Ezekeli

32 Mu mwaka uwalenga 12, mu mwezi uwalenga 12, pa wanda wa kutandikilako, nupya kwene Yeova wanenyile ati: 2 “We mwana wa muntu, imbila Falao umwene wa ku Ijipti ulwimbo lwa kuloosya uti,

‘Wali wakwe cisama umukome umu nko,

Lelo watulengwa ukuya mya.

Wali wa cilyanyi ca mu manzi, wasampolanga manzi mu nguzi zyako,

Walyatolanga manzi nu kuyavundola.’

 3 Yeova Umwene wa Papelapela walanda wati:

‘Ndakuteya isumbo kuomvya iumba lya nko izingi,

Nayo yalakusunkila umwi sumbo.

 4 Ndakusumba umu mpanga;

Nu kukusya mumo kwene.

Ndalenga ivyunyi vya mu lwelele viwe pali wewe,

Nupya ndakupeela uku vilyanyi vya mu nsi yonsi kuti vikulye.

 5 Ndasumbila umwili wako pa myamba

Nu kuzuuzya ivipimfya vyako ivilasyalako umu mikonko.

 6 Ndaomvya impanga nu wazi wako ukufika nu ku myamba,

Nupya ulazuula umu nguzi.’

 7 ‘Lino ulononwa ndavimba mayulu nu kuleka intanda zitawala.

Ndavimba ilanzi na makumbi,

Nu mwezi utalawala.

 8 Ndazimya vyonsi ivikapeela uluswepo ivya mwi yulu pa mulandu naawe,

Nupya ndalenga umu mpanga yako muye imfinzi,’ avino Yeova Umwene wa Papelapela walanda.

 9 ‘Ndasosya antu aingi lino ndatwala azya yako uku nko zyuze,

Ku mpanga zino utamanya.

10 Ndalenga antu aingi ukuzunguka,

Nupya ya mwene yao yaluvwa sana intete pa mulandu naawe lino yalalola nakatusya ulupanga lwane.

Cila muntu alatwalilila ukuzakaza pa mulandu nu kutiina ukuti amafwa

Pa wanda uno ulononwa.’

11 Pano Yeova Umwene wa Papelapela watalanda wati:

‘Ulupanga lwa mwene wa ku Babiloni luliza pali wewe.

12 Ndalenga asilika yako ukukomwa nu lupanga uku yasilika ya maka,

Kuli kuti uku nko zyonsi izyaya sana nu unkalwe.

Yalamala icilumba cakwe Ijipti na asilika yakwe yonsi yalaloviwa.

13 Ndonona iviteekwa vyakwe vyonsi umupiipi na manzi yakwe aingi,

Nupya kusi umuntu nanti iciteekwa icilatala civundolepo manzi nupya.’

14 ‘Pa nsita iiya ndasengulula amanzi yao,

Ni nguzi zyao zilaakonkoloka wa mafuta,’ avino Yeova Umwene wa Papelapela walanda.

15 ‘Lino ndonona impanga ya Ijipti nu kuleka isyale umwaula icili consi,

Nupya lino ndonona antu aakaikalamo,

Yalamanya ukuti nene Yeova.

16 Luu u lwimbo lwa ulanda nupya antu yalaalwimba;

Ana akazyana yalaalwimba.

Yalaimbila Ijipti na asilika yakwe yonsi,’ avino Yeova Umwene wa Papelapela walanda.”

17 Lyene umu mwaka uwalenga 12, pa wanda uwalenga 15 Yeova wanenyile ati: 18 “We mwana wa muntu loosya pa yasilika Aina Ijipti nupya ulande uti yene pamwi na antu ya mu nko izya maka yalaziikwa wa yantu yonsi aafwa.

19 “‘Uzye ukwelenganya ukuti wacila yauze ukuyemba? Ulafwa nu kuziikwa pamwi na antu aatazembululwa!’

20 “‘Aina Ijipti yalafwila pamwi na alakomwa nu lupanga. Ijipti watalowa ukuomvya ulupanga; musende kumwi na asilika yakwe yonsi.

21 “‘Asilika ya maka sana yalalanda kuli aliwe na kuli yakaazwa yakwe ala yali umwi Lindi.* Icumi kwene yalakomwa nu lupanga nu kuziikwa wa yantu aatazembululwa. 22 Asilya waya kuuku kwene pamwi na antu yakwe yonsi. Malindi ya yantu yakwe yonsi aakomilwe nu lupanga yaamuzinguluka. 23 Malindi yakwe yaaya apazike sana umu nsi, na malindi ya yantu yakwe aakomilwe nu lupanga yaazinguluka ilindi lyakwe, pano yalenganga antu ya mu nsi ukuya ni ntete.

24 “‘Elamu waya kuuku kwene na malindi ya yasilika yakwe yonsi aakomilwe nu lupanga yaamuzinguluka. Antu alenganga antu ya mu nsi ukuya ni ntete yaakomwa nu kuziikwa ukwaula ukuzembululwa. Lyene yalazewanila pamwi na antu yonsi aaziikwa. 25 Yaamupangila bedi umu yantu aakomwa, pamwi na asilika yakwe yonsi aazinguluka malindi yakwe. Aakomwa nu lupanga yonsi yatazembululwa pano yalenganga antu ya mu nsi ukuya ni ntete nupya yalazewanila pamwi na antu aaziikwa. Elamu waziikwa pamwi na antu aakomwa.

26 “‘Kuuku kwene u kwaya Misyeki na Tubali pamwi na asilika yao yonsi. Malindi yao yonsi yaamuzinguluka. Aakomilwe nu lupanga yonsi yatazembululwa, pano yalenganga antu ya mu nsi ukuya ni ntete. 27 Uzye yatalaziikwa pamwi na asilika ya maka aatazembululwa akomilwe nu kuziikwa umwi Lindi* kumwi ni vyanzo vyao ivya ulwi? Nupya antu isile ya panga uku mitwe yao* nupya mafupa yao yafulwilwe pa mulandu ni membu zyao, pano asilika yaa amaka yacuzyanga antu ya mu nsi. 28 Lelo wemo ulononelwa pamwi na antu aatazembululwa nu kuziikwa na yayo aakomilwe nu lupanga.

29 “‘Edomu waya kuuku kwene pamwi na ya mwene yakwe ni ntunguluzi zyakwe zyonsi izyakomilwe nu lupanga nanti cakuti zyakweti amaka, nupya nayo kwene yalaziikwa pamwi na antu aatazembululwa na yonsi aafwa.

30 “‘Intunguluzi zyonsi izya ku katutu zyaya kuuku kwene, kumwi na Ina Sidoni yonsi aazewanyile nu kuziikwa pamwi na antu aafwa, asi mulandu na vino yalenganga antu ukuya ni ntete pa mulandu na maka yao yalaziikwa ukwaula ukuzembululwa pamwi na antu aakomilwe nu lupanga. Nupya yalazewanila pamwi na antu aafwa.

31 “‘Falao alalola ivintu vii vyonsi nupya alateekeziwa pali vyonsi ivyacitikiile asilika yakwe; wene pamwi na asilika yakwe yonsi yalakomwa nu lupanga,’ avino Yeova Umwene wa Papelapela walanda.

32 “‘Pa mulandu wakuti Falao walenganga antu ya mu nsi ukuya ni ntete, wene pamwi na asilika yakwe yalaziikwa pamwi na antu aatazembululwa, aakomwa nu lupanga,’ avino Yeova Umwene wa Papelapela walanda.”