“Sangala Akupeele . . . Ulongo Muli Vyonsi Vino Ukapanga Ukucita”

1. I vyani vino uwacance alinzile ukupingulapo ivya ku nkoleelo, nomba u mulandu ci uno atalinzile ukusakamikwa sana? (Lolini cikope cakutandikilako.)

MWE yacance mufwile mukuzumilizya ukuti lino umwi atali atandike ulwendo, alinzile ukumanyila calimwi kuno akuya. Umi waya wa lwendo, nupya lino umwi acili umwance, ali lino angapanga ivyakucita. Ukuya kwene, ukupangila limwi ivya kucita kutangupala. Umukazyana uwi zina lyakuti Heather walanzile ukuti: “Cikatiinya sana. Ulinzile ukupingulapo vino ulaacita umu umi wako onsi.” Nomba ulinzile ukusipa. Yeova akanena antu yakwe ati: “Mutaoopa, nemo namayanga pe namwe. Mutasakamala nanti cimwi pano nene indi Leza winu. Nene namamukomyanga nupya namamwavwanga.”—Eza. 41:10.

2. Uzye mwamanya uli ukuti Yeova akalonda mwapanga amapange asuma angamuletela insansa uku nkoleelo?

² Yeova akamukomelezya ukuti mwapingula ningo vino mulacita uku nkoleelo. (Kasa. 12:1; Mate. 6:20) Akalonda kuti muye ni nsansa. Ivintu visuma vino tukalola, ukuuvwa, nu kuuvwa umulyo vyonsi vii vikatulanga ukuti Yeova akalonda tuye ni nsansa. Elenganyini na pali vino akatusakamala nu kutusambilizya ivingatwazwa ukwikala ningo sana. Yeova akanena antu asiuvwa ukupanda mano kwakwe ukuti: “Mwatemilwe sile ukumfutatila nu kucita iviipe. . . . Mulaapita sile nsonyi nsonyi lino auzo yakupita ni nsansa. Yalaimba inyimbo zya nsansa.” (Eza. 65:12-14) Yeova akacindikwa ndi cakuti aomvi yakwe yasoolola ningo ivya kucita umu umi.—Mapi. 27:11.

MAPANGE ANGAMULETELA INSANSA

3. I vyani vino Yeova akalonda kuti mucite?

³ A mapange ya musango ci yano Yeova akalonda mwapanga? Waumvile antu ukuti yaya ni nsansa ndi cakuti yamumanya nu kumuombela ni cisinka. (Masa. 128:1; Mate. 5:3) Lelo inyama zyene zikalya sile, ukumwa alino nu kukwata ana. Leza akalonda tuye ni nsansa lino twapanga mapange asuma ukucila ivintu ivikazazya inyama. Kaumba Leza winu “ali ntulo ya kutemwa,” “uwa nsansa,” uwaumvile antu “mu cata cakwe.” (2 Kol. 13:11; 1 Tim. 1:11, NWT; Utan. 1:27) Mulaya ni nsansa ndi cakuti mukukolanya Leza witu uwa kutemwa. Uzye mwasininkizya amazwi aya muli Baibo akuti: “Mukupeela mwaya upolelelo ukulu cuze kuluta mukupokelela”? (Mili. 20:35) Mazwi yayo acumi. Fwandi, Yeova akalonda ukuti amapange inu yalanga ukuti mwatemwa antu yauze na aliwe.—Welengini Mate. 22:36-39.

4, 5. I cani icalenzile Yesu ukuya ni nsansa?

⁴ Mwe yacance mungakolanya vino Yesu waomvile ningo sana. Lino wali umwance, nawe kwene wizyanga nu kusansamuka. Izwi Lyakwe Leza likati kwaya “nsita ya kusansamuka . . . ni nsita ya kucina.” (Kasa. 3:4) Yesu wasambililanga ivyaya mu Malembelo pakuti apalame kuli Yeova. Lino wali ni myaka 12, ya simapepo aali umu ng’anda ya kupepelamo yazungwike “pa kwasuka kwakwe kwa mano” pali vyakwe Leza.—Luka 2:42, 46, 47.

⁵ Lino Yesu wakuzile wali ni nsansa sana. I cani icalenzile aye ni nsansa? Wamanyile ukuti Leza walondanga ukuti wene ‘akosole ilandwe lisuma ku apina . . . nu kuleka impafu kuti zyalola.’ (Luka 4:18) Ukucita vino Leza wamunenyile kwalenzile Yesu aye ni nsansa. Pali Masamu 40:8 paaya amazwi aakalanga vino wayuvwanga akuti: “Ala nemo pasi pakutemwa ukucita vino wemo ukalonda, we Leza wane!” Yesu watemilwe sana ukusambilizya antu pali Isi uwa kwi yulu. (Welengini Luka 10:21.) Pa nsita imwi lino Yesu wamala ukusambilizya umwanaci umwi, wanenyile asambi yakwe ati: “Cakulya cane, u kucita ukulonda kwakwe wino uwantumile, nu kumalila milimo yakwe.” (Yoane 4:31-34) Ukulanga ukutemwa uku yantu na kuli Leza kwazanzyanga sana Yesu. Namwe kwene mungaya ni nsansa.

6. U mulandu ci uno cacindamila ukunenako yauze pali vino mukupanga ukucita uku nkoleelo?

⁶ Aina Klistu aingi yatandike upainiya ala yacili ance, nupya cii cayalenzile ukuti yaye ni nsansa. Uzye mungalanzyanya na yamwi pali yaa pali vino mukupaanga ukucita? “Ukutaya ukupanziwa amano amapange yasifikiliziwa. Lelo ukwavula yampandamano kwene yakafikiliziwa.” (Mapi. 15:22) Antu ya musango uwo aatemwa Leza yangamulondolwela ukuti ukuombako umulimo wa nsita yonsi kukalenga umwi asambilila ivingamwazwa umu umi wakwe onsi. Yesu wasambilile ivintu ivingi sana lino wali ukwi yulu. Lyene lino wizile pano nsi, watwalilile ukusambilila. Wayanga sana ni nsansa lino wasambilizyanga antu ilandwe lisuma nupya wazizimizyanga amezyo. (Welengini Ezaya 50:4; Ayeb. 5:8; 12:2) Katulole vino umulimo wa nsita yonsi ungalenga muye ni nsansa.

UMULANDU UNO UMULIMO WA KUPANGA ASAMBI WAZIPILA SANA

7. U mulandu ci uno acance aingi yakatemelwa ukupanga asambi?

⁷ Yesu walanzile ukuti: ‘Yangini . . . mucite antu kuya asambi . . . Mwayawatizya.” (Mate. 28:19, 20) Ndi cakuti mukupanga ukuomba umulimo uu, mulaipakizya sana pano mulaacindika Leza. Pakuti mwaomba ningo umulimo umwi, mulinzile ukukwata insita alino nu kumanya ningo ivya kuomba umulimo uwo. Umwina umwi uwizina lyakuti Timoti uwatandike upainiya ala acili uwacance walanzile ukuti: “Natemwa ukuombela Yeova umu mulimo wa nsita yonsi pano ali nzila ino nkalangilamo ukuti namutemwa. Pa kutandika, cantalilanga ukutandika masambililo ya Baibo, nomba lino papisile insita nakukile uku cifulo cuze, nupya umu myezi inono sile natandike ukusambilizya antu aingi Baibo. Wenga pali yano nasambilizyanga watandike ukwiza umu kulongana. Lino naile ukwi Sukulu Lya Baibolo Ilya Asimbe Aonsi,a yantumile uku cifulo cuze kuno natandike ukusambilizya Baibo antu 4. Natemwa ukusambilizya antu, pano nkalola vino umupasi wa muzilo ukayazwa ukusenuka.”—1 Tesa. 2:19.

8. I vyani vino acance yamwi yacita pakuti yasimikila uku yantu aingi?

⁸ Acance yamwi yasambilila ululimi luze. Jacob, uwa ku North America, walemvile ukuti: “Lino nali ni myaka 7, aingi yano nasambililanga nayo apa sukulu yafumile uku Vietnam. Nalondanga ukuyasimikila pali Yeova, fwandi lino papisile insita natandike ukusambilila ululimi lwao. Ilingi, nasambililanga ala nkulinganya lulimi lwa Cizungu ni Civietnamese ukuomvya Lupungu Lwa Mulinzi. Nupya napanzile ivyuza umu cilongano ca Civietnamese icali apiipi. Lino nafisizye imyaka 18, natandike upaniya. Lino papisile insita, nazanyilwe ukwi Sukulu Lya Baibolo Ilya Asimbe Aonsi. Isukulu lii lyangazwilizye ukuti naomba ningo upainiya, kuno nkaomba ueluda nenga sile umu cilongano cino mwaya iumba lya lulimi lwa Civietnamese. Antu aingi akavwanga ululimi lwa Civietnamese yakazunguka ukuti nasambilila ululimi lwao. Yakanzumilizya ukwingila umu mang’anda yao, nupya ilingi nkayasambilizya Baibo. Yamwi yalunduluka nu kuwatiziwa yawatiziwa.”—Loliniko na Milimo 2:7, 8.

9. I vyani vino umulimo wa kupanga asambi ukatusambilizya?

⁹ Umulimo wa kupanga asambi ukalenga umwi asambilila ivintu ivisuma. Ukalenga umwi aomba ningo, ukulanzyanya ningo na antu nu kusipa alino nu kumanya ningo imivwangile. (Mapi. 21:5; 2 Tim. 2:24) Lelo ukupanga asambi kukaleta sana insansa pano kukalenga umwi ukumanya ivya kunena yauze pa vizumilo vyakwe ukuomvya Malembelo. Nupya kukaya ukusambilila ivya kuomba na Leza.—1 Kol. 3:9.

10. Uzye mungaya uli ni nsansa nanti icakuti umu cifulo cino mukaombelamo antu aingi yasilonda ukuuvwa ilandwe lisuma?

¹⁰ Mungaipakizya umulimo wa kupanga asambi nanti icakuti antu anono sile umu cifulo cinu aakasumba mano ukwi landwe lisuma. Ukupanga asambi kukalondekwa ukuombela pamwi. Icilongano consi cikalonda antu afumacumi. Nanti cakuti umwina nanti nkazi sile wenga aangazana umuntu aakaiza aya umusambi, yonsi yakaomba umulimo wa kulonda antu nupya yonsi yakaya ni nsansa ndi umuntu wasambilila icumi. Ya Brandon yaomvile upainiya pa myaka 9 umu cifulo cino antu yatasumvile amano ukwi landwe lisuma. Yalanzile yati: “Natemwa ukusimikila ilandwe lisuma pano avino Yeova watunena ukucita. Nantandike upainiya lino namazile sile isukulu. Nkauvwa ningo ukukomelezya aina acance umu cilongano cino nayamo nu kulola vino yakulunduluka. Lino nazanyilwe ukwi Sukulu Lya Baibo Ilya Asimbe Aonsi, yantumile ukuyaombela uku cifulo cuze. I cacumi ntazana nanti umwi wino nasambilizya Baibo ukufikila awatiziwa, nomba yauze yene yacita vivyo. Naya sana ni nsansa ukuti napingwilepo ukuomba umulimo wa kupanga asambi.”—Kasa. 11:6.

IVINGAFUMA MULI VINO MWAPANGA UKUCITA

11. U mulimo ci na uze uno acance aingi yakaipakizya ukuombako?

¹¹ Kwaya imilimo ingi ino mungaombela Yeova. Acance aingi yakaipeelesya ukuombako umulimo wa makuule. Amang’anda ya Wene aingi yakulondekwa. Ukukuula Amang’anda yayo kukalenga Yeova aacindikwa, fwandi mungaya ni nsansa lino mukuombako umulimo uwo. Nupya mungaipakizya ukuombela pamwi na ina na ya nkazi. Nupya mungasambilila ivintu ivingi sana, wakwe ukuicingilila uku uzanzo lino mukuomba na vino mungauvwana na akutungulula mulimo uno mukuomba.

12. Uzye umulimo wa upainiya ungalenga uli umwi ukuombako imilimo na yuze?

¹² Umwina uwi zina lyakuti Kevin walanzile ukuti: “Ukufuma sile lino nali umwance, nalondesyanga ukuti ince naombela Yeova umu mulimo wa nsita yonsi. Nizile ntandika upainiya ala indi ni myaka 19. Insita zimwi naombanga nu mwina uwakuulanga pakuti nzane ulupiya ulwakungazwa lino nkuomba upainiya. Nasambilile ivya kupaalika mang’anda, ukwika mawindo, ni visaasa. Nupya pa myaka iili naomvileko ni umba ilyazwilizyanga ukwacitika icimuza, ukukuula cipya cipya Amang’anda ya Wene na mang’anda ya ina. Lino nuvwile ukuti uku South Africa kwalondekwanga aakwazwilizya ukukuula, nalenzile ukuti ningaya nkazwilizyeko nupya yangamile. Kuno uku Africa, nkaya uku makuule ya Mang’anda ya Wene apusane pusane nga papita sile imilungu inono. Yano tukaomba nayo yaya walupwa. Tukaikala pamwi, ukusambilila Baibo capamwi, alino nu kuombela pamwi. Nupya nkaipakizya ukuombela pamwi na ina cila mulungu umu mulimo wa kusimikila aku cifulo cino twayako. Vino napanzile ukucita lino nali umwance vyalenga inje ni nsansa.”

13. U mulandu ci uno acance aingi yakaela ni nsansa lino yakuombela pa Betele?

¹³ Yamwi aatandike umulimo wa nsita yonsi wakwe vino yapanzile ukucita ndakai yakaombela pa Betele. Ukuombela pa Betele kukaleta sana insansa pano imilimo yonsi iikaombwa i yakwe Yeova. Ulupwa lwa pa Betele lukaazwilizya ukuti antu yapokelela Mabaibo ni mpapulo zyuze izya kuyazwa ukusambilila icumi. Umwina uwizina lyakuti Dustin aakaombela pa Betele walanzile ukuti: “Napanzile ukuti ince ntandike ukuomba umulimo wa nsita yonsi ala indi ni myaka 9, nupya natandike upainiya lino namazile isukulu. Lino papisile umwaka onga na citika, yangamile uku Betele, kuno yansambilizye ivya kupulinta impapulo alino nupya iniza ntandika ukuomba umulimo wa kupanga mapologalamu aapa kompyuta. Nkaipakizya sana ukutandikilapo ukuuvwa vino umulimo wa kupanga asambi umu nsi yonsi ukulunduluka. Natemwa ukuombela pa Betele pano imilimo ino tukaomba ikalenga twaazwa antu ukupalama kuli Yeova.”

I VYANI VINO MUKUPANGA UKUCITA UKU NKOLEELO?

14. I vyani vino mungacita pakuti muipekanye ukwizaombako umulimo wa nsita yonsi?

¹⁴ Uzye mungacita uli pakuti mupangile calimwi ukwiza ombako umulimo wa nsita yonsi uku nkoleelo? Icacindama sana, u kuya ni miyele isuma ingamwazwa ukuti muce mwaombela ningo Yeova. Fwandi mwaisambilizya ningo Baibo, mwaelenganya sana pali vino mukusambilila, nupya mwaezya na maka ukwasukapo lino muli pa kulongana nu kulanga ukuti mwaya nu utailo ukome. Lino mucili apa sukulu, mungasambilila ivya kuomba ningo umulimo wa kusimikila ilandwe lisuma. Sambililini ukucindika sana antu lino mukuomvya ivyuzyo ivisuma nu kusumbako sana mano lino yakwasuka. Nupya mungaipeelesya ukuombako vimwi umu cilongano, wakwe ukuzifya ing’anda ya Wene nu kulungisya ivyononeka. Yeova akatemwa sana ukuomvya antu aicefya aakaitemelwa ukuomba. (Welengini Masamu 110:3; Mili. 6:1-3) Umutumwa Paulo walaalike Timoti ukuti yaomba yonsi umu mulimo wa umisyonali pano aina “yatasyanga milimo yakwe.”—Mili. 16:1-5.

15. Uzye mungacita uli pakuti mupekanyizizye uwikalo?

¹⁵ Aingi aaya umu mulimo wa nsita yonsi yakaizanila ivikalondekwa. (Mili. 18:2, 3) Limwi ukucitako kakosi akangamwazwa ukuombako umulimo umwi kuno mwikala kungalenga muzane incito iyakuti mwaomba insita inono. Lino mukupanga ivya kucita, muce muzyeko umwangalizi wa ciputulwa alino na ya painiya aaya umu muputule winu. Muce muyuzye imilimo ino ya painiya yangaomba pakuti yaisakamala. Nupya wakwe vino Baibo ikalanda, mulinzile ‘ukupeela umulimo winu kuli Yeova alino mapange inu yalafikiliziwa.’—Mapi. 16:3; 20:18.

16. Uzye umulimo wa nsita yonsi ungamwazwa uli ukuipekanya ukwizaomba imilimo yuze icindame uku nkoleelo?

¹⁶ Mungasininkizya ukuti Yeova akalonda kuti ivintu vikamuzipile uku nkoleelo. (Welengini 1 Timoti 6:18, 19.) Umulimo wa nsita yonsi ukalenga mwaombela pamwi na yauze aaya umu mulimo wa nsita yonsi nupya ukalenga mwaomba ningo umulimo wakwe Leza. Aingi yazana ukuti ukuombela Yeova lino yacili ance kukayazwa ukwiza ikala ningo umu cupo. Ilingi, yayo aombanga upainiya lino yatali ingile umu cupo yatwalilila ukuomba umulimo uu lino ingila umu cupo.—Loma 16:3, 4.

17, 18. Mungacita uli pakuti mwikeko sana mano lino mukupanga ivya kucita?

¹⁷ Pali Masamu 20:4 pakalanda pali Yeova ukuti: “Sangala akupeele vyonsi vino umwenzo wako ukakumbuka, akupeele nu longo muli vyonsi vino ukapanga ukucita.” Fwandi mwaelenganya pali vino mukupanga ukucita uku nkoleelo. Mwaelenganya pali vino Yeova akacita ndakai na vino mungazwilizyako umu mulimo wakwe. Lyene mwapanga ukucita ivingamuzanzya.

¹⁸ Ukuombela Yeova apapezile amaka inu kulalenga muye ni nsansa pano mulamucindika. Fwandi, ‘mwalonda ukuzangila muli Yeova, nga nawe alamupeela ivikalonda umwenzo winu.’—Masa. 37:4.