Uzye Baibo Ingamwazwa Uli?

Swensi kwene tukalonda ukumanya ivingi pa umi witu, mulandu uno tukaculila, mulandu uno tukafwila ni vilacitika uku nkoleelo. Nupya tukasakamala na pali vino vikacitika cila wanda, wakwe vino tungazana impiya izyakuti twaisakamala muli vino tukalondekwa na vino tungaya ni nsansa mu lupwa. Antu aingi yazana ukuti Baibo isiyazwa sile ukuzana masuko ku mauzyo acindame sana lelo ikayazwa nu kumanya ivya kucita pakuti yaipakizya umi. Baibo ingaazwa umuntu ali wensi wino mungelenganyapo.

1. A mauzyo ci yamwi yano Baibo ikaasuka?

Baibo ikaasuka mauzyo yaa acindame sana. Uzye umi watandike uli? U mulandu ci uno twayelako? U mulandu ci uno antu yakaculila? I vyani vikacitika umuntu nga wafwa? Ndi cakuti antu yonsi yakalonda umutende, u mulandu ci uno kukayela inkondo? I vyani vilacitikila insi uku nkoleelo? Baibo ikatukomelezya ukulonda amasuko ku mauzyo kwene yaa, nupya aingi yazana ukuti amasuko ku mauzyo yaa yayazwa sana.

2. Uzye Baibo ingamwazwa uli ukuipakizya umi?

Baibo ikatupanda amano. Ikasambilizya amu lupwa ivya kucita pakuti yaya ni nsansa. Ikatunenako vino tungacita nga twasakamikwa nanti ukutonta sana na vino tungacita pakuti twaipakizya incito ino tukaomba. Mulamanya vino Baibo ikalanda pa malyasi yaa alino na yauze lino tukuya tukulanzyanya. Limwi mulalola ukuti “Malembelo yonsi [vyonsi ivyaya muli Baibo] yangamwazwa.”—2 Timoti 3:16.

LONDELEZYINI NA VYUZE

Sambililini vino Baibo yavwa antu aingi, vino mungacita pakuti mwaipakizya ukuibelenga nu mulandu uno cazipila ukwazwiwa na yauze pakuti tuyuvwikisye.

3. Baibo ingatutungulula

Baibo yaya wakwe toci. Ingatwazwa ukupingulapo ningo pa vintu nu kutunena ivilacitika uku nkoleelo.

Belengini Masamu 119:105, alino mulanzyanye mauzyo yaa:

• Uzye uwalemvile masamu yaa welenganyanga vyani pali Baibo?

• Uzye mukaelenganya uli pali Baibo?

4. Baibo ingasuka mauzyo itu

Mwanaci umwi wazanyile ukuti Baibo yaswike amauzyo amucuzizye pa myaka iingi. Tambini VIDYO, alino mulanzyanye mauzyo atiyalondelelapo.

VIDYO: Twalililini Ukuya nu Upalilo! (1:48)

• A mauzyo ci yano umwanaci wino itwatamba muli vidyo wakweti?

• Uzye ukusambilila Baibo kwamwazwile uli?

Baibo ikatukomelezya ukulauzya mauzyo. Belengini Mateo 7:7, alino mulanzyanye iuzyo ilyalondelelapo:

• A mauzyo ci yano mwakwata yano Baibo ingaasuka?

5. Mungaipakizya ukubelenga Baibo

Antu aingi yakaipakizya ukubelenga Baibo nupya ikayazwa. Tambini Vidyo, alino mulanzyanye mauzyo atiyalondelelapo.

VIDYO: Kubelenga Baibo (2:05)

• Uzye acance ali yali muli vidyo, iyakuvwa uli lino iyakubelenga Baibo?

• Nanti icakuti yataatemwa ukubelenga, u mulandu ci uno iyatemelwa ukubelenga Baibo?

Baibo ikatunena ukuti ingatutungulula, ukututeekezya alino nu kutupeela upaalilo. Belengini Loma 15:4, alino mulanzyanye iuzyo lii:

• Uzye vino Baibo yalaya ukuti ivintu vilazipa uku nkoleelo vikalenga mwauvwa uli?

6. Antu yauze yangatwazwa ukuvwikisya ivyaya muli Baibo

Ukulunda pa kuibelengela Baibo aineco, antu aingi ndakai yazana ukuti cikayangukila ukuvwikisya malembelo ndi cakuti yakulanzyanya na yauze pali Baibo. Belengini Milimo 8:26-31, alino mulanzyanye iuzyo lii:

• Tungacita uli pakuti tuvwikisye ivyaya muli Baibo?—Lolini vikomo 30 na 31.

VINO TWASAMBILILA

Baibo ikatunena vino tungacita pakuti twaipakizya umi, ikaasuka mauzyo acindame sana, nupya ikateekezya antu nu kuyalenga yaye nu upaalilo.

I vyani vino mwasambilila?

• I vyeo ci ivyakutwazwa vino tungazana muli Baibo?

• A mauzyo ci yamwi yano Baibo ikaasuka?

• I vyani vino mungatemwa ukusambilila muli Baibo?

LONDELEZYINI

Lolini vino ivyeo ivyaya muli Baibo vingatwazwa ndakai.

“Baibo Ikasambilizya Ivingazwa Antu Manda Yonsi” (Lupungu Lwa Mulinzi Na. 1 2018)

Uvwini vino Baibo yazwile umonsi umwi uwaculanga na melenganyo ukufuma sile uku wance.

Vino Umi Wane Watandike Ukuziipa 2:53

Sambililini vino Baibo ikaazwa amu lupwa ukuya ni nsansa.

“Ivintu 12 Ivingaazwa Indupwa Ukuya ni Nsansa” (Zyukini! Na. 2 2018)

Sambililini vino Baibo ikasambilizya pa ufi uno aingi yamanya pali wino akateeka insi.

U Mulandu ci Uno Mulinzile Ukusambililila Baibo? —Yonsi 3:14