Naanin Ijjino

Buk in ej juõn buk in bwebwenato ko remol. Emwij bõki jen buk eo elaptata ilo lõl, Baibel eo. Bwebwenato kein rej lewõj ñõn yuk juõn melele kin lõl jen jinoin an kar Anij kõmõnmõne liktak ñõn ran kein ar. Rej bareinwõt kwalok kin men ko me Anij ej kalimur bwe e naj kõmõni ilo ran ko rej berotok.

Buk in ej lewõj ñõn yuk juõn melele kin kobban Baibel eo. Ej kwalok kin armij ro ilo Baibel eo im men ko r’ar kõmõni. Ej bareinwõt kwalok kejatrikrik eo elap kin mour in drio ilo juõn paredais ion lõl me Anij e ar kalimur kake.

Eor 116 bwebwenato ko ilo buk in. Emwij kilajraki bwebwenato kein ilo drualitok mõttõn ko. Juõn peij ilo jinoin kajojo mõttõn ej kwalok jirik kin kobban bwebwenato ko ilo mõttõn eo. Emwij karõki bwebwenato ko ilo lajrak in ien air kar walok ilo bwebwenato. Men in ej jibãñ yuk bwe kwon melele kin ien an kar walok men ko, ikijen men ko r’ar walok mokta ak elikin.

Emwij kwalok bwebwenato kein ilo juõn kajin e biruru melele kake. Elõñ iami, ajiri ro redrik, naj maroñ mõke konono bwebwenato kein. Kom ridto ro naj kile bwe ajiri ro nejemi re drik re naj mõnõnõ bwe komin elij im bar elij bwebwenato kein ibeir. Kwo naj lo bwe kobban buk in ej men in kaitok limoen ro redrik im ridto ro jimor.

Jeje ko redrik ilo jemlokin kajojo bwebwenato kein rej kwalok kajien buk im japta ko jen Baibel eo me bwebwenato eo e ar walok jen e. Kimij rejãn yuk bwe kwon konono buk im japta kein jen Baibel eo im rej kwalok berber in bwebwenato ko.