Uzye “Babiloni Mukulu” A Weni?

IBUKU lya muli Baibo ilyakuti Umbwilo lyakwata amazwi yamwi yano tutafwile ukuvwa sile kulingana na vino lilemvilwe. (Umbwilo 1:1) Wakwe vino umwibuku lilyo mwalumbulwa umwanaci cizelele uwakwata izina lyakuti “Babiloni Mukulu” ilyalembwa pa mpumi yakwe. Mwanaci wiyo walandwa ukuti wikala pa “antu amu nko.” (Umbwilo 17:1, 5, 15) Nomba vino kutaaya umwanaci angacita vivyo, Babiloni Mukulu afwile uwa unkolanya. Nga lyene cizelele wii akaimililako cani?

Pa Umbwilo 17:18, umwanaci aliwenga kwene yamulumbula ukuti “musumba ukulu ukateeka yakateeka yonsi amu nsi.” Izwi lilyo ilyakuti “musumba” likalangilila ukuti a kaungwe ka yantu aakaombela pamwi. Lyene vino ilembelo likuti “musumba ukulu ukateeka yakateeka yonsi amu nsi,” cikupiliula ukuti Umwanaci wiyo uwizina lyakuti Babiloni Mukulu a kaungwe akamaka sana akakwata amaka umu nsi yonsi. Uzye akaungwe kaako tungati a ka musango ci? A ka vya mipepele. Lekini tulande pali vino malembelo yauze mu Umbwilo kwene yakatwavwa ukusininkizya cico.

Izwi lyakuti akaungwe likaomviwa uku vya miteekele, vya uculuzi, nanti vya mipepele. Umwanaci aaka-amwa ukuti Babiloni Mukulu, wene asi kaungwe ka vya miteekele pano Izwi lyakwe Leza likati “yakateeka amu nsi yacitanga uzelele” nawe. Uzelele uuwo ukalozya kuli vino watemwa ukupanga ivipangano na ya kateeka amuno nsi, fwandi ali cino aka-amilwa ukuti “cizelele wino wamanyikwa cuze.”—Umbwilo 17:1, 2; Yakobo 4:4.

Nakapya, Babiloni Mukulu wiyo atanga aye a kaungwe ka vya uculuzi, pano Baibo ikati “aculuzi amu nsi,” yalamuloosya lino alononwa. Alino, ya kateeka, pamwi na aculuzi yaalumbulwa ukuti lino Babiloni Mukulu alaononwa “yalimilila patali.” (Umbwilo 18:3, 9, 10, 15-17) Fwandi Babiloni Mukulu asi kaungwe ka miteekele, nanti aka vya uculuzi, lelo a kaungwe ka vya mapepo.

Usininkizyo nauze uwakuti a kaungwe ka vya mipepele ukaloleka ndi tuvwa vino Baibo ikati wene akasomba antu amu nko zyonsi “mu malele” yakwe. (Umbwilo 18:23) Baibo ikati wene ali “wikalo wa mipasi yankota” pano ukutaila malele nanti ivya mipasi a mano ya mipasi ya nkota nanti iviwa. (Umbwilo 18:2; Malango 18:10-12) Akaungwe kaa, kaamanyikwa ukuti kasilonda upefi wa cumi pano kalumbulwa ukuti kakacuzya “yakasema” na “antu yakwe Leza.” (Umbwilo 18:24) Nupya Babiloni Mukulu wapata sana upefi wa cumi icakuti akacuzya nu kumoola “ya Nte yakwe Yesu.” (Umbwilo 17:6, NW) Acino fwandi tutanga tutwisike ukuti umwanaci wii uwizina lyakwe Babiloni Mukulu akaimililako imipepele yonsi iyaufi, kumwi ni mipepele yonsi iisilonda ukuvwila Yeova.