Yosiya Wakweti Ivyuza Ivisuma

Uzye ukaelenganya ukuti catala ukucita ivintu ivisuma?— Antu aingi avino yakaelenganya. Baibo ikatuneena pa mulumendo uwizina lyakuti Yosiya ukuti camukomiile sana pa kucita ivisuma. Lelo wakweti ivyuza ivisuma ivyamwavwizye. Leka tusambilile pali Yosiya ni vyuza vyakwe.

Isi wakwe Yosiya wali a Amoni, umwene wa Yuda. Amoni wali umwipe sana nupya wapepanga utuluwi. Lino isi wakwe Yosiya wafwile, Yosiya u wizile aya umwene wa Yuda. Nomba, pa nsita iiya ala ali sile ni myaka ya kuvyalwa 8! Uzye ukwelenganya ukuti Yosiya nawe wali umwipe wakwe isi?— Awe foo, wene ataali umwipe!

Nanti lino wali umwance sana, Yosiya walondesyanga ukuvwila Yeova. Acino, wasoolwile antu aatemilwe Yeova ukuya ali ivyuza. Nupya, antu yayo yavwanga Yosiya ukucita ivisuma. Uzye ya cuza yakwe Yosiya yamwi-yamwi yaali aaweni?

Wenga pali ya cuza yakwe Yosiya wali a Zefaniya. Zefaniya wali a kasesema wino wacelulanga antu amu Yuda ukuti iviipe vilayacitikila ndi yatatiile ukupepa utuluwi. Yosiya uvwiliile Zefaniya atandika nu kupepa Yeova, kusi u kupepa utuluwi foo.

Cuza wakwe Yosiya namuze wali a Yelemiya. Yelemiya na Yosiya yakulilaanga pamwi, nupya ikalanga uku ncende iili-imwi. Yaatemwanine sana icakuti lino Yosiya wizile afwa, Yelemiya walemvile ulwimbo uluiyele sana pali vino waluukanga umuze Yosiya. Yelemiya na Yosiya yaavwananga ukucita ivintu ivisuma nupya yuvwilanga Yeova.

I vyani vino ungasambililako kuli Yosiya?— Nanti cakuti Yosiya wali umwance, walondesyanga ukucita ivisuma. Wamanyile ukuti walinzile ukusoolola antu aatemilwe Yeova ukuya ali vyuza. Naawe kwene, uwasoolola ivyuza ivyatemwa Yeova nupya ivilakwazwa ukucita ivintu ivisuma.