VINO TUNGACITA LINO IVINTU VYAKOMA IMITENGO

Mwaomvya Ningo Impiya

Swensi kwene tukacula pa mulandu nu kukoma kwa mitengo. Nomba mutalinzile ukulayuvwa ukuti pasi vino mungacita ivingamwazwa. Kungaya vimwi vino mungacita pakuti vintu viyeko ningo.

MULANDU UNO ICICINDAMILA UKUCITA VII

Ndi cakuti mutakwezya na maka ukuomvya ningo impiya zino mukweti, cingalenga ukuti mukwate intazi izingi, nupya cingalenga ukuti mwasakamikwa sana. Nanti icakuti imukwata sile impiya izinoono, kwaya ivintu ivingi vino mungacita ivingalenga ukuti ivintu viyeko ningo.

VINO MUNGACITA

Mwakala ivintu ukulingana ni impiya zino mukweti. Nga mwacita vii, mulayuvwa ukuti mukuomvya ningo impiya nupya mulaya aipekanye uku ntazi izingacitika ukwaula ukwenekela.

Pakuti mwakala ivintu ukulingana ni impiya zino mukweti, mwatantika vino mukulonda ukukala, ukucita vii kulamwazwa ukukanaomvya impiya ukucila pali zino mukweti. Lino mukutantika ivyakukala, mwaika sana mano kuli vino mukulondekwa sana. Lyene, mwaezya na maka ukulondela vino imutantika, nupya mungasenuka ndi cakuti ivintu vyakoma umutengo nanti ndi cakuti icipendo ca mpiya zino mukakwata casenuka. Ndi cakuti mwatwala nanti ukutwalwa, mulinzile ukuombela pamwi na ya winu lino mukutantika ivintu.

Ezyini ukucita vii: Ukucila ukukala ivintu pa nkongole, mwalipila sile ndi cakuti imukwata impiya. Yamwi yazana ukuti ukucita vii kukayazwa ukuomvya ningo impiya ukulingana na vino iyatantika nu kukanakwata inkongole. Mwapituluka nu mu vipepala vya ku banki ivikalangilila impiya zino mwakweti alino na zino mwaomvizye. Ukumanya impiya zino mukweti kulamwazwa ukuteeka umwenzo.

Cingamutalila ukulakala ivintu ukulingana ni impiya zino mukweti. Nomba ndi cakuti mukutantika ningo ivya kukala, cilamwazwa. Nupya mutalasakamala sana pa mpiya.

Mwapenduluka “impiya izingalondekwa.”—Luka 14:28.

Mwacita ivingalenga mutwalilile ukuomba incito ino mukaomba. I vyani vino mungacita pakuti mutwalilile ukuomba incito ino mukaomba? Vimwi vino mungacita aevi: Mwafika zuwa pa ncito. Mwalola ivisuma umu ncito ino mukaomba. Mwalanga ukuti mukalonda ukwazwa yauze nupya mwaombesha. Mwaya nu mucinzi. Mwalondela masunde nu kuzifyako imiombele inu.

Mutaonona impiya. Muyuzye mweineco ukuti, ‘Uzye nkaomvya impiya uku vintu vino ntakulondekwa sana nanti vino vitanga vingazwe?’ Wakwe, antu aingi yakaomvya impiya zyao uku milembo ikavulunganya uongo, kusitika, ukupeepa fwaka, nanti ukumwesha uwengwa. Ukucita vii kungalenga umi wao ukukanaya ningo nupya cingalenga incito ino yakaomba ukusila.

“Uwa nsansa u muntu aakazana mano . . . Ukuzana mano kwazipa ukucila ukukwata siuva.”—Mapinda 3:13, 14.

Mwasunga impiya izya kuomvya nga kwacitika ivyaula ukwenekela. Ndi cakuti mungakwanisha, mwasunga impiya izilinge zino mungaomvya nga kwacitika vimwi ivyaula ukwenekela. Impiya zii zilamwazwa ukukanasakamala sana ndi cakuti umwi uwa mu lupwa walwala sana, yamuzinga incito nanti ndi cakuti kwacitika vyuze ivyaula ukwenekela.

“Insita ni vintu ivikacitika ukwaula ukwenekela vikaponela yonsi.”—Kasambilizya 9:11.

Ivingamwazwa ukusunga impiya

Ilingi mwapekanyizya ivyakulya pa ng’anda.

Ndi cakuti ilingi mukuliila ivyakulya uku ncende zyuzye nanti ukukala ivyakulya ivipekanyizizye limwi alino ni vyakumwa cingalenga mwasumba sana impiya. Kwene, cikalondekwa insita ikulu alino nu kuombesha pakuti mupekanye ivyakulya pa ng’anda, nomba nanti ciye vivyo, cingamwazwa ukulasunga impiya. Nupya nga mukupekanyizizya ivyakulya pa ng’anda mungavipekanya ukulingana na vino mweineco mukulonda.

Mwaelenganya sana pali vino mukulonda ukukala.

Mwalemba vino mukulonda ukukala nupya mwalondela vino mwatantika. Mwaezya na maka ukukanakala ivintu vino mutaali mwatantika ukukala.
Ndi cakuti ivintu vimwi vitakomile umutengo pa nsita iyo, mwakalila pamwi ivingi ndi cakuti mungakwanisha. Lelo mwasininkizya ukuti mumakwanisha ukusunga ningo ivintu vivyo pakuti vitononeka.
Mwakala ivintu ivitakomile umutengo ndi cakuti ivintu vivyo vili ningo.
Mwakala ivintu pa intaneti pakuti mwakala umu mutengo usuma, ukucita vii kungamwazwa ukukanakala vino mutali mwatantika ukukala nu kulamanya ningo impiya zino mwaomvya. Ndi cakuti ukumwinu kwaya ukukalila ivintu pa intaneti, uzye citanga cizipe ukwezya ukucita vivyo?
Mwakala ivintu vino yakukazya pa mutengo usuma nanti vino iyawezyako umutengo. Mwalinganya imitengo ya vintu vino mukulonda ukukala nupya mwapituluka nu mu vintu vyuze ivilalondekwa wakwe malaiti alino na vyuze.

Mwaelenganyapo sana lino mutatala mwakala ivintu ivipya.

Yano yakapanga mafoni alino ni vintu vyuzye, yakatwalila ukupangilako ivipya pakuti yapanga impiya izingi. Fwandi mwatala imwelenganya nu kuyuzya ukuti: ‘Uzye ukukala icintu cii icipya kulangazwa sana? Uzye pa nsita yii nkulondekwa ukutandika ukuomvya ciombelo cuze? Nupya ndi cakuti avino cili, uzye nkulondekwa icipya sana?’

Mwalungisha ivintu vino mwakwata.

Mwazifya iviombelo vino mwakwata pakuti vingaombako pa nsita itali, nupya ndi cakuti patakulondekwa impiya izingi sana, mwalungisha iviombelo vinu ndi cakuti vyononeka. Ukukala ivintu vino yaomvyapo nako kwene kungamwazwa ukusunga impiya.

Mwailimila ivyakulya.

Uzye mutanga mulole incende imwi pano mungalimila ivyakulya? Pakuti mucefyeko ivintu vino mukalondekwa ukukala, mungalimako vimwi vino mungakazya nanti ukupeelako yauze.

“Mapange ya muntu aakaombesha yakalenga ivintu kumuzipila.”—Mapinda 21:5.

“Ilingi tukapituluka umu mitengo ya vintu vino tukakala nupya tukaelenganyapo sana lino tutatala twaomvya impiya.”—Ya Miles, aa ku England.

“Lino tutatala kwakala vimwi, tukalanzyanya na amu lupwa nu kulemba ivintu vino tukulondekwa.”—Ya Jeremy, aa ku U.S.A.

“Lyonsi tukapituluka umu vintu vino tukakala nu kulola ndi cakuti tungakwanisha, nupya tukasunga ni impiya izya kuomvya ndi cakuti vimwi ivyaula ukwenekela vyacitika.”—Ya Yael, aa ku Israel.

“Twasambilizya ana itu ukulungisha ivintu nga vyononeka ukucila ukukala ivipya. Nupya vikwene avino tukacita na kuli motoka alino ni vintu vyuze ivya mu ng’anda. Nemo na mamane tukaezya kutaluka uku kukala ivintu ivipya ivikupangwa.”—Ya Jeffrey, aa ku U.S.A.

“Nsiomvya impiya izingi pano nkailimila imisalu alino nu kuteekako inkoko. Cii cikalenga napeelako na antu yauze umusaalu.”—Ya Hono, aa ku Myanmar.

Umonsi umwi akusoleela ivyakulya umu gadeni.