Uzye Ukatala Uzuukilwa nu Kuvwa Intete?

Lola akalumendo apa cikope. Kakuloleka ikazuukilwa nupya kali ni intete, asi avivyo? Uzye naawe watala uvwapo vivyo?— Antu yonsi yakauvwa vivyo kwene insita zimwi. Muli Baibo mwaya malyasi pa yantu aali ivyuza vyakwe Leza aazuukiilwe nu kuvwa sana intete. Wenga pali yaayo wali a Eliya. Leka tusambilile pali Eliya.

Eliya watenzi umu Izlaeli mpiti sana, ala Yesu atatala wavyalwa. Aabu umwene uwateekanga umu Izlaeli pa nsita iiya ataali kapepa wakwe Yeova, Leza wa cumi. Aabu na mamakwe Yezebele, yapepanga Baali, ka leza kaufi. Fwandi antu aingi umu Izlaeli, nayo kwene yaatandike ukupepa Baali. Namwene Yezebele wali umwipe sana, nupya walondanga ukukoma ya kapepa yakwe Yeova yonsi kwene kumwi na Eliya! Uzye watuumanya vino Eliya wacisile?—

Eliya wapuusile! Wayile umu lwanga ukutali nu kuyafisama umwi cele. Ukwelenganya ukuti i cani icalenzile acite vivyo?— Ee, uvwile intete. Nomba, Eliya ataalondekwanga ukuvwa intete. U mulandu ci? Pano wamanyile ukuti Yeova wali nu kumwazwa. Kwali insita imwi lino Yeova walangiizye amaka yakwe kuli Eliya. Uwanda umwi, Yeova waswike ipepo lyakwe Eliya lino watumile umoto ukufuma ukwiyulu. Fwandi Yeova wali nu kwavwa Eliya na pa nsita kwene ii, lino Yezebele walondanga ukumukoma!

Lino Eliya wali umwi cele, Yeova wamuvwanzizye nu kumuzya ati: ‘I vyani vino ukucita muno?’ Eliya waswike ati: ‘Nene sile nasyalapo pali ya kapepa yako yonsi. Nupya indi ni intete pano yali nu kunkoma.’ Eliya welenginye ukuti ya kapepa yakwe Yeova yonsi yaayakoma. Nomba, Yeova wanenyile Eliya ati: ‘Awe, vino ukwelenganya visi vya cumi. Kucili antu na yauze 7,000 yano yacili yakampepa. Sipa. Nati-nkukwatila umulimo ukulu uno ufwile ukuomba!’ Uzye vwile Eliya watemilwe ukuvwa vivyo?—

I vyani vino ungasambilila kuli vino vyacitikiile Eliya?— Utafwile ukuvwa ukuzuukilwa nanti intete. Wakwata ya cuza aatemwa Yeova, naawe kwene yaakutemwa. Alino, Yeova wakwatisya amaka, nupya alatwalilila ukukwazwa! Uzye watemwa ukumanya ukuti utaaya wenga?—