VINO TUNGACITA LINO IVINTU VYAKOMA IMITENGO
Mwaikala Ukulingana na Vino Ivintu Vili
Ndi cakuti ivintu vikukoma umutengo panono panono, tutanga tulole nu kuti ivintu ivisenuka, sana sana ndi cakuti impiya zino tukakwata nazyo zikuya zikuvulilako. Nomba ndi cakuti ivintu vyakoma sana umutengo ukwaula ukuti impiya zino tukakwata nazyo zivulileko, cingalenga ukuti twasakamala sana, sana sana ndi cakuti twakwata ulupwa ulwa kusakamala
Tutanga tuleshe ukuti vintu vitakoma umutengo. Nomba ndi cakuti twatandika ukwikala ukulingana na vino ivintu vili, cingalenga ukuti vintu viyeko ningo.
MULANDU UNO CACINDAMILA UKUCITA VII
Antu yano yakasenuka nu kutandika ukwikala ukulingana na vino ivintu vili, cikayangukila . . .
ukuya ateekele. Nupya ndi cakuti itukeeka umwenzo, tukaelenganya ningo nu kupingula ningo pa vintu.
ukutaluka uku vintu ivingalenga ivintu ukwipilako. Wakwe, citanga ciye ningo ukukanalipila ivintu vino tulinzile ukulipila nu kuomvya impiya uku vintu vino tutakulondekwa sana.
ukutaluka uku kupazyanya na amu lupwa pa mpiya.
ukumanya vino yangacita pakuti vintu viyeko ningo, pali vii pangaya nu kukanaomvya sana impiya alino nu kwelenganya sana pa vintu vino yakulondekwa lino yatatala yakala.
VINO MUNGACITA
Mwaitemelwa ukusenuka. Lino ivintu vyakoma sana imitengo, cingazipa ukwezya ukucefyako ivintu vino mukakala. Antu yamwi yakaezya ukulacita ivintu kwati yakwata sana impiya, ukucita vii kungalenga ukuti ivintu viyatalile sana! Antu ya musango uu yakailetela sana intazi. Ndi cakuti mwakwata ulupwa, mufwile mukalondesha ukusakamala amu lupwa lwinu nu kuyapeela vino yakulondekwa. Lelo mwaiusha ukuti: Amu lupwa lwinu yakalonda ukuyalanga ukutemwa alino nu kukwata insita iya kuya pamwi nayo ukucila ivintu vyonsi.
Ukulaikala kwati twakwata sana impiya kungalenga ivintu vitutalile sana