Uzye Leza Wakwata Izina?

Vino Baibo yalandapo

Antu yonsi yakwa amazina. Uzye na Leza kwene atalinzile ukukwata izina lyakwe? Ukukwata ma zina nu kulayaomvya kwacindama sana ndi yamwi yakulonda ukuya ivyuza. Uzye asi vino cifwile ukuya nga ciza kuli ucuza witu na Leza?

Muli Baibo, Leza walanda ukuti: ‘Nene indi Yeova, lilyo lili zina lyane.’ (Ezaya 42:8) Nanti i cakuti wakwata malumbo akumwamilako wakwe, “Leza wa Maka Yonsi,” “Kateeka Uwa Maka Yonsi,” ni lyakuti “Kaumba,” wacindika sana antu aakamupepa pa kuyanena ukuti yaomvya izina lyakwe.—Utandiko 17:1; Milimo 4:24; 1 Petulo 4:19.

Mu ma Baibo aingi apiliulwa pali Kufuma 6:3 paya izina lyakwe Leza. Amazwi ayapo yakati: ‘Nalolike kuli Abulaamu, kuli Isaki, na kuli Yakobo wakwe Leza Wamaka yonsi. Lelo ntaimanyisizye kunoyali mwi zina lyane lyamuzilo ilyakuti Yeova.’

Pa myaka iingi mu Cimambwe-Lungu izina lyakwe Leza yakati Yeova. Aasambilila pali Baibo aingi yatemwa ukulemba iyati “Yawe,” nomba Yeova ali izina ilyamanyikwa ku yantu aingi. Iciputulwa ca kutandikilako muli Baibo citalemvilwe mu Cizungu lelo calemvilwe mu Ciyebulai, ululimi luno yakawelenga ukufuma kwi lunji kuya kwi mani. Umu lulimi luu, izina lyakwe Leza lyakwata ivilembo 4 ivikaloleka vii, יהוה. Ivilembo vii 4 ivikapiliula YHWH vyamanyikwa ukuti Vilembo 4 Vya Ciyebulai [YHWH nanti JHVH].