Isambililo 2

Ukuya cuza wakwe Leza kwazipa ukucila vyonsi. Leza alamusambilizya ivya kuya nu luzango nu kucingililwa; kapya alamukulula ukufuma uku vintu vya ufi vino antu yamwi yataila, na vino yakacita iviipe. Leza alauvwa mapepo inu. Alamwazwa ukuya nu mutende mu mwenzo winu alino nu kuya nu utailo. (Masamu 71:5; 73:28) Leza alamwavwa umu macuzi yinu. (Masamu 18:18) Nupya Leza akalonda nu kumupeela uwiila wakwe uwa umi wa pe.—Loma 6:23.

Ndi mwapalama kuli Leza, mulapalama na kuli yacuza yakwe Leza. Nayo kwene yalaya yacuza yinu. Kapya yalaya sile wa yanyonko. Yalatemwa ukumusambilizya pali Leza; napya yalamwavwa nu kumukomelezya.

Tutalingana na Leza. Lino mukulonda ukuya cuza wakwe Leza, mulinzile ukumanya icisinka cimwi campomvu. Ukuya cuza wakwe Leza cisi cili cimwi nu kuya cuza wa muntu wino mulingine nawe. Wene uwikolo sana kapya wakwatisya amano alino watucila amaka sana. Aliwe sile alinzile ukututeka. Fwandi nga tukasi kuti tuye yacuza yakwe, tulinzile ukumumvwila nu kucita vino akalonda kuti twacita. Ndi tukucita vii, tulikala ningo.—Ezaya 48:18.