Twalililini Ukuzifya Ucuza Winu na Yeova

CILA mwaka, antu aingi yano Yeova watemwa yakaweziwa umu cilongano. Elenganyini vino ukwi yulu kukaya insansa lyonsi lino umwi waweziwa. (Luka 15:7, 10) Ndi cakuti mwawela umu cilongano, mungasinkizya ukuti Yesu, ya malaika na Yeova yaya sana ni nsansa. Nomba lino mukuzifya ucuza winu na Yeova mungakwata intazi. Iintazi ci zizyo, nupya i cani cingamwazwa?

IINTAZI CI ZINO MUNGAKWATA?

Aingi yakatwalilila ukuvwa uyi na pa cisila ca kuweziwa. Limwi mwamanya vino Umwene Devedi wayuvwanga. Na lino welezilwe pa cisila ca kuyembuka, watiile: “Uyi wane uwati ulenga vyonsi vii.” (Masa. 40:12; 65:3) Nanti sile alino umwi wawela kuli Yeova, angayuvwa uwa mulandu nanti ukuvwa insonyi pa myaka iingi. Ya Isabelle yazinzilwe pa myaka ukucila pali 20.a Yalanzile iyati: “Cantalile ukuzumila ukuti Yeova wanjelezile. Ndi cakuti mwatoovoka, mungaya na ucuza usuma na Yeova nupya. (Mapi. 24:10) Mwaezya na maka ukuti ivya musango uu vitakamucitikile.

Yamwi yakasakamala ukuti yatanga yakwanisye ukucita ivikalondekwa pakuti yaye na ucuza usuma na Yeova nupya. Pa cisila lino ya Antoine yaweziwa yatiile: “Nilile vyonsi vino nasambililanga lino nali Nte.” Pa mulandu wakuti aingi avino yakayuvwa, cikalenga yataombesya lino yakuombela Yeova.

Wakwe, ndi cakuti ing’anda yakwe umwi yononeka pa mulandu ni cimuza icipisye, limwi angatoovoka nga welenganya pali vino vikulondekwa pakuti ing’anda iyo izifiwe nupya. Vikwene avino cingaya ndi cakuti ucuza winu na Yeova ononiike pa mulandu ni membu izipisye zino mwacisile, mungalondekwa ukuombesya pakuti muzifye ucuza winu na Yeova. Nomba mutalinzile ukuomba umulimo uwo mwenga.

Yeova akutunena akuti: “Lekini tuvwane lyene.” (Eza. 1:18) Mwacita vivyo mpiti. Na cico calenga Yeova amutemwe sana. Pa mulandu wakuti mwawela kuli Yeova, angamuomvya uku kusinila Satana ukuti u wa ufi.—Mapi. 27:11.

Vino mwawela kuli Yeova calenga ukuti mupalame kuli aliwe, nawe wamulaya ukuti alapalama kuli mwemwe. (Yako. 4:8) Nomba kuli na vyuze vino mulinzile ukucita ukucila sile ukumanyikwa ukuti mwawela nupya umu cilongano. Mulinzile ukutwalilila ukutemwa Tata winu nupya cuza winu, Yeova. Mungacita uli vivyo?

MWAIMIKA MAUYO YANO MUNGAFIKILIZYA

Mwaezya ukwimika mauyo yano mungafikilizya. Mufwile mukaiusya ivintu ivinono vino mwasambilile pali Yeova na pali paladaise ino watulaya. Nomba mulinzile ukutantika imiombele inu ningo nupya, wakwe ukusimikila lyonsi, kuya umu kulongana alino nu kuya pamwi na ina ya nkazi. Lolini mauyo yamwi yano mungimika.

Mwalanda na Yeova lyonsi. Tata winu wamanya ukuti nga mwatwalilila ukuyuvwa amulandu, cingamutalila ukulapepa kuli aliwe. (Loma 8:26) Nomba mwapepa lyonsi kuli Yeova nu kumunena ukuti mukulondesya ukumuzanzya. (Loma 12:12) Ya Andrej yakaiusya ukuti: “Nayuvwanga uwa mulandu sana nu kuvwa insonyi. Nomba lyonsi nga napepa, nuvwangako ningo. Nayanga sana nu mutende.” Ndi cakuti mutamanyile vino mungapepelapo, mungabelenga amapepo ya Mwene Devedi yano wapepanga lino walapiile alembwa umu Masamu 51 na 65.

Mwaisambilizya Baibo lyonsi. Ukucita vivyo kulamwazwa ukuya nu utailo ukome nu kumwazwa ukutwalilila ukutemwa Yeova. (Masa. 19:7-11) Ya Felipe yatiile: “Pa mulandu wakuti ntabelenganga Baibo lyonsi nu kuisambilizya, natonsile muli ukapepa na cico calenzile insosye Yeova. Ntalondanga ukusosya Yeova nupya, fwandi nasininkizyanga ukuti lyonsi nkuisambilizya Baibo.” Namwe kwene avino mungacita. Ndi cakuti mukulonda amalyasi asuma yano mungaomvya pa kuisambilizya Baibo, munganenako cuza uwakoma muli ukapepa ukuti amwazweko.

Pangini ucuza usuma na ina na ya nkazi nupya. Yamwi aakaweziwa umu cilongano, yakasakamala ukuti yauze yayasokela. Ya Larissa yatiile: “Nuvwanga sana insonyi, nalolanga ukuti nasosizye sana aina na ya nkazi. Natwalilile ukuyuvwa vikwene pa nsita itali.” Mulinzile ukusininkizya ukuti ya eluda na yauze umu cilongano yakalondesya ukumwazwa ukuya ya cuza yakwe Yeova nupya. (Lolini kambokosi kakuti “I Vyani Vino ya Eluda Yangacita?”) Yakauvwa ningo vino mwawela umu cilongano nupya yakalonda muye ni nsansa.—Mapi. 17:17.

I cani cingamwazwa ukupalama uku amu cilongano? Mwaya lyonsi umu kulongana na ina na ya nkazi nu kuomba nayo umu mulimo wa kusimikila. Uzye ukucita vivyo kungamwazwa uli? Ya Felix yatiile: “Amu cilongano yalondesyanga ukuti mbweziwe. Naweni ukuti yantemilwe sana. Yonsi yangazwile ukuwela umu lupwa lwakwe Yeova, ukulola ukuti Yeova wanjelezile nu kuti ningatwalilila ukombela Yeova.”—Lolini kambokosi kakuti “I Vyani Vino Mulinzile Ukucita?”

MUTALINZILE UKUTOOVOKA!

Satana alatwalilila ukuleta intazi izingamutoovola lino mukupanga ucuza na Yeova nupya. (Luka 4:13) Mwaiteyanya ukukomya ucuza winu na Yeova.

Yeova walanda pa mfwele zyakwe ukuti: “Nemo ndapita nkulonda iponge, ndawezya ni ipumbuke, yacilonda nayo ndainyepela icilonda nga nu kupozya ino yalwala.” (Ezek. 34:16) Yeova wazwa antu aingi sana ukuya ya cuza yakwe nupya. Mungasininkizya ukuti akalonda ukumwazwa ukutwalilila ukuya na ucuza ukome na aliwe.

I Vyani Vino ya Eluda Yangacita?

Kwaya ivintu ivingi vino ya eluda yangacita pakuti yazwe uwataweziwa ukuya cuza wakwe Yeova nupya. Uvwini vino mungacitila atiyaweziwa.

Mwayakomelezya. Umutumwa Paulo wamanyile ukuti umuntu uwawela kuli Yeova akatoovoka pa mulandu nu ulanda. (2 Kol. 2:7) Nupya angatwalilila ukuyuvwa uwa mulandu. Paulo wanenyile amu cilongano ukuti: “Mulinzile ukumwelela nu kumuteekezya pakuti ulanda utamutoovola.” Atiyaweziwa yakalondekwa ukukomeleziwa ukuti Yeova na aina Klistu yauze yayatemwa sana. Ndi cakuti ya eluda yakuyataizya nu kuyakomelezya lyonsi cilalenga yatatoovoka.

Mwapepela pamwi nayo. “Ipepo lya kupaapata kwa mulungami lyakwata sana amaka.” (Yako. 5:16) Ya Larissa yano itulandapo yatiile: “Nanenyile ya eluda vino natwisikanga ni vyansakamikanga. Yampepiileko nu kupepela pamwi nani. Na cico calenzile nsininkizye ukuti yatansokiile. Yalondanga ukungazwa ukuya cuza wakwe Yeova nupya.” Umwina Theo watiile: “Vino ya eluda yampepiileko vyalenzile nsininkizye ukuti Yeova wantemwa sana nupya akalola ivisuma muli nene asi viipe sile.”

Mwaya ya cuza yao. Atiyaweziwa yakalondekwa ukukwata ya cuza umu cilongano. Eluda wi zina lyakuti Justin watiile: “Mwasimikila pamwi nayo insita izingi nupya mwaezya na maka ukuyatandalila. Cacindama sana ukuya ya cuza yao.” Ya Henry ya eluda yauze yatiile: “Ndi cakuti yauze yalola ukuti ya eluda yakupanga ucuza na atiyaweziwa, nayo kwene yalalondesya ukucita vivyo.”

Mwayakomelezya ukuisambilizya Baibo. Cuza uwalunduluka muli vyakwe Leza angazwa wino wataweziwa ukulaisambilizya Baibo lyonsi. Eluda wi zina lyakuti Darko watiile: “Natemwa ukuyanenako ivisinka ivingayakomelezya vino nazanyile lino naisambilizyanga Baibo nu kuyanenako vino nkaipakizya ukuisambilizya. Nupya nkatantika ukusambilila nayo icipande cimwi icingayakomelezya.” Eluda na muze uwi zina lyakuti Clayton watiile: “Nkayakomelezya ukulonda malyasi ya muli Baibo angayazwa.”

Mwayasakamala ningo. Atiyaweziwa yakalola kwati ya eluda aakapingula. Nomba ndakai yalinzile ukulayalola ukuti aakacema. (Yele. 23:4) Mwakutika kuli aliyo nu kuyataizya. Mwalanzyanya nayo insita izingi. Uvwini vino eluda wi zina lyakuti Marcus akacita nga yaya uku cipempu ca ucemi, watiile: “Tukabelengela pamwi amalembo, ukuyataizya, nu kuyanena ukuti twaya sana ni nsansa pali vino yaombesya ukuwela umu cilongano nu kuti na Yeova kwene waya ni nsansa. Lyonsi lino twamala ukulanzyanya tukatantika uwanda uno tungaca tuswilileko nupya.”

a Mazina ya antu ali umu cipande cii asi mazina yao acumi cumi.