Uzye Mikaeli Umungeli Mukulu A Weni?

UMUNGELI Mikaeli, atalumbulwa sana muli Baibo. Nomba lyonsi lino Baibo yamulumbula, ala pali vino akuomba. Mwibuku lyakwe Danieli, Mikaeli walumbulwa ukuti akulwa ulwi na angeli aipe; muli kalata wakwe Yuda, walumbulwa ukuti akupaazyanya na Satana; lyene umu Umbwilo, walumbulwa ukuti akulwa inkondo na Satana ni viwa vyakwe. Acino fwandi umungeli wii, Mikaeli akalwilako uwene wakwe Yeova nu kulwisya alwani yakwe Leza, na vikwene ali vino cifwile ukuya pano izina lyakwe likapiliula ukuti “A Weni Angalingana na Leza?” Nomba uzye Mikaeli, a weni?

Limwi-limwi antu yakakwata amazina aingi. Wakwe vino Yakobo uwaliko mpiti sana wakweti izina nalyuze ilyakuti Izlaeli, nu mutumwa Petulo nawe wakweti izina nalyuze ilyakuti Simoni. (Utandiko 49:1, 2; Mateo 10:2) Ali vino caya na pa mungeli kwene wii, Baibo ikatulangilila ukuti Mikaeli, i zina na lyuze lyakwe Yesu Klistu ilyaombanga sana lino atatala wiza pano nsi na lino waswililemo ukwiyulu. Katulole Amalembelo amatwazwa ukumanya icisinka cii.

Umungeli Mukulu. Izwi Lyakwe Leza lyalanda pali Mikaeli ukuti u “mungeli mukulu.” (Yuda 9) Fwandi ali mukalamba pa yangeli yonsi. Fwandi kuli kuti kutaaya umungeli namuze uwamuluta. Izina lya kuti “mungeli mukulu” likalanda sile pa mungeli wenga asi pa yangeli aingi. Nupya, Yesu ali wino yalandapo ukuti ali mungeli mukulu. Pali 1 Tesalonika 4:16 [NW] tukawelengapo pali Yesu Klistu uwatuutulwike ukuti: “Mwene umwisikulu aliika ukufuma kwiyulu ni izwi lyakwe ilya maka liluvwika, izwi lya mungeli mukulu.” Fwandi api lembelo lii, izwi lyakwe Yesu lyalondololwa ukuti i lya mungeli mukulu. Acino fwandi ilembelo lii likatulangilila ukuti Yesu ali Mikaeli, umungeli mukulu.

Intunguluzi ya ulwi. Baibo ikati “Mikaeli na angeli yakwe yalwisyanya ni cizoka nga cizoka pamwi na angeli yakweco yalwisyanya nao.” (Umbwilo 12:7) Fwandi Mikaeli, i Ntunguluzi ya angeli acumi. Nupya Umbwilo ukalondolola Yesu ukuti i Ntunguluzi ya angeli acumi. (Umbwilo 19:14-16) Nu mutumwa Paulo kwene walanzile pa “Mwene Yesu” na “angeli yakwe aamaka.” (2 Tesalonika 1:7; Mateo 16:27; 24:31; 1 Petulo 3:22) Fwandi, Baibo ikalanda pali Mikaeli na “angeli yakwe” alino na Yesu na “angeli yakwe.” (Mateo 13:41) Pataaya pano Baibo ikatunena ukuti ukwiyulu kwaya amaumba yaili aa angeli yacumi—ukuti lyonga likatungululwa na Mikaeli nalyuze likatungululwa na Yesu. Acino fwandi tungati Mikaeli ali Yesu Klistu kwene ukwiyulu.a