Mauzyo Yano Aakawelenga Yakauzya

Uzye lino Satana wanenyile Eva ukuti atalafwa ndi cakuti walya uku cimuti ca kumanya icisuma ni ciipe, watandike icisambilizyo icayako ndakai icakuti umuntu nga wafwa umupasi usifwa?

Awe foo. Ciwa atanenyile Eva kuti ndi cakuti walya uku cizao cino Leza wayalesizye, wali nu kuloleka sile kwati watafwa lelo cimwi icisiloleka icaya umukasi kakwe (yamwi yakalozya uku cintu cico ndakai ukuti umupasi usifwa) cali nu kutwalilila ukuyako uku cifulo cuze. Satana walandiile mu nzoka lino wanenanga Eva ukuti nga walya ku cizao ca ku muti uwo atalafwa foo. Walanzile ukuti wali nu kutwalilila ukuipakizya umi pano nsi, ukwaula kulatungululwa na Leza.—Utan. 2:17; 3:3-5.

Ndi cakuti cisambilizyo cakuti umuntu nga wafwa mupasi usifwa citatandikile mu Edeni, uzye alilaci lino catandike? Tutamanya ningo. Twamanya sile ukuti kupepa kwa ufi konsi kononyilwe pa nsita yakwe Mulamba Mukalamba uwa mu manda yakwe Nowa. Kusi upefi wa ufi uli onsi uwasiile kano sile kupepa kwa cumi, pano Nowa nu lupwa lwakwe sile aali ya kapepa ya cumi, aliyo yapuswike.

Fwandi cisambilizyo cakuti muntu nga wafwa umupasi usifwa, cifwile catandike pa cisila cakwe Mulamba Mukalamba. Lino Leza wavulunginye ululimi lwa antu pa Babeli antu yasalangine “mu nsi yonsi,” fwandi lino yasalangine yafwile yatwalilile ni cisambilizyo kwene cico icakuti muntu nga wafwa mupasi wene usifwa. (Utan. 11:8, 9) Nanti icakuti tutamanya ningo kuno cisambilizyo cii ica ufi catandikiile, twasininkizya ukuti isi wa ufi Satana Ciwa u walenzile ukuti ufi uwo usalangane ku antu.—Yoa. 8:44