga zyuze, nupya yalamanya ukuti nene Yeova.’”